پر فیر وی یہوواہ ساڈے کولوں ایہہ توقع کردا اے کہ اَسی اوہدے طے کیتے ہوئے وقت دا صبر نال اِنتظار کرئیے جدے چ اوہ کاروائی کرے گا۔ اوہ ساڈے کولوں ایہہ توقع کیوں کردا اے؟ تے اَسی اوس وقت دا اِ نتظار کردے ویلے اپنی خوشی نُوں کیویں قائم رکھ سکنے آں؟‏

یہوواہ ساڈے کولوں ایہہ توقع کیوں کردا اے کہ اَسی اوہدا اِنتظار کرئیے؟‏

بائبل چ لکھیا اے:‏ یہوواہ صبر نال اِنتظار کر رہیا اے کہ کدوں تواڈے تے مہربانی کرے۔ اوہ تواڈے تے رحم کرن لئی اُٹھ کھلوئے گا کیونکہ یہوواہ انصاف دا خدا اے۔ خوش نیں اوہ سارے جیہڑے اوہدے تے امید لائی رکھدے نیں۔ (‏یسعیاہ 30:‏18‏)‏ یسعیاہ دی کتاب چ لکھی ایہہ گل خاص طور تے ڈھیٹھ یہودیاں لئی سی۔ (‏یسعیاہ 30:‏1‏)‏ پر کجھ یہودی یہوواہ دے وفادار سن تے اوہناں نُوں ایس گل توں امید ملی ہوئے گی۔ ایس گل توں اَج وی یہوواہ دے بندیاں نُوں امید مِلدی اے۔‏

ایس لئی سانوں صبر نال اِنتظار کرنا چاہی دا اے کیونکہ یہوواہ وی صبر نال اِنتظار کر رہیا اے۔ اوہنے اِک وقت طے کیتا ہویا اے جدوں اوہ ایس بُری دُنیا نُوں ختم کر دَوے گا تے اوہ اوس دن تے گھنٹے دے آن دا اِنتظار کر رہیا اے۔ (‏متی 24:‏36‏)‏ اوس ویلے ایہہ ثابت ہو جائے گا کہ شیطان نے یہوواہ تے اوہدے بندیاں تے جیہڑے اِلزام لائے نیں، اوہ سارے جھوٹھے نیں۔ فیر یہوواہ شیطان تے اوہدی حمایت کرن والے لوکاں نُوں ختم کر دَوے گا۔ پر اوہ ساڈے تے رحم کرے گا۔‏

اوس ویلے دے آن تک ہو سکدا اے کہ یہوواہ ساڈیاں مشکلاں نُوں ختم نہ کرے۔ پر اوہ سانوں یقین دَواندا اے کہ اَسی اِنتظار کردے ویلے خوش رہ سکنے آں۔ جیویں یسعیاہ دی کتاب چ دَسیا گیا اے کہ اَسی اپنی کسے امید دے پورا ہون دا اِنتظار کردے ویلے خوش رہ سکنے آں۔ (‏یسعیاہ 30:‏18‏)‏ آؤ ایہدے لئی چار طریقیاں تے غور کرئیے۔‏

اَسی اِنتظار کردے ویلے خوش کیویں رہ سکنے آں؟‏

چنگیاں گلاں تے دھیان رکھو۔‏ بادشاہ داؤد نے ساری زندگی اپنے آلے دَوالے بڑی بُرائی ویکھی سی۔ (‏زبور 37:‏35‏)‏ پر فیر وی اوہنے لکھیا:‏ یہوواہ چ مطمئن رہ نالے صبر نال اوہدی آس رکھ۔ اوس آدمی دی وجہ توں پریشان نہ ہو جیہڑا اپنیاں سازشاں وچ کامیاب ہوندا اے۔ (‏زبور 37:‏7‏)‏ داؤد نے آپ وی ایس نصیحت تے عمل کیتا تے اپنی توجہ ایس امید تے رکھی کہ یہوواہ اوہنوں نجات دَوائے گا۔ اوہنے اوہناں برکتاں تے وی  غور کیتا جیہڑیاں یہوواہ نے اوہنوں دِتیاں سن۔ (‏زبور 40:‏5‏)‏ جے اَسی وی اپنا دھیان اپنے آلے دَوالے ہون والے مسئلیاں دی بجائے اپنی زندگی چ ہون والیاں چنگیاں گلاں تے رکھاں گے تے سانوں یہوواہ دا اِنتظار کرنا اسان لگے گا۔‏

یہوواہ دی وڈیائی کرن چ مصروف رہوو۔‏ لگدا اے کہ زبور 71 داؤد نے لکھیا سی۔ ایہدے چ اوہنے یہوواہ نُوں کہیا:‏ مَیں تیرا اِنتظار کردا رہواں گا، مَیں تیری ہور وی زیادہ وڈیائی کراں گا۔ (‏زبور 71:‏ 14‏)‏ داؤد نے یہوواہ دی وڈیائی کیویں کیتی؟ اوہ دُوجیاں نُوں یہوواہ بارے دَسدا سی تے اوہدی حمد چ گیت گاندا سی۔ (‏زبور 71:‏16،‏ 23‏)‏ داؤد وانگوں اَسی وی یہوواہ دا اِنتظار کردے ویلے اوہدی وڈیائی چ مصروف رہن نال خوش رہ سکنے آں۔ اِنج کرن لئی اَسی مُنادی دا کم کر سکنے آں، دُوجیاں نال یہوواہ بارے گل کر سکنے آں تے گیت گا سکنے آں۔ اگلی وار جدوں تُسی گیت گاؤ گے تے اِنج کردے ویلے اوہدے بولاں تے غور کرنا تے ویکھنا کہ ایہناں توں توانوں کیویں خوشی مِل رہی اے۔‏

اپنے بھین بھراواں توں حوصلہ پاؤ۔‏ جدوں داؤد نُوں مشکلاں دا سامنا ہویا تے اوہنے یہوواہ نُوں کہیا:‏ تیرے وفادار خادماں دی موجودگی چ مَیں تیرے ناں تے امید لاواں گا۔ (‏زبور 52:‏9‏)‏ اَج اَسی وی اپنے بھین بھراواں توں حوصلہ پا سکنے آں۔ اِنج کرن لئی اَسی نہ صرف اوہناں نال عبادتاں تے جمع ہو سکنے آں تے مِل کے مُنادی کر سکنے آں سگوں ہور موقعیاں تے وی اوہناں نال وقت گزار سکنے آں۔—‏رومیوں 1:‏11، 12‏۔‏

اپنی امید نُوں مضبوط کرو۔‏ زبور 62:‏5 چ لکھیا اے:‏ مَیں چپ چاپ خدا دا اِنتظار کرنا واں کیونکہ اوہی میری امید اے۔ اپنی امید نُوں مضبوط کرنا بڑا ضروری اے، خاص کر اوہدوں جدوں خاتمہ اوس ویلے تک نئیں آندا جدوں اَسی سوچیا سی۔ سانوں پورا یقین ہونا چاہی دا اے کہ یہوواہ دے وعدے ضرور پورے ہون گے، فیر بھانویں اوہناں لئی سانوں جِنّاں مرضی اِنتظار کرنا پووے۔ اَسی اپنی امید نُوں مضبوط کرن لئی خدا دا کلام پڑھ سکنے آں، پیشین‌گوئیاں دا مطالعیا کر سکنے آں تے غور کر سکنے آں کہ بائبل چ لکھیاں گلاں آپس چ کیویں جُڑیاں ہوئیاں نیں تے یہوواہ نے ایہدے چ اپنے بارے کیہہ کجھ دَسیا اے۔ (‏زبور 1:‏2، 3‏)‏ ایہدے علاوہ سانوں پاک روح دی رہنمائی نال دُعا کرن دی لوڑ اے تاکہ جدوں تک ہمیشاں دی زندگی دا وعدہ پورا نئیں ہوندا، اَسی یہوواہ نال اپنے رشتے نُوں مضبوط رکھ سکئے۔—‏یہوداہ 20، 21‏۔‏

بادشاہ داؤد وانگوں ایس گل دا یقین رکھو کہ جیہڑے لوک یہوواہ دا اِنتظار کردے نیں، اوہ اوہناں دا دھیان رکھدا اے تے اوہناں لئی اپنا اَٹل پیار ظاہر کردا اے۔ (‏زبور 33:‏18،‏ 22‏)‏ صبر نال یہوواہ دا اِنتظار کرن لئی اپنی زندگی چ ہون والیاں چنگیاں چیزاں تے دھیان رکھو، اوہدی وڈیائی کرن چ مصروف رہوو، اپنے بھین بھراواں کولوں حوصلہ پاؤ تے اپنی امید نُوں مضبوط رکھو۔‏