Noatu ra, te tapapa maira a Iehova kia tiaki tatou iaia no te akatupu i tona akakoroanga. Eaa te tumu i pera ei aia? Eaa te ka tauturu ia tatou kia tapapa ia Iehova ma te mataora?

EAA TE TUMU KA TAPAPA A IEHOVA IA TATOU KIA TIAKI IAIA?

Karanga te Pipiria: “E tapapa rā Iehova, kia takinga-meitaki aia ia kotou, e e tu aia ki runga kia aroa aia ia kotou: e Atua tuatua-tau oki a Iehova: e ao to ratou katoa tei tapapa marie iaia.” (Isa. 30:18) Kua tata a Isaia i teia no te au ngati Iuda mārokiakia. (Isa. 30:1) Inara te vaira tetai aronga tiratiratu i rotopu ia ratou e ka riro teia au tuatua ei akamaroiroi ia ratou. Ka akamaroiroi katoa teia i te au tavini tiratiratu o Iehova i teia tuatau.

No reira kia tapapa marie tatou mei ia Iehova katoa. E tuatau tona no te takore i teia akatereanga e te tapapa ra aia i te reira rā e te ora kia tae mai. (Mata. 24:36) I reira e akapapuia ai e pikikaa ta te Tiaporo akaapa anga ia Iehova e te aronga tavini Iaia. Ka takore Aia ia Satani e te aronga tei turu iaia, inara ka “aroa” a Iehova ia tatou.

I teianei noatu kare a Iehova i takore i to tatou manamanata, te tapapa maira aia kia mataora tatou i te tiaki, mei ta Isaia i akakite. (Isa. 30:18) Akapeea tatou e mataora ai? Akamanako ana e ā tauturu.

TAPAPA MARIE MA TE MATAORA

Akamanako i te au mea meitaki. Kua kite ana te Ariki ko Davida i te au mea kino i tona oraanga. (Sala. 37:35) Noatu ra kua tata aia: “E akatupua ua ia Iehova, ma te tiaki marie atu iaia; aua koe e kinokino i te tangata i manuia’i tona aerenga, i te tangata i akatupu i te akakoroanga kino ra.” (Sala. 37:7) Kua aru a Davida i teia akoanga na te akamanako anga i ta Iehova taputou no te tauturu iaia. E kua akamaara katoa aia i tana au akameitakianga no ko mai ia Iehova. (Sala. 40:5) Me akamanako tatou i te au mea meitaki tei tupu e kare i te au mea kino, ka ngoie ua ia tatou i te tiaki ia Iehova.

E akapaapaa ua rai ia Iehova. Karanga te tata salamo ko Davida ia Salamo 71 no Iehova: “Kare e tukumoe, kia akameitaki rai au ia koe na rungao na rungao.” (Sala.  71:14) Akapeea aia te akapaapaa anga ia Iehova? Ka akakite aere aia no runga ia Iehova e ka akapaapaa Iaia na roto i te imene. (Sala. 71:​16, 23) Mei ia Davida rai, ka mataora tatou me tapapa atu ia Iehova. Ka akapaapaa tatou iaia na roto i te angaanga tutu aere, ta tatou pukapuka anga, e ta tatou imene akamorianga. Me imene akaou tatou i tetai imene Patireia, e akamanako i te karere akamaroiroi i roto i te reira imene.

Ka akamaroiroiia koe e toou au taeake e te au tuaine. Te tupuanga te manamanata kia Davida, kua tuatua aia kia Iehova: “Ka irinaki oki au i toou ra ingoa; e meitaki oki te reira i mua i to aronga tapu ra.” (Sala. 52:9) Ka akamaroiroi katoaia tatou e te au taeake akamori i ko i ta tatou au uipaanga, i roto i te angaanga tutu aere e pera katoa me kapiti tatou ki te au taeake no te tamataora.—Roma 1:​11, 12.

Akamatutu i toou manakonakoanga. Karanga a Salamo 62:5: “E taku vaerua, ko te Atua anake taau e tatari: tei iaia oki toku manako anga.” Ka anoanoia te manakonakoanga ketaketa kia rauka ia tatou i te akakoromaki me kare te openga e tae vave mai. Kia irinaki ua tatou e ka akatupu a Iehova i tana au taputou noatu te roa ia tatou i te tapapa anga i te reira. Ka akamatutu tatou i to tatou manakonakoanga na te apii anga i te Tuatua a te Atua, tana au totou tei akatupuia, te rotai anga o te karere e te au mea ta Iehova i akakite mai nona uaorai. (Sala. 1:​2, 3) Pera katoa, ka anoanoia tatou kia ‘pure ma te vaerua tapu’ kia akono i tetai pirianga meitaki kia Iehova ia tatou e tapapa ra kia akatupuia tana taputou no te ora mutu kore.—Iuda 20, 21.

Mei te Ariki ko Davida, e irinaki tatou e tei runga to Iehova mata i te aronga e tapapa maira Iaia e te aroa ra Aia ia ratou. (Sala. 33:​18, 22) No reira e tapapa marie ia Iehova na te akamanako anga i te au mea meitaki i roto i toou oraanga, te akapaapaa anga iaia, te au tuatua akamaroiroi a toou au taeake e pera te akamatutu anga i toou manakonakoanga.