Nambitanu, Yehovha a djula leswaku hi lehisa mbilu hi zrindzrela nkama lowu nga wone akuva a hetisisa swidumbiso swake. Ha yini a yimela ku va hi yentxa leswo? I yini lexi taka hi pfuna ku tama hi nyonxa nkama lowu hi zrindzrelaka?

HA YINI YEHOVHA A DJULA LESWAKU HI ZRINDZRELA?

Bibele dzri li: ‘Hikolaho Yehovha a ta zrindzrela, a djula ku n’wi yentxela timpswalu; kolaho a ta kulisiwa a n’wi tsretsrelela; hikusa Yehovha i Xikwembu Nkulukumba lwe wa ku lulama; ku tovokile hinkwavu lava mu laviselaka.’ (Eza. 30:18) Mazritu lawa ya muprofeta Ezaya, ma tsraliwe akuva ma pfuna Vayuda lava kalaka va nga yingiseti. (Eza. 30:1) Kambe, makazri ka Vayuda lava a ku ni vhanu lava a va dumbekile, mazritu lawa a ma va nyika dumbo. Nakone malandzra ya Yehovha ya ku dumbeka namunhla ma nga va ni dumbu ledzri fanaka loko ma dondzra mazritu ya Ezaya.

Hi fanela ku lehisa mbilu hi zrindzrela hikusa na yene Yehovha a yentxa tanu. Yene a beke siku ledzri a taka helisa mintxhumu hinkwayu ya ku biha, nakone a zrindzrela kuva siku ledzro ni nkama wa kone swi tlhasa. (Mat. 24:36) Hi siku dzroledzro, swi ta va livaleni leswaku mazritu ya ku biha lawa Sathana a ma pshwazrekiki Yehovha kun’we ni malandzra yake i madzrimi. Kolanu, Yehovha a ta helisa Sathana ni hinkwavu lava yimaka na yene, kambe hine a ta ‘hi yentxela timpswalu’.

Na siku ledzro dzri nga si na tlhasa, swi nga yentxeka Yehovha a nga hi suseli swikazratu leswi hi kumanaka na swone, kambe a hi dumbisa leswaku hi nga nyonxa na ha ha zrindzrela. Hi lani Ezaya a hlayiki ha kone, swa koteka kuva hi nyonxa na hi nkama wu li wun’we hi yimela ntxhumu lowunene. (Eza. 30:18) a Kambe leswo swi nga kotekisa kuyini? A hi voneni mune wa mintxhumu leyi nga hi pfunaka.

NDLELA LEYI HI NGA NYONXAKA HA YONE NKAMA LOWU HI ZRINDZRELAKA

Beka miyanakanyu ka mintxhumu leyinene. Hosi Davhida a vone wubihi byinyingi a wuton’wini byake. (Amaps. 37:35) Nambitanu, a tsrale leswi: ‘Lavisela Yehovha hi ku miyela ni ku tiyisela. U nga hlundzruki hi nkonta ya lwa nga ni ndjombo a ndleleni yakwe, hi nkonta ya mhunu lwa humelelaka mintizrweni yakwe ya ku  biha.’ (Amaps. 37:7) Davhida a landzre xitsratsriyo lexi nakone a beke miyanakanyu yake ka dumbu ledzri Yehovha a mu nyikiki dzrone dzra ku mu huluxa. A a tlhela a tlangela mintxhumu hinkwayu leyinene leyi Yehovha a mu yentxeliki yone. (Amaps. 40:5) Loko na hine hi yanakanya hi mintxhumu leyinene a wuton’wini byezru a matsrhan’wini ya ku beka miyanakanyu yezru ka mintxhumu ya ku biha, swi ta hi nabyalela ku zrindzrela Yehovha.

Khomeka hi ku dzrumisa Yehovha. Mutsrali wa Amapsalma 71, lweyi swi nga ha yentxekaka ku li Davhida, a byele Yehovha a ku: ‘Kambe mine ndzri ta dumba hi masiku hinkwawu, ndzri ta tekisa ku ku twalisa.’ (Amaps. 71:14) Xana Davhida a a ta dzrumisa Yehovha hi ndlela yini? A a ta byela van’wana hi Yehovha ni ku mu yimbelelela swidzrumiso. (Amaps. 71:16, 23) Ku fana na Davhida, na hine hi nga tama hi va lava nyonxiki nkama lowu hi zrindzrelaka Yehovha. Hi dzrumisa Yehovha hi ku zrezra, mabulu yezru ya siku ni siku ni ku mu yimbelelela tinsimu. Kutani, ka khambi ledzri landzrelaka lani u taka tlhela u yimbelela tinsimu tezru, swi ngo yini u xiyisisa mazritu ya kone ni ku yanakanya hi ndlela leyi ma nyonxisaka mbilu yaku ha yone?

Tiyisiwa hi vamakwezru. Loko Davhida a lavisane ni swikazratu, a byele Yehovha a ku: ‘Kutani ndzri ta lavisela vito dzraku hikusa i dzrinene, a mahlweni ka tinsasi taku.’ (Amaps. 52:9) Na hine ha tiyisiwa loko hi li kun’we ni vamakwezru, ku nga li ntsena a mintlhanganwini ni ku zrezreni, kambe ni loko hi tinyika nkama wa ku hungata na vone.—Rom. 1:11, 12.

Tiyisa dumbu dzraku. Amapsalma 62:5 yi li: ‘Hika dzranga dzri lavisela Xikwembu Nkulukumba ntsena; hikuva a ku dumba kwanga ku pfa ku yene.’ I swa lisima swinene ku tiyisa dumbu dzrezru, ngopfungopfu loko hi zrindzrela wugamu ku dzringana nkama wa ku leha. Hi fanela ku tiyiseka leswaku swidumbiso hinkwaswu swa Yehovha swi ta hetiseka, swi nge na mhaka nkama lowu hi taka wu heta na hi swi zrindzrela. Hi nga tiyisa dumbo dzrezru hi ku dondzra Zritu dzra Xikwembu Nkulukumba, wuprofeta, ndlela leyi swiyenge swin’wana swa Bibele swi fambisanaka ha yone ni swin’wana, kun’we ni wutsrhokotsrhoko byin’wana lebyi Yehovha a byi hlayiki mayelanu ni wumhunu byake. (Amaps. 1:2, 3) Hi fanela ku tlhela hi ya mahlweni hi ‘khongota na hi pfuniwa hi moya wa ku xwenga’ akuva hi tama hi va ni wuxaka na Yehovha nkama lowu hi zrindzrelaka ku hetiseka ka xidumbiso xa wutomi lebyi nga helikiki.—Yud. 20, 21.

Ku fana na Hosi Davhida, tiyiseka leswaku Yehovha awa va hlayisa, awa va sizrelela ni ku va komba lizrandzru dzra ku dumbeka hinkwavu lava mu zrindzrelaka. (Amaps. 33:18, 22) Xileswo, yana mahlweni u lehisa mbilu u zrindzrela Yehovha, na u beka miyanakanyu yaku ka mintxhumu leyinene a wuton’wini byaku, mu dzrumisi, u tiyisiwa hi vamakwezru nakone tama u tiyisa dumbu dzraku dzra ku xonga.