Pero labay nen Jehova ya maan-anos tayon alagaren so ikiwas to. Akin et labay nen Jehova ya manalagar tayo? Antoy makatulong pian maliket tayo nin siansia legan tayon manaalagar?

AKIN ET LABAY NEN JEHOVA YA MANALAGAR TAYO?

Ibabaga na Biblia: “Si Jehova et maan-anos a manaalagar ed pangipatnag toy kaabigan ed sikayo, tan sikatoy onalagey pian kasian to kayo. Ta si Jehova et Dios na inkahustisya. Maliket so amin a mantultuloy a manilalo ed sikato.” (Isa. 30:18) Impaisulat nen Jehova so Isaias kapitulo 30 parad saray benger ya Judio. (Isa. 30:1) Pero amay nabasad bersikulo 18 et mensahe ya angiter na pag-asa ed saray matoor ya Judio. Mangiiter met iya na pag-asa ed saray matoor ya lingkor nen Jehova natan.

On, labay nen Jehova ya maan-anos tayon manalagar ta anggan sikaton mismo et manaanos tan manaalagar met. Wala lay inyeskedyul ton petsa na panderal to ed sayan sistema, tan labalabay to met lan onsabi itan ya agew tan oras. (Mat. 24:36) No onsabi itan ya agew, apatunayan la ya puros katilaan imay akusasyon nen Satanas ed si Jehova tan ed sikatayo ran lingkor na Dios. Kanian ekalen la nen Jehova so impluensya nen Satanas ed sayan mundo tan deralen toy amin ya pinmanig ed Diablo, pero “kasian to [tayo].”

Legan tayon aalagaren itan ya agew, ag-itayo ipaliis nen Jehova ed saray subok. Pero say segurado, tulongan to tayo pian mansiansia tayon maliket legan tayon manaalagar. Singa imbaga nen Isaias, maliket so mantalaran. (Isa. 30:18) a Antoy gawaen tayo pian mansiansia tayon maliket? Walay apatiran makatulong.

ANTOY MAKATULONG PIAN MALIKET TAYO LEGAN TAYON MANAALAGAR?

Manpokus kad saray bendisyon. Diad interon bilay nen Arin David, amayamay so anengneng ton kaugsan. (Sal. 37:35) Pero oniay insulat to: “Mandeen ka labat ed arapan nen Jehova tan mananos kan manalagar ed sikato. Agka onsyosyodot ed samay too a nagagawaan to ray pakana to.” (Sal. 37:7) Inyaplikan mismo itan nen David. Say sankanonot  to et aramay promise nen Jehova ya sikatoy tulongan To. Nampokus met ed saray bendisyon ya iiter ed sikato nen Jehova. (Sal. 40:5) Singa si David, imbes ya say sankanonot tayo et puros problema, manpokus tayod saray bendisyon ya iiter la natan nen Jehova ed sikatayo. No agtayo akapokus ed saray negatibo, agtayo nairapan ya manalagar.

Lanang mon irayew si Jehova. Posiblin si David met so nansulat ed Salmo 71. Oniay imbaga tod si Jehova: “Agak ontundan manalagar; mas lalo ta ka nin idayew.” (Sal. 71:14) Panon ya indayew nen David si Jehova? Imbaga tod arum iray makapabilib ya kualidad tan ginawa nen Aman Jehova, tan lanang ton kakansionan na panangirayew. (Sal. 71:​16, 23) Singa si David, mansiansia tayon maliket no sasamboten tayo ray pagkakataon ya nairayew tayoy Jehova diad ministeryo, no kaistoryaan tayo ray kapamilya tan kakaaro tayo, tan no sikatoy kakansionan tayo. Kanian diad onsublay ya pangansion moy Kingdom song, marakep no talosan mon maong so lyrics tan ipapusom itan.

Miulop kan lanang ed saray agagi pian napaseseg ka. Nen nantutumbokan iray problema nen David, oniay imbaga tod si Jehova: “Diad arapan na saray matoor ed sika et manilalo ak ed ngaran mo.” (Sal. 52:9) Singa si David, napaseseg tayo no kaiba tayo ray matoor ya lingkor nen Jehova diad aral, ministeryo, tan anggan diad saray gathering tayo.—Roma 1:11, 12.

Pabiskeg moy ilalom. Oniay ibabaga na Salmo 62:5: “Maan-anos ak a manaalagar ed Dios ta manlalapud sikato so ilalok.” No mabiskeg so ilalo tayo, ag-itayo nadismaya anggano abaybayag tayo lan aalagaren so isabi na anggaan. Makapan-anos tayo no mabiskeg so tiwala tayo ya nagawan-nagawa iray insipan nen Jehova. Ombiskeg so ilalo tayo no aralen tayoy Salita na Dios. Marakep no i-personal study tayo iray propesiya, say pankokonektaan na interon Biblia, tan saray espisipikon detalye tungkol ed si Jehova. (Sal. 1:2, 3) Importante met ya itultuloy tayoy “manpikasi . . . diad panangiwanwan na masanton espiritu” pian mansiansian mabiskeg so relasyon tayod si Jehova legan tayon aalagaren so im-promise ton bilay ya andi-anggaan.​—Jud. 20, 21.

Singa si Arin David, komon ta lanang mon tandaan ya babantayan nen Jehova iramay manaalagar ed Sikato tan lanang Ton ipapanengneng so matoor ya panangaro ed sikara. (Sal. 33:​18, 22) Manpokus kad saray bendisyon, lanang mon irayew si Jehova, miulop ka lanang ed saray agagi pian napaseseg ka, tan pansiansiam ya mabiskeg so ilalom. No gawaen mo iratan ya amin, seguradon maan-anos mon naalagar si Jehova!