Jehová Diosta kusisqa suyakusun
¡MAYTAPUNICHÁ munashanki Jehová Dios lliu mana allinkunata kay pachapi tukuchispa, wajmanta lliuta mosoqman tukuchipunanta! (Apo. 21:1-5). ¡Arí, chaypuni pasanantan munanchis! Ichaqa manan facilchu chayta pacienciawan suyakuyqa. Astawanqa imaymana sasachakuypi tarikuqtinchismi ratu paciencianchis tukukapun. Chaychá Bibliapipas nin: “Sonqoqa anchatan llakikun ima suyakusqaykipas mana usqhaychu junt’akuqtinqa”, nispa (Prov. 13:12).
Chhaynaña kaqtinpas Jehová Diosqa pacienciallawan payta suyakunanchistan munan. ¿Imaraykun chayta munanman? Chaymantapas, ¿iman yanapawasunman kusikuyninchista ama chinkachispa kusisqalla Jehová Diosta suyakunanchispaq? Chaykunamantan kaypi yachasunchis.
¿IMARAYKUN JEHOVÁ DIOS MUNAN PACIENCIAWAN SUYAKUNANCHISTA?
Bibliapin nishan: “Jehová Diosqa pacienciawanmi suyakushan, pacienciakushanmi yanapayninta rikuchinasuykichispaq, jatarispan khuyapayayninta rikuchisunkichis. Jehová Diosqa chanin Diosmi. Paypi suyakuqkunaqa kusisqan kanku”, nispa (Isa. 30:18). Chhaynatan Isaiasqa nirqan mana kasukuq Judío runakunata (Isa. 30:1). Ichaqa karqanmi kasukuq judiokunapas, chayta uyarispaqa maytachá kallpachakurqanku paykunaqa. Chay simikunaqa noqanchistapas kallpachawasunmanmi.
Ichaqa, ¿imaraykutaq pacienciawanri suyakunanchis? Jehová Dios kikinpunin pacienciakushan. Chaywanpas payqa ñan churanña juj p’unchayta juj horatawan lliu mana allinta chinkachinanpaq. Chay p’unchay chay hora chayamunallantañan payqa suyashan (Mat. 24:36). Chay p’unchay chayamuqtinqa allintan yachakunqa imaynas Satanasqa llulla chayta; imaynas Dios contra, kamachinkuna contra rimasqanpas yanqa chayta. Chay p’unchaymi Saqrapas payman llapa sayapakuqkunapas chinkachisqa kanqaku. Kamachinkunatan ichaqa Jehová Diosqa “khuyapayanqa”.
Chay p’unchay chayamunankamaqa manapaschá Jehová Diosqa llapa sasachakuyninchiskunatachu chinkachinqa, chaywanpas atisunmanmi kusisqa kaytaqa. Arí, profeta Isaiaspa nisqan jina, atisunmanmi allin kaqkuna chayamunankama kusisqalla kayta (Isa. 30:18). a ¿Imatan chaypaq ruwananchis? Chaypaq tawa consejokunata qhawarisun.
¿IMATAN RUWANA KUSISQALLA SUYAKUNAPAQ?
Allin kaqkunapi yuyaykusun. Chaypaq rey Davidmanta rimasun, payqa imaymana mana allinkunatan rikurqan (Sal. 37:35). Chhaynaña kaqtinpas Bibliata qelqashaspan nirqan: “Jehová Diospa ñaupanpi ch’inlla kay, pacienciallawan payta suyakuy. Aman phiñakunkichu mana allin runawanqa, aman phiñakunkichu imachus yuyaykusqan allin lloqsiqtinpas”, nispa (Sal. 37:7). David kikinpunin chaypi nisqanman jina ruwarqan. ¿Imaynata? Jehová Diosmi paytaqa nisqa imapiña tarikuqtinpas librananpaq. Chaypin paypa piensayninqa karqan. Chaymantapas anchatan payqa valoraq payrayku Jehová Diospa tukuy ima ruwasqanta (Sal. 40:5). Sichus noqanchispas allinkuna pasawasqanchispi masta piensasun, manataq mana allinkunapichu chayqa facilmi kanqa kusisqalla Diospa p’unchayninta suyakuyqa.
Diosta jatunchasun. Salmos 71 capitulota qelqaqqa yaqachus jina David karqan. Jehová Diostan pay nirqan: “Noqan ichaqa suyakushallasayki, sapa kutinmi astawanraq jatunchasayki”, nispa (Sal. 71:14). ¿Imakunatan ruwarqan Jehová Diosta jatunchananpaq? Paymantan juj runakunaman willaq, sumaq takikunata takispataq payta jatunchaq (Sal. 71:16, 23). Noqanchispas Davidpa ejemplontan qatikunanchis. Runakunaman, amigonchiskunaman, familianchisman iman Diosmanta willananchis; juñunakuykunapi takikunatapas tukuy sonqomantan takinanchis, chaykunata ruwaspan Jehová Diosta jatunchasunchis. Chhaynaqa mayqen juñunakuypipas takikunata takispaqa tukuy yuyaywan uyariy imanishanchus chayta. Chaykunatachus ruwasun chayqa, atisunmi kusisqalla Jehová Diosta suyakuyta.
Kallpachakusun iñiqmasinchiskunawan kuskalla kananchispaq. Imaymana sasachakuykunapi tarikuspan Davidqa Jehová Diosta nirqan: “Serviqniykikunaq ñaupanpin sutiykipi jap’ipakusqayta rikuchisaq”, nispa (Sal. 52:9). Chaypi leesqanchis jina Davidqa Jehová Diosta serviq runakunawan kuskan kayta munarqan, chaymi anchata kallpacharqan paytaqa. Sichus noqanchispas kallpachakusunchis hermanonchiskunawan kuska kananchispaq chayqa kallpachasqan kasunchis (Rom. 1:11, 12).
Kallpachakusun suyakuyninchis fuerte kananpaq. Salmos 62:5 textopin nin: “Noqaqa Diostan ch’inlla suyakusaq, paymantan suyakuyniyqa jamun”, nispa. Noqanchispas Jehová Diosmanta jamuq suyakuyninchistaqa cheqaqpaqpunin jap’inanchis. Mana usqhaylla jamunanpaq jinaña piensasunman chaypas suyakushanallanchismi. Jayk’a wataña suyakunanchis kanman chaypas Diospa promesanqa junt’akunqapunin. Ichaqa, ¿imatan ruwasunman chay suyakusqanchis aswan fuerte kananpaq? Diospa palabrantan allinta estudiananchis, chaypi kaq profeciakunapin piensananchis; imaynatas juj texto juj textokunawan tupan chaykunatan qhawarinanchis, allintan reparananchis imatas Diosmanta yachachishan chaytapas (Sal. 1:2, 3). Chaymantapas tukuy tiempon Jehová Diospa espiritunta mañakunanchis, chay espirituq yanapayninwanmi paywan allin amigontin kasunchis; wiñay kausay suyakusqanchis chayamunankaman allinta paywan kausasunchis (Jud. 20, 21).
Rey Davidqa allintan yacharqan imaynas Jehová Diospa ñawinqa payta suyakuqkunapi kashan chayta, imaynas payqa suyakuqninkunata munakun chaytapas (Sal. 33:18, 22). Pay jinan noqanchispas tukuy sonqo Jehová Diospi confiananchis. Chhaynaqa, tukuy atisqanchista kallpachakusun allin kaqkunapi piensananchispaq, Jehová Diosta alabananchispaq, hermanonchiskunawan kuska kananchispaq, suyakuyninchis fuerte kananpaqpas. Chaykunata ruwasun chayqa pacienciawanmi Jehová Diospa p’unchayninta suyakusun.
a Tukuy sonqo suyakuy nisqaqa makilla qhaway atento kay nillanmantaqmi. Chaykunan rikuchin imaynas librasqa kananchista tukuy sonqo suyakuyqa mana juchachu chayta.
