Pero Jehová ixunba iga tanan̈joʼguiñ jesɨk jeʼ iwatpa jempɨk ijɨɨsneʼ. ¿Tyiʼiga ixunba iga tan̈wadyiñ jeempɨk? Y ¿tyi tayooxpaʼtpa iga seguido tamaymayaiñ iganam sɨʼ tanan̈joʼk?

TYIʼIGA IXUNBA JEHOVÁ IGA TANAN̈JOʼGUIÑ

Jeʼm Biblia nɨmpa: «Jehová ichokoyan̈joʼkpa iga miyooxpaʼttaʼmpa, y tsukumpa iga mikwiñkejaytyaʼmpa iyaʼachan̈jamoʼoyi. Jeʼ tuum Dios de justicia. Tsaam maymayyaj ityumpɨy jempɨk sɨʼ in̈joʼkyaj en Jehová» (Is. 30:18). Isaías iñɨʼmay yɨʼpyaj an̈matyiyaj jeʼm judíojyaj dyapɨk kupɨgoyyajpa (Is. 30:1). Pero peʼm tiempo itytyim idyɨk jempɨk kupɨgoyyajpa. Yɨʼpyaj an̈matyiyaj tsaam ianmajan̈chiʼiyaj y taɨchtyam wɨaptyim tayooxpaʼttaʼm.

Jesɨk, ¿tyiʼiga tanchokoyan̈joʼktaʼmiñ? Iga Jehová sɨʼtyim ichokoyan̈joʼk. Jeʼ iniityum jeʼm jaama y jeʼm hora iga iktogoyba jempɨk imalwatyajpa y sɨʼ in̈joʼk jesɨk iwatpa yɨʼɨmpɨk (Mat. 24:36). Jesɨk nuʼkpa yɨʼp jaama, wiñkejpa iga ityumpɨy jempɨk jeʼm Wookkɨʼɨwiñ nɨmneʼ de Jehová y jeʼm iyooxakɨʼɨwiñyaj, naʼps mɨgoʼoyi. Iktogoyba jeʼm Wookkɨʼɨwiñ y ityumpɨy jempɨk ityun̈ɨyyajpa. Pero jeʼm iyooxakɨʼɨwiñyaj ikwiñkejaʼyba «iyaʼachan̈jamoʼoyi».

Iganam tanan̈joʼktaʼmpa, Jehová dyaʼ iktogoyba ityumpɨy tanyaʼachaaji. Pero tanɨʼmayñeʼ iga wɨap tammaymaya. Y juʼuts nɨm Isaías wɨap tammaymaya iganam sɨʼ tanan̈joʼk iga kupaguiñ jempɨk tanan̈joʼkneʼ (Is. 30:18). a ¿Tyi tayooxpaʼtpa? Tanaʼmiñ maktasteen jɨɨxiyaj.

TYI TAYOOXPAʼTPA TAMMAYMAYA IGANAM SƗʼ TANAN̈JOʼK

Tanteguedaiñ jeʼm wɨtampɨk cosa. Jeʼm rey David iaʼm jaʼyan̈ malwadoʼoyi jeʼm iityijom (Sal. 37:35). Pero jeʼ ijaykunuʼk: «Odoy tyi nɨɨmɨ Jehová iwiñjom y an̈joʼokɨ kun maymayaaji. Odoy joʼykaʼɨʼ iga jeʼm pɨɨxiñ iwɨpudaʼyba jeʼm imalojpɨk jɨɨxi»  (Sal. 37:7). David ikupɨktyim yɨʼp an̈kiʼmayoʼoyi. ¿Juutypɨk? Ijɨɨskupak iga Jehová ijɨykamayñeʼ idyɨk iga ikɨakputpa. Y ichoowaixtyim juutypɨk Dios sɨʼ idyɨk iwɨwaday (Sal. 40:5). Siiga taɨchtyam tanguedaap jeʼm wɨtampɨk cosa y dyaʼ jempɨk malojyaj, maaj dyaʼ tan̈kaʼ tanan̈joʼk iga Jehová ikkupaguiñ jempɨk ijɨɨsneʼ.

Tampɨguiñ juʼptyin̈kej oportunidad iga tan̈kujiʼppa Jehová. Jempɨk ijay jeʼm Salmo 71, y wɨapsɨ iga David, iñɨʼmay Jehová: «Ɨch seguido anan̈joʼkpa; majnam man̈kujiʼppa» (Sal. 71:14). ¿Juutypɨk ikujiʼp? In̈maday tun̈gakyaj de Jehová y iwa’naʼyba idyɨk (Sal. 71:​16, 23). Taɨchtyam wɨap tan̈watkiʼpstaʼm David y wɨap tan̈kujiʼp Dios jesɨk tanan̈matpa jeʼm In̈maatyi, jesɨk tanamuruyajpa jeʼm tanamigojyaj y tanfamiliaryaj, y jesɨk tawantaʼmpa. Jeʼyukmɨ jesɨk in̈wanba tuum waañi, aʼmɨ tyi min̈kejaʼyba. Ityumpɨy yɨʼp tayooxpaʼtpa iga tamaymayaiñ iganam sɨʼ tanan̈joʼk iga Jehová ikkupaguiñ jempɨk ijɨɨsneʼ.

Tanan̈pɨʼchiñ jeʼm tantɨwɨtam. Jesɨgam David iñaskaʼ yaʼachaajiyaj, iñɨʼmay Jehová: «Jeʼm mikupɨkyajpaʼap iwiñjom manan̈joʼkpa mimich» (Sal. 52:9). Juʼutstyim David iga in̈pɨʼts jempɨk ikuyooxayajpa Jehová y wɨa mu ianmajan̈chiʼitya, taɨchtyam wɨaptyim tanan̈pɨʼts jeʼm tantɨwɨtam jeʼm an̈tuʼumaajijom, jeʼm an̈matkuyjom y tun̈gaknam an̈eymɨyaj (Rom. 1:​11, 12).

Tampɨɨmchiʼiñ jeʼm tanan̈jogoʼoyi. Salmo 62:5 nɨmpa: «Anan̈joʼkpa Dios y dyaʼ tyi anɨmpa iga jeʼam jempɨk ayooxpaʼtpa». Tsaam importante iga tan̈wɨkupɨguiñ jempɨk sɨʼ tanan̈joʼk, maaj siiga tanjaampa iga jeʼm aktogoyoʼoyi chokoyaneum. Dyaʼ tyi ijoo juʼtsan̈nam tanan̈joʼkpa, tan̈wɨkupɨguiñ iga Jehová ikkupakpa jempɨk ijɨykamneʼ. ¿Y juutypɨk tampɨɨmchiʼiba tanan̈jogoʼoyi? Tan̈kuyujkaiñ jeʼm Dios In̈maatyi, tanaʼmiñ juutypɨk iniityyaj tumtyi jɨɨxi jeʼm jɨychagoʼoyiyaj y tyityam tan̈kejaʼyba de Jehová (Sal. 1:​2, 3). Seguido tanan̈wejpaʼdyiñ Jehová y tan̈waʼgaʼyiñ jeʼm iespíritu santo iga tayooxpaʼdyiñ y odoy tampatstogoʼyiñ jeʼm tan̈wɨnanɨgoʼoyi kun jeʼ, iganam ikkupakpa jempɨk sɨʼ tanan̈joʼk: jeʼm ityi dyapɨk kuyajpa (Jud. 20, 21).

Juʼutstyim jeʼm rey David, wɨap tan̈kupɨk iga Jehová tsaam ityeguet jempɨk sɨʼ in̈joʼkyaj iga ikkupaguiñ jempɨk ijɨɨsneʼ y jeʼ ikwiñkejaʼyba jeʼm ityoyoʼoyi kukaʼpsnewɨʼɨp (Sal. 33:​18, 22). Jeʼyukmɨ iga seguido tamaymayaneiñ iganam sɨʼ tanan̈joʼk jesɨk Jehová ikkupakpa jempɨk ijɨɨsneʼ, tanteguedaiñ jeʼm wɨtampɨk cosa, tan̈kujiʼbiñ Dios, tanan̈pɨʼchiñ jeʼm tantɨwɨtam y tampɨɨmchiʼiñ jeʼm tanan̈jogoʼoyi.