Sepak, o Jehova očekujnela amendar strplivo te adžikera le te kerel nešto ko vreme kova so ov odredingja le. Soske očekujnela amendar adava? So šaj te pomožinel amen te ova radosna džikote adžikeraja?

SOSKE O JEHOVA OČEKUJNELA TE ADŽIKERA?

Ki Biblija pišinela: „O Jehova strplivo ka adžikerel te kerel tumenge šukaripe hem adaleske ka uštel te sikavel tumenge milost. Soske, o Jehova tano pravedno Devel. Srekjna tane sarine so adžikerena ki leste“ (Isa. 30:18). O Isaija akala lafija najangle vakergja len e Evreenge kola so na sine poslušna hem sine inačie (Isa. 30:1). Ama, maškar o Evreija sine nesave so sine verna hem akala lafija dengje len nadež. O ista lafija dena nadež hem e Jehovaskere slugen avdive.

Znači, amen mora strplivo te adžikera soske o Jehova da strplivo adžikerela. Ov odredingja točno vreme keda ka čhivel krajo akale svetoske hem ov strplivo adžikerela te avel adava dive hem adava saati (Mat. 24:36). Tegani, ka dikhjol jasno kaj tano hovajba adava so vakerela o Beng protiv o Jehova hem protiv okola so služinena leske. Tegani, o Jehova ka uništinel e Satana hem sa okolen soj tari leskiri strana, a amenge ka sikavel milost.

Dži tegani, o Jehova šaj nane te cidel sa amare problemija, ama ov uverinela amen kaj amen šaj te ova radosna džikote adžikeraja. Sar so vakergja o Isaija, amen šaj te ova radosna džikote edvaj adžikeraja te slučinel pe nešto šukar (Isa. 30:18). a Sar šaj te ovel amen asavki radost? Štar bukja šaj te pomožinen amen ko adava.

SAR ŠAJ TE OVA RADOSNA DŽIKOTE ADŽIKERAJA?

Koncentririn tut ko pozitivna bukja. O cari o David dikhlja but lošnipe ko plo životo (Ps. 37:35). Sepak, ov pišingja: „Čutin anglo Jehova hem adžiker le bare želbaja. Ma ov voznemirimo bašo manuš kova soj uspešno ko plo lošnipe“ (Ps. 37:7). O David šungja akava sovet agjaar so koncentriringja pe ko e Jehovaskoro vetuvanje kaj ov ka spasinel le. Isto agjaar, ov sine blagodarno bašo sa o šukar bukja so o Jehova kergja leske (Ps. 40:5).  Ako amen da razmislinaja kola šukar bukja isi amen ko životo hem na koncentririnaja amen ko lošna bukja so slučinena pe okolu amende, ka ovel amenge polokho te adžikera ko Jehova.

Koristin sekoja prilika te faline e Jehova. O pisateli taro 71 Psalm, kova so najverojatno sine o David, vakergja e Jehovaske: „A me celo vreme ka adžikerav hem ka falinav tut sa poviše“ (Ps. 71:14). Sar ov falingja e Jehova? Agjaar so vakerela sine e javerenge bašo Jehova hem agjaar so giljavela sine leske falbe (Ps. 71:16, 23). Isto sar o David, amen da šaj te ova radosna džikote adžikeraja ko Jehova. Amen falinaja e Jehova keda učestvujnaja ki služba, keda keraja lafi baši leste ko amare sekojdnevna razgovorija hem keda giljavaja amare gilja. Javer puti keda ka giljave nesavi taro amare gilja, razmislin šukar bašo teksti hem bašo adava sar ov ohrabrinela tut.

Družin tut e phralencar hem e phenjencar te šaj te ove ohrabrimo. Keda o David nakhlja taro phare situacie ov vakergja e Jehovaske: „Ka nadinav man ko tlo anav anglo okola soj tuke verna“ (Ps. 52:9). Amen da šaj te ova ohrabrime taro amare phralja hem phenja na samo ko sostanokija hem ki služba nego hem keda ka družina amen lencar ko javera prilike (Rim. 1:11, 12).

Bajrar tli nadež. Ko Psalm 62:5 pišinela: „Me strplivo adžikerava ko Devel, soske ov dela man nadež“. But tano važno te ovel amen zorali nadež, posebno ako poviše vreme adžikeraja te avel o krajo. Mora te ova uverime kaj e Jehovaskere vetuvanja ka ispolninen pe bizi razlika kobor vreme valjani te adžikera. Šaj te kera pobari amari nadež, agjaar so ka proučina e Devleskoro Lafi. Na primer, razmislin bašo proroštvija so ispolningje pe, bašo adava kobor tani skladno i Biblija iako pišingje la različna pisatelija hem bašo detalija kola so o Jehova otkringja baši peste (Ps. 1:2, 3). Isto agjaar, ponadari da valjani te ačhova paše e Jehovaja hem te molina amen te vodinel amen leskiri sila džikote adžikeraja te ispolninen pe leskere vetuvanja bašo večno životo (Juda 20, 21).

Isto sar o cari o David, ov uverimo kaj o Jehova grižinela pe okolenge so adžikerena ki leste hem sikavela lenge verno mangipe (Ps. 33:18, 22). Ponadari da strplivo adžiker ko Jehova agjaar so ka koncentririne tut ko pozitivna bukja ko tlo životo, ka koristine sekoja prilika te šaj te faline e Jehova, ka družine tut e phralencar hem e phenjencar te šaj te ove ohrabrimo hem agjaar so ka bajrare tli skapoceno nadež.