Chaywanpas Jehova Diosqa munanmi mana allinkuna chinkachisqa kanan punchawta pacienciawan suyananchikta. ¿Imanasqataq Diosqa munan pacienciawan suyananchikta? ¿Imakuna ruwaytaq yanapawachwan chay punchawta kusisqalla suyanapaq?

¿IMANASQATAQ DIOSQA MUNAN PACIENCIAWAN SUYANANCHIKTA?

Bibliam nin: “Jehova Diosmi ichaqa suyasuchkankichik, mana amispam llakipayasunaykichikpaq suyasuchkankichik. Llakipayasunaykichikpaqmi hatarinqa. Jehova Diosqa allin ruwaqmi, mayna kusisqam kanku paypi suyaqkunaqa”, nispa (Is. 30:18). Chaynatam Isaias nirqa mana uyarikuq judio runakunata (Is. 30:1). Ichaqa karqataqmi Diosta kasukuq judiokunapas. Isaiaspa chayna nisqanta uyarispankuqa paykunaqa kusikurqakuchá. Ñuqanchiktapas Isaiaspa chayna nisqanqa kusichiwanchikmi.

Chaynaqa, ¿imanasqataq pacienciawan suyananchik? Diospas mana allinkuna chinkachinan punchawtam pacienciawan suyachkan. Payqa tantiarunñam haykapi mana allinkunata chinkachiyta. Chaymi paypaqqa chay punchawqa almanaquepi señalasqa hinaña kachkan. Chay punchaw chayamunantam payqa pacienciawan suyachkan (Mat. 24:36). Chay punchaw chayaramuptinmi yachakunqa Diosmanta hinaspa serviqninkunamanta satanaspa rimasqanqa llulla kasqan. Chaymantam satanastawan mana allin runakunata wiñaypaq chinkachinqa. Serviqninkunatam ichaqa ‘llakipayaykunqa’.

Chay punchaw chayamunankamaqa Diosqa manapaschá lliw sasachakuyninchikkunatachu chinkachinqa, chayna kaptinpas niwanchikmi kusisqa suyayta atinamanta. Arí, Isaiaspa nisqanman hinam Jehova Dios tukuy imata allichanan punchawtaqa kusisqa suyayta atichwan (Is. 30:18). Chaypaq ima yanapawananchikmanta yachaykusun.

¿IMAKUNATAM RUWACHWAN KUSISQALLA SUYANAPAQ?

Allinkuna pasawasqanchikpi astawan piensasun. Davidpa tiemponpi runakunaqa mana allinkunallatañam ruwaqku (Sal. 37:35). Chaywanpas kaynatam qillqarqa: “Jehova Diospa qayllanpiqa upallallayá kay, hinaspaykiyá hawkalla suyay. Mana allin runapa mana allin tantiasqan allin karuptinqa amayá piñakuychu”, nispa (Sal. 37:7). Chayna nisqantam kikinpas kasukurqa. ¿Imaynata? Payqa sapa kutim yuyariq tukuy sasachakuyninkunamanta Dios libraykunanta, chaymantapas allinninpaq Diospa tukuy ima ruwasqanmantam agradecekuq (Sal.  40:5). Sichu ñuqanchikpas sasachakuyninchikpi piensananchikmantaqa Dios allinkuna ruwapuwasqanchikpi piensasun, hinaspaqa pacienciawanmi suyasun Diospa piñakuynin punchawta.

Kallpanchakusun sapa kuti Diosta hatunchanapaq. Salmos 71 capitulota qillqaq runam Diosta nirqa: “Ñuqam ichaqa hinalla suyasqayki. Aswan-aswanraqmi hatunchallasqayki”, nispa (Sal. 71:14). Yaqachusmi chay capitulotaqa David qillqarqa. ¿Imaynatam Diosta hatuncharqa? Diosmantam runakunaman willakuq, chaymantapas Diospaqmi takipuq (Sal. 71:​16, 23). Ñuqanchikpas David hinam Jehova Diosta hatunchachwan runamasinchikkunaman, amistadninchikkunaman utaq familianchikman Diosmanta willaspa. Hatunchachwantaqmi takipuspapas. Chaynaqa, Diospaq takispaqa yuyaymanasunyá chay takipa letran ima nisqanpi. Chaykunata ruwaspaqa llapallanchikmi Diosta kusisqalla servisun mana allinkunata chinkachinan punchawkama.

Iñiqmasinchikkunawan kanapaqyá tiempochakusun. Sasachakuypi tarikuspanmi Davidqa Diosta nirqa: “Qanman sunqu kaqkunapa qayllanpim qampa sutikipi hapipakullasaq”, nispa (Sal. 52:9). Davidqa Diosta serviqkunawan kuska kananpaqmi tiempochakurqa, chaynapi kallpanchasqa tarikunanpaq. Chaynam ñuqanchikpas tiempochakunanchik iñiqmasinchikkunawan rimarinapaq, huñunakuypi kaspa, Diosmanta willakuspa utaq ima huñunakuy ruwasqanchikpipas (Rom. 1:​11, 12).

Ama iskayrayanapaq tukuyta ruwasun. Salmos 62:5 nisqanpim nin: “Diostam hawkalla suyallani. Payllapim hapipakullani”, nispa. Prometewasqanchikman hina Dios salvawananchikmantaqa manapunim iskayrayananchikchu, aswanraqmi unamusqanpaq rikchakuwaptinchikqa. ¿Imam chaypaq yanapawasun? Bibliata sumaqta estudiayninchikmi, willakuyninkuna imayna cumplikusqanta sumaqta estudiayninchikmi hinaspa chaykunata estudiaspa Jehova Diosmanta yachayninchikmi (Sal. 1:​2, 3). Yanapawasuntaqmi sapa kuti Diosninchikta mañakuypas. Mañakuchwanmi paywan hinalla kuyachikunapaq atiyninwan yanapawananchikpaq. Chaytam ruwananchik wiñay kawsayta haypanakama (Jud. 20, 21).

Ñuqanchikpas David hinam mana amispa suyachkanchik Dios libraykuwananchikta. Manataqmi iskayrayanchikchu imaña kaptinpas kuyawasqanchikrayku yanapawananchikpaq qawamuwasqanchikmantapas (Sal. 33:​18, 22). Chaynaqa, mana allinkunata Diospa chinkachinan punchawta pacienciawan hinaspa kusisqalla suyanapaqqa allinkunata ruwapuwasqanchikpim astawan piensana, Diostam hatunchana, iñiqmasinchikkunawan kuska kanapaqmi tiempochakuna chaynataq librawananchikmanta mana iskayrayanapaqmi tukuyta ruwana.