Сепак, о Јехова очекујнела амендар стрпливо те аџикера ле те керел нешто ко време кова со ов одрединѓа ле. Соске очекујнела амендар адава? Со шај те поможинел амен те ова радосна џикоте аџикераја?

СОСКЕ О ЈЕХОВА ОЧЕКУЈНЕЛА ТЕ АЏИКЕРА?

Ки Библија пишинела: „О Јехова стрпливо ка аџикерел те керел туменге шукарипе хем адалеске ка уштел те сикавел туменге милост. Соске, о Јехова тано праведно Девел. Среќна тане сарине со аџикерена ки лесте“ (Иса. 30:18). О Исаија акала лафија најангле вакерѓа лен е Евреенге кола со на сине послушна хем сине иначие (Иса. 30:1). Ама, машкар о Евреија сине несаве со сине верна хем акала лафија денѓе лен надеж. О иста лафија дена надеж хем е Јеховаскере слуген авдиве.

Значи, амен мора стрпливо те аџикера соске о Јехова да стрпливо аџикерела. Ов одрединѓа точно време кеда ка чхивел крајо акале светоске хем ов стрпливо аџикерела те авел адава диве хем адава саати (Мат. 24:36). Тегани, ка дикхјол јасно кај тано ховајба адава со вакерела о Бенг против о Јехова хем против окола со служинена леске. Тегани, о Јехова ка уништинел е Сатана хем са околен сој тари лескири страна, а аменге ка сикавел милост.

Џи тегани, о Јехова шај нане те цидел са амаре проблемија, ама ов уверинела амен кај амен шај те ова радосна џикоте аџикераја. Сар со вакерѓа о Исаија, амен шај те ова радосна џикоте едвај аџикераја те случинел пе нешто шукар (Иса. 30:18). a Сар шај те овел амен асавки радост? Штар буќа шај те поможинен амен ко адава.

САР ШАЈ ТЕ ОВА РАДОСНА ЏИКОТЕ АЏИКЕРАЈА?

Концентририн тут ко позитивна буќа. О цари о Давид дикхља бут лошнипе ко пло живото (Пс. 37:35). Сепак, ов пишинѓа: „Чутин англо Јехова хем аџикер ле баре желбаја. Ма ов вознемиримо башо мануш кова сој успешно ко пло лошнипе“ (Пс. 37:7). О Давид шунѓа акава совет аѓаар со концентриринѓа пе ко е Јеховаскоро ветување кај ов ка спасинел ле. Исто аѓаар, ов сине благодарно башо са о шукар буќа со о Јехова керѓа леске (Пс. 40:5).  Ако амен да размислинаја кола шукар буќа иси амен ко живото хем на концентриринаја амен ко лошна буќа со случинена пе околу аменде, ка овел аменге полокхо те аџикера ко Јехова.

Користин секоја прилика те фалине е Јехова. О писатели таро 71 Псалм, кова со најверојатно сине о Давид, вакерѓа е Јеховаске: „А ме цело време ка аџикерав хем ка фалинав тут са повише“ (Пс. 71:14). Сар ов фалинѓа е Јехова? Аѓаар со вакерела сине е јаверенге башо Јехова хем аѓаар со гиљавела сине леске фалбе (Пс. 71:16, 23). Исто сар о Давид, амен да шај те ова радосна џикоте аџикераја ко Јехова. Амен фалинаја е Јехова кеда учествујнаја ки служба, кеда кераја лафи баши лесте ко амаре секојдневна разговорија хем кеда гиљаваја амаре гиља. Јавер пути кеда ка гиљаве несави таро амаре гиља, размислин шукар башо тексти хем башо адава сар ов охрабринела тут.

Дружин тут е пхраленцар хем е пхењенцар те шај те ове охрабримо. Кеда о Давид накхља таро пхаре ситуацие ов вакерѓа е Јеховаске: „Ка надинав ман ко тло анав англо окола сој туке верна“ (Пс. 52:9). Амен да шај те ова охрабриме таро амаре пхраља хем пхења на само ко состанокија хем ки служба него хем кеда ка дружина амен ленцар ко јавера прилике (Рим. 1:11, 12).

Бајрар тли надеж. Ко Псалм 62:5 пишинела: „Ме стрпливо аџикерава ко Девел, соске ов дела ман надеж“. Бут тано важно те овел амен зорали надеж, посебно ако повише време аџикераја те авел о крајо. Мора те ова увериме кај е Јеховаскере ветувања ка исполнинен пе бизи разлика кобор време ваљани те аџикера. Шај те кера побари амари надеж, аѓаар со ка проучина е Девлескоро Лафи. На пример, размислин башо пророштвија со исполнинѓе пе, башо адава кобор тани складно и Библија иако пишинѓе ла различна писателија хем башо деталија кола со о Јехова откринѓа баши песте (Пс. 1:2, 3). Исто аѓаар, понадари да ваљани те ачхова паше е Јеховаја хем те молина амен те водинел амен лескири сила џикоте аџикераја те исполнинен пе лескере ветувања башо вечно живото (Јуда 20, 21).

Исто сар о цари о Давид, ов уверимо кај о Јехова грижинела пе околенге со аџикерена ки лесте хем сикавела ленге верно мангипе (Пс. 33:18, 22). Понадари да стрпливо аџикер ко Јехова аѓаар со ка концентририне тут ко позитивна буќа ко тло живото, ка користине секоја прилика те шај те фалине е Јехова, ка дружине тут е пхраленцар хем е пхењенцар те шај те ове охрабримо хем аѓаар со ка бајраре тли скапоцено надеж.