Podiya viri tene Yahova ankufuna kuti tidikhire modekha pa nthawe yake yoyikhiwiratu kuti iye adzakonze vinthu vose. Ko ndawa chani iye ankufuna kuti isepano tichite vimwevi? Ndipo ko ni chani chomwe chingatithandize kuti tipitirize kukhala okondwa pomwe tinkumudikhira?

NDAWA CHANI YAHOVA ANKUFUNA KUTI TIMUDIKHIRE?

Baibolo ilewa kuti: ‘Yahova adikhira modekha kuti akukomereni ntima ndipo adzayimirire kuti akuchitireni chifundo ndawa yakuti Yahova ni Mulungu wa chilungamo. Okondwa ni ose omwe ankumudikhira.’ (Yes. 30:18) Mawu ya mneneri Yesaya mwaya pakuyamba yadanemberewa Ayuda omwe enze osabvera. (Yes. 30:1) Koma pakati pa Ayuda mwawa penze wanthu anango omwe enze okhulupirika ndipo mawu mwaya yadawapasa chidikhiro. Atumiki okhulupirika wa Yahova ntsiku zino, angakhalembo na chidikhiro mwechi akambawerenga mawu ya Yesaya.

Isepano tinkudekana kudikhira modekha ndawa Yahova ankudikhirambo modekha. Iye wakonza kale nthawe kuti adzadzonge dziko yoipa iyi. Iye ankundodikhira ntsiku na nthawe kuti ifike. (Mat. 24:36) Pa ntsiku mweyi, vidzawonekeretu kuti vomwe Satana adalewa vokhudza Yahova na wanthu omwe amutumikira ni vabodza. Ndipomwapa, Yahova adzadzonge Satana pabodzi na ose omwe ali kumbali yake. Koma isepano Yahova ‘adzatichitire chifundo.’

Pomwe tinkudikhira ntsiku mweyi, panango Yahova angamalisiretulini mabvuto yathu. Koma iye ankutitsimikizira kuti tingapitirize kukhala okondwa pomwe tinkumudikhira. Ninge Yesaya, ni vokwanisika kukhala okondwa pa nthawe ibodzibodzi mweyo tinkudikhira chinthu chabwino kuti chichitike. (Yes. 30:18) a Manje ko vimwevi vingakwanisike tani? Naboni tiwone vinthu vinayi vomwe vingatithandize.

MOMWE TINGAKHALIRE OKONDWA POMWE TINKUDIKHIRA

Mbaganizirani vinthu vabwino. Mpfumu Davide idawona vinthu vizinji voipa pa moyo wake. (Sal. 37:35) Podiya venze teno iye adanemba kuti: ‘Khala chete pa maso pa Yahova ndipo mudikhire modekha.  Ayi kukhumudwa na munthu yemwe ankonza chiwembu na kuchikwanirisa palibe chilichose chomukangisa.’ (Sal. 37:7) Davide adatewedza malangizo mwaya na kuganizira vomwe Yahova wenze adamupolomisa kuti adzamupulumuse. Iye wenze wotembeja pa vinthu vose vabwino vomwe Yahova wenze adamuchitira. (Sal. 40:5) Isepano tikachitambo chibodzibodzi nkumbaganizira vinthu vabwino pa moyo wanthu m’malo mwakundoganizra vinthu voipa, vidzakhale vosashupa kumudikhira Yahova.

Pitirizani kutamanda Yahova. Wonemba Salimo 71, yemwe ni Davide adauza Yahova kuti: ‘Koma ine nidzapitirize kukudikhirani na kukutamandani nthawe zose.’ (Sal. 71:14) Ko Davide adamutamanda tani Yahova? Iye nthawe zose ambayankhula va Yahova kwa wanthu anango na kuyimba nyimbo zomutamanda. (Sal. 71:16, 23) Ninge Davide, isembo tingapitirize kukhala okondwa pomwe tinkudikhira Yahova. Isepano tichamutamanda Yahova mu umboni, pa macheza yathu ya ntsiku na ntsiku na kuyimba nyimbo za Ufumu. Manje pomwe mudzayimbe ibodzi mwa nyimbo zathu za Ufumu. Ko tani kudzakhala tcheru na mawu yaliyose ya mu nyimbo na kuganizira momwe yankukondweresera ntima wanu?

Bvumani kulimbikisiwa na abale na alongo. Pomwe Davide adagumana na mabvuto iye adauza Yahova kuti: ‘Pamaso pa okhulupirika wanu nidzadikhire dzina yanu.’ (Sal. 52:9) Tikhala pabodzi na abale na alongo wathu, osati pa misonkhano yokha panango mu umboni komasoti tikhala nawo pa vochitika vinango.—Aro. 1:11, 12.

Limbisani chidikhiro chanu. Lemba ya Salimo 62:5 ilewa kuti: ‘Shuwadi kwa Mulungu yekha, ninkumudikhira modekha ndawa yakuti chidikhiro changu chichokera kwa iye.’ Ni vabwino maninge kulimbisa chidikhiro chathu makamaka peno tinkudikhira mapeto kwa nthawe ikulu. Tichadekana kukhulupirira kuti mapolomisi yose ya Yahova yadzakwanirisike, viribe basa nthawe yomwe takhala tinkudikhira. Isepano tingalimbise chikhulupiriro chathu tikambapfunzira Mawu ya Mulungu, maulosi na momwe mbali iliyose ya m’Baibolo iliri yobverana na inzake na momwe Yahova adafotokozera va makhalidwe yake. (Sal. 1:2, 3) Isepanombo tinkudekana kupitiriza ‘kupemphera mwa mzimu uchena’ kuti tikhale pa ushamwali wolimba na Yahova pomwe tinkudikhira kukwanirisika kwa polomisi yake ya moyo wosapera.—Yuda 20, 21.

Ninge Mpfumu Davide, tichadekana kutsimikiza kuti Yahova asamalira, ateteza, awonesa chikondi chokhulupirirka kwa ose omwe amudikhira. (Sal. 33:18, 22) Manje pitirizani kumudikhira modekha Yahova pakuganizira vinthu vabwino pa moyo wanu, kumulemekeza iye, kubvuma kulimbikisiwa na abale na kulimbisa chidikhiro chanu chabwino.