Are kʼu ri Jehová kraj che kkʼojiʼ qapaciencia y kqeyeʼj che kopan ri qʼij che ri areʼ kutzʼaqatisaj ri utzujum. ¿Jasche kraj ri Jehová che kkʼojiʼ qapaciencia? Y ¿jas kojtoʼwik rech amaqʼel kojkikotik are chiʼ kojeyenik?

¿JASCHE KRAJ RI JEHOVÁ CHE KOJEYENIK?

Chqilaʼ che ri Biblia kubʼij wariʼ: «Ri Ajawaxel kixreyej, che utoqʼobʼisaxik iwach; ri areʼ sibʼalaj kurayij kukʼut ri uloqʼoqʼebʼal kʼuʼx chiwe, are kʼu ri Ajawaxel are jun Dios aj sukʼil. ¡Utz kech konojel ri keʼeyen che!» (Is. 30:18). Ri Isaías xubʼij ri e tzij riʼ chke ri itzel taq judíos che xeniman taj (Is. 30:1). Are kʼu pa ri tiempo riʼ xuqujeʼ e kʼo judíos che xeʼux sukʼ che ri Dios. Ri xubʼij ri Isaías xuya keyebʼal ri judíos xuqujeʼ kuya qeyebʼal oj kimik.

Rumal laʼ, ¿jasche rajawaxik kojeyeʼn rukʼ paciencia? Rumal che ri Jehová xuqujeʼ tajin keyeʼn rukʼ paciencia. Ri areʼ retaʼm chi ri qʼij y ri hora che kusachisaj ri kʼaxkʼolil pa ri uwach Ulew y reyem che kopan wajun tiempo riʼ (Mat. 24:36). Are chiʼ kopan ri qʼij, qas kqʼalajin na ronojel ri molom taq tzij che ubʼim ri Satanás chrij ri Jehová y chkij ri upatanelabʼ. Tekʼuriʼ kusachisaj na uwach ri Satanás y konojel ri keniman che. Are kʼu kutoqʼobʼisaj na kiwach ri upatanelabʼ.

Are chiʼ tajin kojeyenik, weneʼ ri Jehová kresaj ta ri kʼax che tajin kqakʼulmaj. Are kʼu kubʼij chqe che kojkunik kojkikotik. Junam rukʼ ri xubʼij ri Isaías, kojkunik kojkikotik are chiʼ tajin kqeyeʼj che kbʼantaj ri sibʼalaj kqarayij (Is. 30:18). a ¿Jas kqabʼano rech kojkikotik? Chqilaʼ kajibʼ jastaq che kojutoʼo.

¿JAS KQABʼANO RECH KOJKIKOTIK ARE CHIʼ TAJIN KOJEYENIK?

Chojchoman chrij ri utzilal che kqariqo. Ri qʼatal tzij David pa kʼi taq junabʼ xril kʼi kʼax (Sal. 37:35). Are kʼu, xutzʼibʼaj wariʼ: «Mel jun tzij pa chiʼ chuwach ri Ajawaxel; chaweyej rukʼ kochʼonik kʼa katutoʼ na. Mape awoyowal che ri kuriq  utzil pa ri ukʼaslemal, xuqujeʼ ri kuchomaj kibʼanik etzelal» (Sal. 37:7). Ri David xubʼan pa ri ukʼaslemal ri xutzʼibʼaj. ¿Jas xubʼan che ubʼanik? Are xchoman chrij ri ubʼim ri Jehová che kchajix na rumal. Xuqujeʼ xchoman chrij ronojel ri ubʼanom ri Dios che utoʼik (Sal. 40:5). We kqabʼan qe ri xubʼan ri David y are kojchoman chrij ri utz taq jastaq che kʼo chqanaqaj y are ta ri kʼaxkʼolil, kʼax ta kqabʼan riʼ che reyexik ri utzujum ri Jehová.

Chqabʼanaʼ ronojel ri kojkun che ubʼanik che uyaʼik uqʼij ri Jehová. Ri xtzʼibʼan ri Salmo 71, che weneʼ are ri David, xubʼij wariʼ che ri Jehová: «Are kʼu ri in kineyen pa ronojel joqʼotaj, xa kʼu sibʼalaj kintaqej na qʼijilaxik la» (Sal. 71:14). ¿Jas xubʼan ri David che uqʼijilaxik ri Jehová? Xutzijoj chke nikʼaj chik chrij ri Jehová y xbʼixon che (Sal. 71:16, 23). Oj xuqujeʼ kojkunik kqesaj uwach ri David y kqaya uqʼij ri Jehová, are chiʼ kqatzijoj ri utzij chke ri qamigos y ri qafamilia xuqujeʼ are chiʼ kojbʼixon che. Rumal laʼ, are chiʼ kabʼixoj jun bʼix pa ri Ja rech Ajawbʼal, chatchoman chrij ri kubʼij ri letra. Ronojel wariʼ kojutoʼo rech kojkikotik y kqeyeʼj che ri Jehová kubʼan ri utzujum.

Chqaqʼaxej tiempo kukʼ ri qachalal. Are chiʼ ri David xqʼax pa taq kʼax, xubʼij wariʼ che ri Jehová: «Kineyen che la chkiwach ri e jik ukʼ la, rumal rech chi lal utz» (Sal. 52:9). Junam rukʼ ri xubʼan ri David che xutzukuj ri kitobʼanik ri nikʼaj chik, oj xuqujeʼ kojkunik kqatzukuj tobʼanik kukʼ ri qachalal are chiʼ kojkʼojiʼ kukʼ pa ri riqbʼal ibʼ, are chiʼ kqatzijoj ri utzij ri Dios o pa jun chi lugar (Rom. 1:11, 12).

Chqakowirisaj ri qeyebʼal. Salmo 62:5 kubʼij: «Xuwi rukʼ ri Dios kinriq wi jamaril; ri kulbʼal nukʼuʼx rukʼ areʼ kpe wi». Rajawaxik che qas kojkojon chrij ri eyebʼal, más na we kbʼeyetaj ri qeyem. Apastaneʼ ri tiempo che kojeyenik, rajawaxik che qas kqakojo che ri Jehová kubʼan na ri utzujum. ¿Jas kqabʼan che reyexik ri qeyebʼal? Kqabʼano are chiʼ kqasikʼij ri Biblia, kojchoman chrij ri profecías y ronojel ri kukʼut chqawach chrij ri Jehová (Sal. 1:2, 3). Xuqujeʼ rajawaxik kqaya ta kan ubʼanik qachʼawem che ri Jehová rech kuya ri ruxlabʼixel chqe, je wariʼ kojkunik kqanimarisaj ri qachilanik rukʼ y kqeyeʼj che kuya na ri kʼaslemal chqe che kʼo ta ukʼisik (Jud. 20, 21).

Junam rukʼ ri David, qas kqakojo che ri Jehová keril ri keyeʼn rukʼ paciencia y keʼuloqʼoqʼej (Sal. 33:18, 22). Rumal laʼ, rech kojkunik kojkikotik are chiʼ kqeyeʼj rukʼ paciencia che ri Jehová kubʼan ri utzujum, are chojchoman chrij ri utzilal che qariqom pa ri qakʼaslemal, chqayaʼ uqʼij ri Dios, chqaqʼaxej tiempo kukʼ ri qachalal y chqakowirisaj más ri qeyebʼal.