Ahpw Siohwa ketin kasik me kitail en awiawihete ih ni kanengamah pwehn ketin mwekid ni ahnsou me e kupwurki. Dahme kahrehda e ketin kasik me kitail en awih? Dahme kak sewese kitail en ahneki peren ni atail awiawih?

DAHME KAHREHDA SIOHWA KETIN KASIK ME KITAIL EN AWIH?

Paipel mahsanih: “Siohwa kin ketin awiawih ni kanengamah pwehn ketin kasalehiong kumwail kupwuramwahu, oh e pahn ketida pwehn ketin kasalehiong kumwail kadek kalahngan. Pwe Siohwa iei Koht en pwung pahrek. Meid peren irail koaros me kin awiawihete ih.” (Ais. 30:​18, NW) Dahme Aiseia koasoia kin uhdahn dokedoke mehn Suhs kahngohdi kan. (Ais. 30:1) Ahpw mie ekei me kin lelepek nanpwungen mehn Suhs ko, oh mahsen pwukat kihong irail koapworopwor. Mahsen pwukat kin pil kihong sapwellimen Siohwa ladu lelepek kan rahnwet koapworopwor.

Eri kitail anahne awih ni kanengamah pwehki Siohwa kin ketin awiawihete ni kanengamah. Mie ahnsou ehu me e ketin koasoanedier en ketin kasohrehla koasoandi en sampah wet, oh e kin ketin awiawih rahno oh awao en leledo. (Mad. 24:36) Ni ahnsowo, e pahn uhdahn sansalda me dahme Tepilo karaunehki Siohwa oh irail kan me kin papah Ih likamw. Siohwa eri pahn ketin kasohrehla Sehdan oh koaros me kin uhki ih, ahpw E pahn ketin “kasalehiong [kitail] kupwuramwahu.”

Ni ahnsou wet, Siohwa ele sohte kin ketikihsang atail kahpwal kan, ahpw e ketin kamehlelehiong kitail me kitail kak ahneki peren ni atail awiawih. Nin duwen me Aiseia kasalehda, kitail kak ahneki peren ni atail kasikasik de koapworopworki me soahng mwahu kan en wiawi. (Ais. 30:18) a Ia duwen atail kak ahneki soangen pereno? Mie soahng pahieu me kak sewese kitail.

IA DUWEN ATAIL KAK PEREN NI ATAIL AWIAWIH

Medemedewe soahng mwahu kan me kin wiewiawi nan omw mour. Erein eh mour, Nanmwarki Depit kin kilang soahng suwed tohto. (Mel. 37:35) Ahpw e ntingihedi: “Kanengamahiong oh awiawih dahme KAUN-O pahn ketin wia; ke dehr pwunodki paiamwahulahn meteikan de pil irail me kin pweida nan ar koasoandi suwed kan.” (Mel. 37:7) Depit kapwaiada  kaweid wet sang ni eh kin medemedewehte sapwellimen Siohwa inou kan en sewese ih. E pil kin kalahnganki soahng mwahu koaros me Siohwa ketin wiahiong ih. (Mel. 40:5) Ma kitail pil kin medemedewehte soahng mwahu nan atail mour oh dehr medewe duwen atail kahpwal kan, e pahn mengei ong kitail en awiawihete Siohwa.

Kapinga Siohwa ni ahnsou sohte lipilipil. Sounnting en Melkahka 71, Depit, patohwanohng Siohwa: “I pahn kin awiawih komwi; I pahn kalaudehla kapingpomwi.” (Mel. 71:​14, NW) Ia duwen eh pahn kapinga Siohwa? E pahn padahkihong meteikan duwen Siohwa oh koulki koul en kaping ong ih. (Mel. 71:​16, 23) Duwehte Depit, kitail kak ahneki peren nindoken atail awiawih Siohwa. Kitail kin kapinga ih ni atail kalohk ong meteikan, koasoiaiong kompoakepatail oh atail peneinei kan duwen ih, oh koulki atail koul en sarawi kan. Ni omw pahn koulki ehu atail koul en sarawi, ke sou medemedewe mwahu lokaia ko oh ia duwen eh kaperenihukada.

Ale mehn kangoang sang riomw Kristian kan. Ni Depit eh lelohng kahpwal, e patohwanohng Siohwa: “Mwohn sapwellimomwi aramas loalopwoat kan, I pahn koapworopworki mwaromwi pwe ih met me mwahu.” (Mel. 52:​9, NW) Kitail pil kak ale mehn kangoang sang riatail kan, kaidehn sang ni atail iangete irail mihting oh kalohk ahpw pil sang ni atail kin patehng irail.—Rom 1:​11, 12.

Kakehlakahda atail koapworopwor. Melkahka 62:5 (NW) mahsanih: “I kin nennenla awiawih Koht pwehki ei koapworopwor kin pwilisang reh.” E uhdahn kesempwal en ahneki koapworopwor kehlail, ahpw mehlel ma imwio sohte leledo mwadang nin duwen me kitail kasik. Kitail en uhdahn kamehlele me sapwellimen Siohwa inou kan pahn uhdahn pweida sohte lipilipil ia uwen werei me kitail awihki. Kitail kak kakehlakahla atail koapworopwor sang ni atail kin onopki Mahsen en Koht. Karasepe, medewehla soahng kan koaros me Paipel kohpada me pweidahr, ia duwen dahme sounnting en Paipel kan ntingihedi ar pwungpene mendahki sounnting ko wekpeseng, oh duwen Siohwa eh ketin kasalehda ni oaritik duwen pein ih. (Mel. 1:​2, 3) Oh kitail pil anahne pousehlahte ‘kapakap ni ahl me sapwellimen Koht manaman kin kaweidkin kitail’ pwehn ahnekihte nanpwungmwahu rehn Siohwa ni atail awiawih sapwellime inou en mour soutuk en pweida.—Sud 20, 21.

Duwehte Nanmwarki Depit, kitail kak likih me Siohwa kin ketin tetehk irail kan me kin awiawihete Ih oh kin ketin kasalehiong irail sapwellime limpoak poatopoat. (Mel. 33:​18, 22) Eri, kitail en awiawihete Siohwa ni kanengamah sang ni atail kin medemedewe soahng mwahu kan me kin wiawi nan atail mour, kapinga ih, ale mehn kangoang sang riatail Kristian kan, oh kangkakehlailih atail koapworopwor kesempwal.