Apesar di esei, Yehova ke pa nos tin pasenshi i warda te ora e dia yega p’e tuma akshon. Dikon Yehova ta pidi nos esei? Kiko nos tin ku hasi pa nos ta felis miéntras nos ta warda?

DIKON YEHOVA KE PA NOS WARDA?

Beibel ta bisa: “Yehova ta warda ku pasenshi te ora e por mustra bondat na boso. Lo e tuma akshon; lo e mustra miserikòrdia na boso, pasobra Yehova ta un Dios di hustisia. Felis ta e hendenan ku ta keda den ekspektativa den dje.” (Isa. 30:​18, nota) Isaías a skirbi e palabranan ei pa e hudiunan kabesura. (Isa. 30:1) Pero e palabranan ei a duna e hudiunan fiel speransa. Anto e mesun palabranan ei ta duna nos, ku ta fiel sirbidónan di Yehova, speransa.

Pues, dikon nos mester warda ku pasenshi? Pasobra Yehova tambe ta wardando ku pasenshi. E tin un tempu stipulá pa trese fin na e mundu malbado akí, i e ta wardando pa e momento ei yega. (Mat. 24:36) Ora e dia ei yega, lo ta bisto ku tur e akusashonnan ku Diabel a bin kuné kontra Yehova i Su sirbidónan ta falsu. Despues, Yehova lo hasi sigur di kita Satanas i tur ku ta na su banda, pero lo E “mustra miserikòrdia” na nos.

Mientrastantu, Yehova lo no kita tur nos pruebanan. Pero, e ta sigurá nos ku nos por ta felis miéntras nos ta warda. Manera Isaías a bisa, nos por ta felis miéntras nos ta spera pa e bon kosnan pasa. (Isa. 30:​18, nota) a Ban wak kuater kos ku nos por hasi pa haña e felisidat ei miéntras nos ta warda.

KON NOS POR TA FELIS MIÉNTRAS NOS TA WARDA?

Focus riba kosnan positivo. Durante Rei David su bida, el a mira hopi maldat. (Sal. 37:35) Apesar di esei, el a skirbi: “Keda ketu dilanti di Yehova, i warda ku pasenshi riba dje. No kunsumí ku un hende ku ta logra kumpli ku su plannan malisioso.” (Sal. 37:7) David mes a sigui e konseho ei. Kon? El a focus  riba e echo ku Yehova a primintí di salb’é. Pero tambe el a balorá delaster un kos bon ku Yehova a hasi p’e. (Sal. 40:5) Si nos tambe focus riba e kosnan bon den nos bida, i no riba esnan malu so, lo bira mas fásil pa nos warda riba Yehova.

Usa tur oportunidat pa alabá Yehova. E eskritor di Salmo 71, probablemente David, a bisa Yehova: “Ami lo sigui warda riba bo; lo mi alabá bo kada bes mas tantu.” (Sal. 71:14) Kon el a alab’é? El a konta otro hende tokante Yehova i tambe kanta alabansa na dje. (Sal. 71:​16, 23) Nos tambe por imitá David i alabá Dios ora nos ta prediká, ora nos ta papia tokante Yehova ku nos amigu- i famianan i ora nos ta kanta nos kantikanan. P’esei, e siguiente biaha ku bo kanta un di nos kantikanan, presta atenshon na su mensahe animante. Tur esei ta permití nos sigui ta felis miéntras nos ta warda pa Yehova aktua.

Pasa tempu ku bo rumannan. Ora David tabatin problema, el a bisa Yehova: “Den presensia di bo sirbidónan leal, lo mi demostrá ku mi ta konfia den bo nòmber.” (Sal. 52:9) Nos tambe ta haña animashon di nos rumannan si nos ta hasi esfuerso pa pasa tempu ku nan, no solamente na reunion i den sirbishi, sino tambe na kualke otro okashon.—Rom. 1:​11, 12.

Fortalesé bo speransa. Salmo 62:5 ta bisa: “Mi ta warda ku pasenshi riba Dios, pasobra e ta duna mi speransa.” Ta masha importante pa nos speransa ta fuerte foral si e fin no yega mes lihé ku nos a pensa. No ta importá kuantu tempu nos tin ku warda, nos mester ta konvensí ku Yehova lo kumpli ku su promesanan. Nos speransa ta bira mas fuerte ora nos ta studia Beibel. Por ehèmpel, pensa riba e profesianan ku a kumpli, kon henter Beibel ta mará ku otro i e detayenan ku nos ta siña tokante Yehova. (Sal. 1:​2, 3) Ademas, nos mester sigui “hasi orashon” na Yehova i pidié “guia di [su] spiritu santu” pa yuda nos keda ku un bon amistat kuné miéntras nos ta ward’é kumpli ku su promesa di duna nos bida eterno.—Hudas 20, 21.

Meskos ku Rei David, nos mester ta konvensí ku Yehova su bista ta riba esnan ku ta spera riba dje i ku lo e mustra nan Su amor leal. (Sal. 33:​18, 22) Pues, laga nos sigui warda ku pasenshi riba Yehova su dia, focus riba kosnan positivo, alabá Yehova, pasa tempu ku nos rumannan i fortalesé nos balioso speransa.