Jehovaqa ninña maykʼajchus kay sajra mundota tukuchinanta, munantaj chayta pacienciawan suyakunanchejta. ¿Imaraykutaj chayta ruwananchejta munan? Chanta, ¿imataj yanapawasunman suyakushaspa kusisqallapuni kanapaj?

¿IMARAYKUTAJ JEHOVÁ MUNAN SUYAKUNANCHEJTA?

Bibliaqa kayta nin: “Jehová Diostajrí pacienciawan suyakushan qankunawan kʼacha kananpaj, sayarenqataj khuyakusunaykichejpaj. Jehová Diosqa justiciata ruwaj Diosmin. Kusisqamin kanku paypi mayta suyakojkunaqa”, nispa (Isa. 30:18). Isaiasqa chayta nerqa kʼullukoj chayri terco judiosman (Isa. 30:1). Chaywanpis chay tiempopeqa kallarqataj Diosta kasukoj judíos. Chay nisqantaj kasukoj judiosman uj sumaj suyakuyta qorqa, noqanchejmanpis sumaj suyakuyllatataj qowanchej.

Chanta, ¿imaraykutaj pacienciawan suyakunanchej tiyan? Jehovapis pacienciallawantaj suyakushasqanrayku. Payqa ninña ima diachus, ima horachus kay mundota tukuchinanta, chay día chayamunallantañataj suyashan (Mat. 24:36). Chay día chayamojtintaj, Diablo imatachus Jehovaj contranta, kamachisninpa contrantapis nisqan llulla kasqan sutʼita yachakonqa. Diostaj Satanastawan, payman sayasqa kajkunatawan qʼalata chinkarparichenqa. Pero kamachisnintaqa ‘khuyakunanta nin’.

Chay pʼunchayta suyananchejkamataj, ichapis Jehovaqa mana tukuy problemasninchejtachu chinkachenqa. Chaywanpis niwanchej kusisqa kayta atisqanchejta. Isaías nerqa jina chay sumaj imasta mayta suyakushaspaqa, kusisqa kayta atinchej (Isa. 30:18). ¿Imatá ruwasunman kusisqa kanapaj? Tawamanta parlarina.

¿IMAYNATÁ KUSISQA KAYTA ATISUNMAN SUYAKUSHASPA?

Kausayninchejpi ima allin imaschus kasqanpi piensarina. Rey Davidqa kausashaspa, ashkha sajra imasta rikorqa (Sal. 37:35). Jinapis kayta nerqa: “Jehová Diospa ñaupaqenpi chʼinlla kakuy, pacienciawan suyakuy. Ama sajra runapaj phiñakuychu sajra imasta wakichisqanpi allin rejtinpis”, nispa (Sal. 37:7). Payqa chay yuyaychasqanman jinapuni ruwarqa. ¿Imaynamanta? Yuyaynenqa astawan kasharqa Jehová payta salvananta nisqanpi.  Chantapis ima bendicionestachus Dios payman qosqanmanta mayta agradecekorqa (Sal. 40:5). Sichus noqanchejpis kausayninchejpi ima allin imaschus kasqanpi piensarisun, manataj sajra imaspichu chayqa, Jehovapi suyakuyta atillasun.

Maypi kashaspapis Jehovata jatunchanapuni. 71 Salmotaqa ichapis David qhelqarqa, paytaj Jehovaman nerqa: “Noqarí qanpi suyakullasajpuni, astawantaj yupaychasqayki”, nispa (Sal. 71:14). ¿Imatá pay ruwaj Jehovata yupaychananpaj, nisunman jatunchananpaj? Jehovamanta wajkunaman parlarej, takiykunatataj takiripoj (Sal. 71:16, 23). Noqanchejpis David jina Diosta jatunchasunman predicaspa, chantá Jehovamanta amigosninchejman, familiaresninchejman willarispa, takiykunasninchejtataj takirispa. Chayrayku uj takiyta takirishaspa, piensarina imatachus chay takiy nishasqanpi, imaynatachus kallpachawasqanchejpipis. Tukuy chaytaj yanapawasun Jehovata suyakushaspa kusisqallapuni kanapaj.

Hermanosninchejwan karikunapaj tiempochakuna. Davidqa problemasniyoj kashaspa Jehovaman nerqa: “Sutiyki may atiyniyoj kasqanpi atienekusaj, qanta kasukojkunaj rikunankuta”, nispa (Sal. 52:9). Davidqa Jehovata yupaychajkunawan khuska kayta munarqa, ajinamantataj kallpachasqa karqa. Noqanchejpis hermanosninchejwan karikusunman reunionespi, predicacionpi, waj kutispipis (Rom. 1:11, 12).

Suyakuyninchejta sinchʼiyachina. Salmo 62:5 nin: “Noqaqa chʼinlla suyakushani Dios libranawanta, imaraykuchus tukuy ima suyakusqayqa paymanta jamun”, nispa. Suyakuyninchejqa may sinchʼipuni kanan tiyan, astawanraj tukukuy pʼunchay yuyasqanchejman jina niraj chayamushanchu chayqa. Mashkha unayta suyakunanchej kajtinpis, mana iskayrayananchejchu tiyan Jehovaj nisqasnin juntʼakunanmanta. Chanta, ¿imatá ruwasunman chay suyakuyninchejta astawan sinchʼiyachinapaj? Diospa Palabranta estudiana. Piensarisunman profeciasninpi, nisqasnin mana churanakusqanpi, imastachus Jehovamanta yachachiwasqanchejpipis (Sal. 1:2, 3). Chantapis Jehovamanta espíritu santonta mañakunallapuni paymanta manapuni karunchakunapaj, wiñay kausayta qonawanchejta nisqanta juntʼanankama (Jud. 20, 21).

Rey David jina, mana iskayrayanachu Jehovaqa paypi suyakojkunata cuidasqanmanta, munakusqanmantataj (Sal. 33:18, 22). Chayrayku Jehovapi pacienciawan suyakushaspa kusisqallapuni kanapajqa, kausayninchejpi ima allin imaschus kasqanpi piensarina, payta jatunchana, hermanosninchejwan kanapaj tiempochakuna, suyakuyninchejtataj sinchʼiyachina.