Ο Ιεχωβά όμως μανγκέλα τι μπεκλεντίνας με υπομονή μέχρι τι διορθώνελ ο πράγματα πι βακιτίστε. Σόσκε; Σο κα βοηθίνελ-αμέν τι αβάς ευτυχισμέ καζόμ μπεκλεντίνασα;

ΣΟΣΚΕ ΜΑΝΓΚΕΛΑ Ο ΙΕΧΩΒΑ ΤΙ ΜΠΕΚΛΕΝΤΙΝΑΣ;

Η Αγία Γραφή βακερέλα: «Ο Ιεχωβά μπεκλεντίνελα με υπομονή για τι σικαβέλ τουμένγκε λατσσιπέ, ντα κα ιστίλ για τι τζιτζίνελ τουμένγκε. Επειδή ο Ιεχωβά ισί δίκαιος Ντεβέλ. Ευτυχισμέ ισί σαρέ οντουλά σο μπεκλεντίνενα λέσκε». (Ησ. 30:18) Κι αρχή, ανταλά λάφια του Ησαΐα βακέρντιλε ι Ιουδαιόνγκε σο μανγκένας τι νακχέλ λένγκο. (Ησ. 30:1) Αλλά υπαρχίντιβενας κάποιοι πιστοί-ντα Ιουδαίοι, ντα ανταλά λάφια ντινέ-λεν ελπίδα. Ο ίδια λάφια ντένα ελπίδα κο πιστοί υπηρέτες ι Ιεχωβάσκε αντιβές.

Άρα, πρέπει τι μπεκλεντίνας με υπομονή επειδή ο Ιεχωβά-ντα μπεκλεντίνελα με υπομονή. Βοβ τραμπιντάς εκ βακίτι σο κα ανέλ ο τέλος ανταλέ ντουνιάσκο, ντα μπεκλεντίνελα τι αβέλ οντουβά ντιβές ντα οντουβά σαάτι. (Ματθ. 24:36) Κάνα κα αβέλ-πες ανταβά, κα αγαντίντιβελ ξεκάθαρα ότι ο κατηγορίες σο βακερέλα ο Μπενγκ ι Ιεχωβάσκε ντα οντουλένγκε σο υπηρετίνενα-Λες ισί ψεύτικες. Αζομάν, ο Ιεχωβά κα νασκιαρέλ ι Μπενγκές ντα οντουλέν σο τσσίντενα λέσταρ, αλλά αμένγκε κα «τζιτζίνελ».

Μέχρι τι αβέλ-πες ανταβά όμως, ο Ιεχωβά μπέκιμ να νασκιαρέλα αμαρέ δοκιμασίες, αλλά ντέλα-αμέν ι σιγουριά ότι μπορίνασα τι αβάς ευτυχισμέ καζόμ μπεκλεντίνασα. Σαρ βακερντάς ο Ησαΐας, μπορίνασα τι αβάς ευτυχισμέ καζόμ μπεκλεντίνασα σαρ σαρ ή μανγκάσα τι αβέλ-πες κάτι λατσσό. (Ησ. 30:18) a Σαρ μπορίνασα όμως τι αρακχάς ανταγιά ευτυχία; Για τι ντικχάς σταρ πράγματα σο κα βοηθίνεν-αμέν.

ΣΑΡ ΤΙ ΑΒΕΝ ΕΥΤΥΧΙΣΜΕ ΚΑΖΟΜ ΜΠΕΚΛΕΝΤΙΝΕΝΑ

Τι ντικχέν ο λατσσέ πράγματα τουμαρέ ζωγιάτε. Ο βασιλιάς Δαβίδ ντικχλάας μπουτέ τζενέν πι ζωγιάτε τι κερέν γκεραλέ πράγματα. (Ψαλμ. 37:35) Όμως, γραφιντάς: «Άτσσουβ ανγκλάλ κο Ιεχωβά χωρίς τι κερές λάφι ντα μπες λέσκε σαρ σαρ. Μα χόλιανε ι τζενέσαρ σο τθερέλα επιτυχία ντα κερέλα ο πράγματα σο σκεφτίνελα». (Ψαλμ. 37:7) Ο ίδιος ο Δαβίδ λιντάς σοβαρά ανταγιά συμβουλή κάνα ντικχλάς  σο κερντάς ο Ιεχωβά για τι σώνελ-λες. Επίσης, ισινέ πφερντό εκτίμηση σαρέ ι ευλογιένγκε σο ντέλας-λες ο Ιεχωβά. (Ψαλμ. 40:5) Άμα αμέν-ντα ντικχάσα ο λατσσέ πράγματα αμαρέ ζωγιάτε χωρίς τι κολλίνας κο μπέτι πράγματα σο αβένα-πες, κα αβέλ αμένγκε πο εύκολος τι μπεκλεντίνας ι Ιεχωβάσκε.

Χρησιμοποιήνεν κάθε ευκαιρία για τι δοξάνεν ι Ιεχωβάς. Ο τζενό σο γραφιντάς ο Ψαλμός 71, μάλλον ο Δαβίδ, βακερντάς κο Ιεχωβά: «Να κα τσσιναβάβ τι μπεκλεντίναβ· κα δοξάναβ-τουτ ατζέ πο μπουτ». (Ψαλμ. 71:14) Σαρ κα δοξάνελας ι Ιεχωβάς; Κα κερέλας λάφι κο γιαβερά ι Ιεχωβάσκε ντα κα γκιλιαβέλας ύμνους λέσκε. (Ψαλμ. 71:16, 23) Σαρ ο Δαβίδ, αντικάς αμέν-ντα μπορίνασα τι αβάς χαρούμενοι καζόμ μπεκλεντίνασα ι Ιεχωβάσκε. Δοξάνασα-λες κάνα κεράσα έργος κο γιαβερά, κεράσα λέσκε λάφι αμαρέ αμαλέντε ντα αμαρέ φαμιλιάτε ντα γκιλιαβάσα ύμνοι. Κι γιαβέρ φαρ σο κα γκιλιαβέν εκ ύμνος, ντεν πο μπουτ προσοχή κο λάφια σο κα πφερέν-τουμέν ζορ.

Τι λεν ζορ τουμαρέ πφραλένταρ ντα τουμαρέ πφενίνταρ. Κάνα ο Δαβίδ νακχέλας δυσκολίες, βακερντάς κο Ιεχωβά: «Ανγκλάλ τι αφοσιωμέ υπηρετόντε, κα τθεράβ ελπίδα τι ναβέστε». (Ψαλμ. 52:9) Αμέν-ντα μπορίνασα τι λας ζορ αμαρέ αφοσιωμέ πφραλένταρ, όχι σάντε κο συναθροίσεις ντα κο έργος, αλλά κο παρέες-ντα σο κεράσα λέντζαρ.​—Ρωμ. 1:11, 12.

Τι κερέν πο ζουρανί τουμαρί ελπίδα. Ο εδάφιος Ψαλμός 62:5 βακερέλα: «Ι Ντεβλέσκε μπεκλεντίναβα χωρίς τι κεράβ λάφι επειδή λέσταρ αβέλα μι ελπίδα». Ισί μπουτ σημαντικός τι τθεράς ζουρανί ελπίδα ειδικά άμα ο τέλος να αβέλα αζόμ σουγκό καζόμ μπεκλεντίναας. Πρέπει τι αβάς σίγουροι ότι ο υποσχέσεις ι Ιεχωβάσκε κα νικιόν μπαγιά είτε κα χρειαζίντιβελ τι μπεκλεντίνας χάνικ βακίτι είτε μπουτ. Μπορίνασα τι κεράς πο ζουρανί αμαρί ελπίδα καζόμ σικλιαράσα-αμέν κατά Λάφι ι Ντεβλέσκο. Για παράδειγμας, σκεφτίνεν σαρ ο προφητείες ι Γραφιάκε νικίστιλε μπαγιά, σαρ ο τζενέ σο γραφιντέ ι Γραφή συμφωνίνενας ο εκ ι γιαβερέσαρ, ντα σαρέ ο λεπτομέρειες σο μουτθαβέλα ο Ιεχωβά πι νεαυτόσκε. (Ψαλμ. 1:2, 3) Επίσης, χρειαζίντιβελα τι συνεχίνας τι “προσευχίντιβας με άγιος πνεύμας” για τι ατσσικιαράς λατσσί φιλία ι Ιεχωβάσαρ καζόμ μπεκλεντίνασα τι νικιόλ μπαγιά ο λάφι σο ντινάς τι τζουβντιάς για πάντα.​—Ιούδα 20, 21.

Σαρ ο βασιλιάς Δαβίδ, αντικάς τουμέν-ντα τι αβέν σίγουροι ότι ο Ιεχωβά ντικχέλα οντουλέν σο μπεκλεντίνενα Λέσκε ντα βακερέλα ι αφοσιωμέ αγάπη σο τθερέλα λένγκε. (Ψαλμ. 33:18, 22) Συνεχίνεν τι μπεκλεντίνεν με υπομονή ι Ιεχωβάσκε καζόμ ντικχένα ο λατσσέ πράγματα τουμαρέ ζωγιάτε, δοξάνενα-λες, λένα ζορ τουμαρέ πφραλένταρ ντα ατσσικιαρένα ζουρανί τουμαρί πολύτιμη ελπίδα.