Mäske ya gä nehmähu̱ dä zo̱ho̱ näꞌä rä paꞌä, rä Zi Dada Jeoba ne gä pe̱ꞌtsihu̱ rä pasensia ꞌne gä to̱ꞌmihu̱ näꞌä rä pa xä hñutsꞌi pa dä kumpli gatꞌho näꞌä xä promete. ¿Por hanja rä Zi Dada Jeoba adi gä pe̱ꞌtsihu̱ rä pasensia? ¿Te dä za dä maxkägihu̱ pa hingä ꞌme̱dihu̱ rä johya mientra di to̱ꞌmihu̱?

¿POR HANJA RÄ ZI DADA JEOBA ADI GÄ PE̱ꞌTSIHU̱ RÄ PASENSIA?

Rä Mäkä Tꞌofo enä: «Rä Zi Dada Jeoba to̱ꞌmi ko rä pasensia ꞌne xä ñhoki pa dä maxꞌäꞌihu̱, ꞌne ma dä mꞌai pa dä rꞌaꞌäꞌhu̱ rä nhuekäte. Ngeꞌä Jeoba näꞌä nꞌa rä Zi Dada de gä justisia. Pe̱ꞌtsi rä johya gatꞌho nuꞌu̱ sigi to̱ꞌmiꞌä» (Is. 30:18). Rä profeta Isaías bi yꞌofo nuya yä noya pa nuꞌu̱ yä judío xa myä terco (Is. 30:1). Pe näꞌä rä tiempoꞌä ꞌnehe mi mꞌu̱i nuꞌu̱ yä judío myä yꞌo̱de. Hänge mi yꞌo̱de nuya yä noya bi yꞌofo rä profeta Isaías xa bi nupäbi yä mfeni ꞌne dä za dä nupkägihu̱ mä mfenihu̱ ꞌnehe mäpaya.

Nuꞌmu̱, ¿por hanja di debe gä pe̱ꞌtsihu̱ rä pasensia ꞌne gä sigi gä to̱ꞌmihu̱? Ngeꞌä mismo rä Zi Dada Jeoba to̱ꞌmi ko ndunthi rä pasensia. Näꞌä ya xä hñutsꞌi te mä pa ꞌne te mä ora ma dä huati nuya yä tsꞌo tꞌo̱tꞌe di nheki ha rä Xiꞌmhai (Mat. 24:36). Xti zo̱ho̱ näꞌä rä paꞌä, ma dä gohi claro ge rä Zithu näꞌä nꞌa rä kꞌuamba ꞌne ge hingä mäjuäni gatꞌho näꞌä xä mää kontra rä Zi Dada Jeoba ꞌne kontra gekhu̱. ꞌNepu̱, rä Zi Dada Jeoba ma dä hñäki de nuua ha rä Xiꞌmhai, tanto rä Zithu ꞌne gatꞌho nuꞌu̱ di mfaxhui. Pe rä Zi Dada Jeoba ma dä hueki ꞌne ma dä umbäbi rä te gatꞌho nuꞌu̱ pe̱päbi.

Mientra di to̱ꞌmihu̱ dä zo̱ho̱ näꞌä rä pa, rä Zi Dada Jeoba hingä ma dä hñäki gatꞌho nuꞌu̱ yä xuñha di pe̱ꞌtsihu̱. Pe di prometegihu̱ ge dä za gä pe̱ꞌtsihu̱ rä johya mäske di thogihu̱ yä xuñha. Rä Mäkä Tꞌofo enä: «Pe̱ꞌtsi rä johya gatꞌho nuꞌu̱ sigi to̱ꞌmiꞌä» (Is. 30:18). a ¿Hanja dä za gä pe̱ꞌtsihu̱ rä johya mäske di thogihu̱ yä xuñha? Ma gä handihu̱ goho yä konseho.

¿HANJA DÄ ZA GÄ PE̱ꞌTSIHU̱ RÄ JOHYA MIENTRA DI TO̱ꞌMIHU̱?

Hyandi ꞌnehe nuꞌu̱ yä hogä tꞌo̱tꞌe thogi ha ri bida. Durante rä bida rä rey David bi hyandi ndunthi yä ntsꞌomꞌu̱i (Sal. 37:35). Mäske njabu̱, näꞌä bi ꞌñenä: «Ote gi mää, ꞌne sigi to̱ꞌmi pa gi hyandi te ma dä me̱fi Jeoba. Ogi nkue̱ po ränge nuꞌu̱ yä tsꞌomꞌu̱i jäꞌi gi handi po̱nibi xä ñho näꞌä beni dä me̱fi» (Sal. 37:7). ¿Hanja bi me̱fi ꞌnehe ha rä bida nunä konseho bi uni rä rey David? De yoho yä forma: 1) Himbi  hñäki de ha rä mfeni ge rä Zi Dada Jeoba xki prometebi dä ñäni. ꞌNe 2) bi hñudi bi ntso̱ꞌmi pa bi hyandi ꞌne bi balora nuꞌu̱ yä jäpi mi häni de rä Zi Dada Jeoba näꞌä oraꞌä (Sal. 40:5). Mu̱ hingä e̱nthu̱ ha mä mfenihu̱ ho̱nse̱ nuꞌu̱ yä xuñha di pe̱ꞌtsihu̱, ꞌne gä hudihu̱ gä ntso̱ꞌmihu̱ pa gä handihu̱ te mä jäpi rꞌakägihu̱ rä Zi Dada Jeoba, hingä ma dä jakägihu̱ xä ñhei gä to̱ꞌmihu̱ ko rä pasensia.

Ogi he̱gi de gi nsundabi rä thuhu rä Zi Dada Jeoba. Tal vez rä rey David go geꞌä bi yꞌofo rä Salmo 71 ꞌne bi ꞌñembäbi rä Zi Dada Jeoba: «Nuga ma gä sigi gä to̱ꞌmi; ꞌne mänꞌa ma gä nsundaꞌi» (Sal. 71:14). ¿Pe te bi me̱fi David pa bi nsundabi rä thuhu Jeoba? Mi xipäbi märꞌa de rä thuhu rä Zi Dada Jeoba ꞌne mi tutuäbi yä jähñä (Sal. 71:​16, 23). Nuju̱ ꞌnehe dä za gä nsundabihu̱ rä thuhu rä Zi Dada Jeoba ja ngu bi ja David, ora di predikahu̱, ora di honihu̱ yä oportunida pa gä xipäbihu̱ de rä Zi Dada Jeoba mä amigohu̱ ꞌne mä familiahu̱, ꞌne ora di tutihu̱ yä jähñä. Hänge beni ge pa mänꞌa rä mꞌiki ora ma gi tuti nꞌa rä jähñä, xa dä jamäsu te mää näꞌä jähñäꞌä. Geꞌä ma dä maxꞌäꞌi pa hingi ꞌme̱di rä johya mientra di to̱ꞌmihu̱ dä zo̱ho̱ näꞌä rä pa habu̱ rä Zi Dada Jeoba ma dä hñäki gatꞌho yä sufrimiento.

Ogi ꞌuege de rä congregación nixi de yä ku. Nuꞌmu̱ David bi thogi po ndunthi yä xuñha bi ꞌñembäbi rä Zi Dada Jeoba: «Nuga ma gä umbäbi ntꞌo̱de ri thuhu nuꞌu̱ mä ku; ha mbo de rä mhuntsꞌi ma gä nsundaꞌi» (Sal. 22:22). Ja ngu David bi hyoni rä amista de nuꞌu̱ mi pe̱päbi rä Zi Dada Jeoba, nuju̱ ꞌnehe ora di thogihu̱ yä xuñha dä hogi mänꞌa gä o̱thu̱ ntsꞌe̱di pa gä honi mä kuhu̱ ha yä mhuntsꞌi, ha rä tꞌungä ntꞌo̱de ꞌne ha cualquiera mä nꞌa rä ora (Rom. 1:​11, 12).

Ma gä tedehu̱ näꞌä rä komfiansa di pe̱ꞌspäbihu̱ rä Zi Dada Jeoba. Salmo 62:5 enä: «Nuga, ha Äjuä di huxä gatꞌho mä komfiansa ꞌne di to̱ꞌmi ko rä pasensia, ngeꞌä di pädi ge go geꞌä ma dä maxkägi». Mähyoni gä tedehu̱ mä komfiansahu̱ po rä Zi Dada Jeoba mänꞌa ora di sentihu̱ ge di tarda näꞌä rä pa xä prometegihu̱. Hindi mporta hängu ma gä sigi gä to̱ꞌmihu̱, ma gä sigi gä pe̱ꞌspäbihu̱ rä komfiansa rä Zi Dada Jeoba ge näꞌä hää ma dä kumpli yä promesa. ¿Pe te dä hogi gä pe̱fihu̱ pa gä tedehu̱ näꞌä rä komfiansa di pe̱ꞌspäbihu̱? Mähyoni gä nxadihu̱ rä Mäkä Tꞌofo. Pe ora di nxadihu̱ rä Mäkä Tꞌofo, mähyoni gä jamäsuhu̱ hanja gatꞌho yä mfistꞌofo o rä ꞌñuu näꞌä udi ꞌne hanja gatꞌho näꞌä xä promete rä Zi Dada Jeoba xä kumpli. ꞌNehe mähyoni gä jamäsuhu̱ näꞌä utkägihu̱ de rä Zi Dada Jeoba (Sal. 1:​2, 3). Pa gä tedehu̱ näꞌä rä komfiansa di pe̱ꞌspäbihu̱ rä Zi Dada Jeoba, ꞌnehe mähyoni gä xatuäbihu̱ ꞌne gä apäbihu̱ ge dä maxkägihu̱ gä sigihu̱ gä pe̱ꞌtsihu̱ nꞌa rä hogä ntsitsꞌi Kongeꞌä, mientra di to̱ꞌmihu̱ dä zo̱ho̱ näꞌä rä te pa nzäntho xä prometegihu̱ habu̱ ya hingä ma dä nja yä sufrimiento (Jud. 20, 21).

Ja ngu rä rey David, hinte mä duda di debe gä pe̱ꞌtsihu̱ ge rä Zi Dada Jeoba fadigihu̱ pa dä maxkägihu̱ ꞌne hindi fayagihu̱ (Sal. 33:​18, 22). Hää, mientra gi to̱ꞌmi näꞌä rä pa rä Zi Dada Jeoba, ogi e̱ntꞌi ha ri mfeni ho̱nse̱ nuꞌu̱ yä xuñha gi thogi, sino hñudi gi hyandi te mä jäpi gi pe̱ꞌtsi. ꞌNehe, sigi gi nsundabi rä thuhu rä Zi Dada Jeoba, ogi ꞌuege de yä ku, ꞌne tede näꞌä rä komfiansa gi pe̱ꞌspäbi rä Zi Dada Jeoba.