Shinapish Jehová Diosca llaquicunata tucuchingacama pacienciahuan shuyachunmi munan. Pero ¿imamantataj Jehová Diosca pacienciata charichun munan? ¿Chai punlla chayangacamaca ima shinataj cushicuihuan shuyai tucunchij?

¿JEHOVÁ DIOSCA IMAMANTATAJ PACIENCIAHUAN SHUYACHUN MUNAN?

Bibliapica: “Mandaj Diosca cancunata llaquingapaj shuyacunmi. Paica cancunata chashna llaquishpaca cꞌuyaj cashcatami ricuchinga. Mandaj Diosca cashcata ruraj Diosmi. Paipi shunguta churajcunaca tucuicunami cushichishca canga” ninmi (Isaías 30:18). Cai shimicunataca Isaiasca mana cazuj judiocunamanmi nirca (Isaías 30:1). Shinapish cai shimicunaca alli cazuj judiocunapish Yaya Diospi shuyashpa catichunmi ayudarca. Cai shimicunaca ñucanchijcunatapishmi ayudai tucun.

¿Ñucanchijcunaca imamantataj pacienciata charina canchij? Jehová Diosca cai Allpapi tucui llaquicunata tucuchingapajca ñami shuj punllata agllashcata charin. Shinapish chai punlla chayangacamami pacienciahuan shuyacun (Mateo 24:36). Diabloca Jehová Diostapish, paita sirvijcunatapish yangamantami juchachishca. Shinapish chai punlla chayajpica Satanás llulla cashcatami tucuicuna ricungacuna. Shinallataj Yaya Diosca Diablotapish, paita apoyajcunatapishmi tucuchinga. Pero Jehová Diosca paita sirvijcunataca llaquishcamantami quishpichinga.

Tal vez Jehová Diosca cunan punllacunapi tucui llaquicunataca mana tucuchingachu. Chashna cashpapish cushillami cai tucunchij. ¿Imamanta? Profeta Isaías nishca shinaca sumaj causai chayangacamami cushicuihuan shuyai tucunchij (Isaías 30:18). a Cushicuihuan shuyashpa catingapaj huaquin yuyaicunata ricushun.

CUSHILLA SHUYANGAPAJCA ¿IMATATAJ RURANA CANCHIJ?

Allicunallapi yuyangapaj esforzarishunchij. Rey Davidca achca llaquicunatami charirca (Salmo 37:35). Shinapish paica Jehová Dios paita ayudanapimi yuyaj carca. Yaya Dios paita ayudashcamantapishmi agradecido carca (Salmo 40:5). Chaimantami paica: “Mandaj Diospaj ñaupajpi upalla cailla. Mandaj Diospi shunguta churashpa shuyailla. Millaita rurajcuna charijyajta ricushpa ama huañuricuichu” nirca (Salmo 37:7). Ñucanchijpish mana allicunapi yuyanapaj randica allicunallapi yuyangapajmi esforzarina canchij.  Chashnami Jehová Dios llaquicunata tucuchingacama pacienciahuan shuyai tucushun.

Jehová Diosta jatunyachingapaj esforzarishunchij. Salmo 71-taca Davidmi escribishca yuyachin. Chaipica: “Ashtahuanpish ñucaca quiquinllatami shuyasha. Ñucaca quiquinta ashtahuan ashtahuan alabacushallami” nircami (Salmo 71:14). Rey Davidca Jehová Diosta alabangapajca Yaya Diosmantami shujtajcunaman huillaj carca, cantocunatapish cantaj carca (Salmo 71:​16, 23). Ñucanchijcunapish Jehová Diosta alabangapajca Davidpaj ejemplotami cati tucunchij. Chaimantami ñucanchij rijsishcacunaman, ñucanchij familiacunamanpish Diosmanta huillanchij, cantocunahuanpish alabanchij. Jehová Diosman cantacushpaca ima cantacushcatami alli intindina canchij. Chashnami Jehová Diosta cushicuihuan shuyai tucushun.

Huauqui panicunahuan cangapaj tiempota surcushunchij. Davidca llaquicunata charishpaca Jehová Diostaca cashnami nirca: “Quiquin agllashcacunapaj ñaupajpi alli cashcamantaca quiquinpaj shutillatamari shuyasha” (Salmo 52:9). Davidca Jehová Diosta sirvijcunahuan cashpami cushilla sintirij carca. Ñucanchijcunapish tandanacuicunapi huauqui panicunahuan cashpami cushilla sintirishun (Romanos 1:​11, 12).

Yaya Diospi shuyashpa catishunchij. Salmo 62:​5-pica: “Ñuca almaca Taita Diosllapimi samarin. Pai yuyailla canaca Taita Diosmantami shamun” ninmi. Huaquinpica Armagedón punlla mana utca chayashcamantami esperanzata charinaca sinchi cai tucun. Pero mashnata shuyana cashpapish Jehová Dios pai nishcacunata pajtachinapimi confiana canchij. ¿Jehová Diospi shuyashpa catingapajca imatataj rurana canchij? Bibliatami estudiana canchij. Estudiacushpaca profeciacuna ima shina pajtarishcata, chꞌican chꞌican runacuna Bibliata quillcashcajpipish chai yuyaillatataj charishcata, Jehová Diosmanta imata yachachishcatapish yuyana canchij (Salmo 1:​2, 3). Shinallataj Jehová Dioshuan alli apanacushpa catingapaj paipaj espíritu santota cuchunmi mañana canchij. Chaitaca Jehová Dios huiñai causaita cungacamami rurashpa catina canchij (Judas 20, 21).

Rey David shinami ñucanchijcunapish Jehová Diospi shuyajcunata mana saquij cashcata, cꞌuyaj cashcatapish seguros cana canchij (Salmo 33:​18, 22). Chaimanta Jehová Dios nishcacuna pajtaringacama allicunallapi yuyangapaj esforzarishunchij. Yaya Diostapish alabashunchij. Huauqui panicunahuan cangapajpish esforzarishunchij. Chashnami cushilla shuyashpa catishun.