Me nguaisei a Jehovah expect er kid el mo oba kllourreng el mengiil er a telutk el temel. Ngera uchul me ng expect er kid el meruul er tiang? Ngera sebechel ngosukid el mo dmeu a rengud el mengiil?

NGERA UCHUL ME A JEHOVAH EXPECT ER KID EL MENGIIL?

A Biblia kmo: “A Jehovah oba kllourreng el mengiil el mo meruul a ungil kiriu, ngmo mekiis e ochotii er kemiu a klechubechub. E le Jehovah a Dios er a llemalt. Ngdmeu a rengrir tirke el rokui el kerekikl el mengiil er ngii.” (Isa. 30:​18, NW) Aika el tekingel a Isaia mlora remedecherecher a rengrir el Chijudea. (Isa. 30:​1, NW) Engdi ngmla er ngii a reblak a rengrir el Chijudea el mle teloi er tir, me aika el tekoi a milsterir omelatk. Aika el osisiu el tekoi a mesterir omelatk a reblak a rengrir el mesiungel a Jehovah er chelecha el taem.

Me ngkired loba kllourreng el mengiil e le Jehovah oba kllourreng el mengiil. Ngmla metutk a temel el mo olekngemed er tia el mekngit el blekeradel, me ngmengiil er tia el sils me a sikang. (Mt. 24:36) Ngar tiakid el taem e ngkmal mo bleketakl el kmo a ultelecheklel a Satan el kirel a Jehovah me tirke el mesiou er ngii a diak el klemerang. Seikid e ngmo choridii a Satan me tirke el loltirakl er ngii e mo “ochotii er [kid] a klechubechub.”

Engdi chelecha el dongiil e a Jehovah diak bo lecheroid a ringel el dechebangel engdi ngolterekokl er a rengud el kmo ngsebechel el dmeu a rengud el mengiil. Ngua lolekoi a Isaia, ngsebeched el dmeu a rengud e mengiil er a tekoi el doureng el kirel el mo tmaut. (Isa. 30:​18, NW) Ngmekera debetik er a deurreng? Eua el tekoi a sebechel ngosukid.

ROLEL E NGMO DMEU A RENGUD EL MENGIIL

Em focus aike el positive el tekoi er a klengar er kau. King David a miles a betok el mekngit. (Psa. 37:35) Engdi ngmilluches el kmo: “Bo mchelellakl er medal a RUBAK, e moba kllourreng el mengiil er ngii el mo meruul er a ngerang; lak bekikl el kirir tirkel mo ungil er a loruul ma lechub e tirkel mo ungil el ngar a ikel mekngit el uldesuir.” (Psa. 37:7) A David a uleltirakl aika el tekingel er a loturk osengel er omeltkel er osobel. Ngdirrek  el uleba omereng el saul el kirel a bek el klengeltengat el Jehovah milsang. (Psa. 40:5) A lsekum kede dirrek el mo melatk aike el positive el tekoi er a klengar er kid e diak de focus a mekngit el iliuekl er kid, e ngmo beot er kid a mengiil er a Jehovah.

Bo mechesang loldanges er a Jehovah. Ngike el milluches er a Psalm 71, el locha David a millekoi el kirel a Jehovah el kmo: “Ak mo melemolem el mengiil. Ak mo dochelir a odanges leko er kau.” (Psa. 71:​14, NW) Ngmekera David a bo loldanges er a Jehovah? Ngmo ouchais er a rechad el kirel a Jehovah e mengitakl odanges el mo er ngii. (Psa. 71:​16, 23) Ngua David, ngsebeched el metik er a deurreng el mengiil er a Jehovah. Kede oldanges er ngii loeak a berkel a klumech, cheldechedechad er a bek el sils, me a chelitekled er omengull. Sel next el mongitakl a chelitakl er a Renged, e mkerekikl el melatk a belkul a tekoi er a chelsel me a rolel e ngmeskau a deurreng.

Molai omelisiich er a rudam me a rudos er kau. A David er a lechebangel a ringel e ngdilu er a Jehovah el kmo: “Ngar mederir a reblak a rengrir el chedam e ak mo oba omelatk el kirel a ngklem.” (Psa. 52:​9, NW) Kid me ngdirrek el sebeched el ngmai omelisiich er a rudam me a rudos er kid, el diak di el sel dengar a miting me a odingel, ngdirrek sel dongoit a taem el lobengterir er a ikrel ongdibel me a odingel.—Rom 1:​11, 12.

Msisichii omeltkem. A Psalm 62:5 a kmo: “Ng di tal Dios a le chelellakl a renguk el mengiil er ngii, ele omeltkek a ngar ingii.” A mesisiich el omelatk a kmal klou a ultutelel tokubets a lsekum kede mocha outekangel el lengelakl er a taem el dullatk el kmo ngmei a ulebongel. Ngsebeched el smisichii omeltked loeak a dosuub er a Tekingel a Dios. El ua tiang, ngsebeched el melatk a ulaoch el mla tmaut, rolel a tekoi er a chelsel a diak el kebosech, me a komakai el tekoi el kirel a Jehovah el louchais er kid. (Psa. 1:​2, 3) Ngdirrek el kired el melemolem el ‘meluluuch loeak a Chedaol Reng’ me lolemolem el mesisiich a deleuill er kid me a Jehovah er chelecha el dongiil er otutel a telbilel er a diak a ulebengelel el klengar.—Jud. 20, 21, BT.

Ngua King David, bo lulterekokl a rengum el kmo a Jehovah mengkar er tirke el mengiil er ngii e olecholt er a diak lemengodech el bltikerreng el mo er tir. (Psa. 33:​18, 22, NW) Molemolem loba kllourreng el mengiil er a Jehovah loeak om focus aike el positive el tekoi er a klengar er kau, omoldanges er ngii, omolai omelisiich er a rudam me a rudos er kau, e molemolem el melisiich er a mekreos el omelatk el mobang.