Ngakhale tenepo, Yahova asafuna kuti tidikhire mwakupirira ndzidzi wakuthema unafuna iye kucita pinthu. Thangwi yanji iye asafuna kuti tidikhire? Pontho ninji pinafuna kutiphedza toera tikhale akutsandzaya mu ndzidzi unadikhira ife?

THANGWI YANJI YAHOVA ASAFUNA KUTI TIDIKHIRE?

Bhibhlya isalonga: “Yahova asadikhira mwakupirira toera kukucitirani udidi, pontho iye anadzalamuka toera kukubverani ntsisi. Thangwi Yahova ndi Mulungu waulungami. Anyakutsandzaya ndi onsene ale anapitiriza kun’dikhira.” (Iza. 30:18) Mafala anewa a mprofeta Izaiya alemberwa Ayuda akukhonda bvera. (Iza. 30:1) Mbwenye pakati pa Ayuda anewa pakhali na anthu anango akukhulupirika, natenepa mafala anewa akhaapasa cidikhiro. Atumiki a Yahova a mu ntsiku zino anakwanisambo kukhala na cidikhiro angaleri mafala anewa a Izaiya.

Ife tisafunika kudikhira mwakupirira, thangwi Yahova asadikhirambo mwakupirira. Iye asankhula kale ndzidzi unafuna iye kufudza dziko ino yakuipa, basi ene akudikhira ndzidzi unoyu ufike. (Mat. 24:36) Pa ntsiku ineyi, pinadzapangizika pakweca kuti pinalonga Sathani thangwi ya Yahova na ale anatumikira Yahova ndi pyauthambi. Buluka penepo, Yahova anadzafudza Sathani na onsene ali kukhundu yace, mbwenye Iye ‘anadzatibvera ntsisi.’

Ntsiku ineyi mbidzati kufika, panango cincino Yahova nee anamalisa nyatwa zathu, mbwenye iye asatipasa cinyindiro cakuti tinakwanisa kukhala akutsandzaya mu ndzidzi unadikhira ife. Ninga pidalonga Izaiya, ife tinakwanisa kukhala akutsandzaya, mu ndzidzi ubodzi ene mbatidikhira pinthu pyadidi pinafuna kucitika. (Iza. 30:18) a Pyenepi pinakwanisika tani? Tinaona pinthu pinai pinafuna kutiphedza.

TINAKHALA TANI AKUTSANDZAYA MU NDZIDZI UNADIKHIRA IFE?

Nyerezerani pinthu pyadidi. Mambo Dhavidhi aona pinthu pizinji pyakuipa mu umaso wace. (Mas. 37:35) Ngakhale tenepo, iye alemba: “Dikhira Yahova mwakupirira. Dikhira toera uone pinafuna iye kucita. Leka kuipirwa na munthu wakuti asakwanisa kucita pyakuipa pinanyerezera iye.” (Mas. 37:7) Dhavidhi  aphatisira uphungu unoyu, mbanyerezera pya cidikhiro ca cipulumuso cidapaswa iye na Yahova. Iye akhaperekambo takhuta thangwi ya pinthu pyonsene pyadidi pidancitira Yahova. (Mas. 40:5) Ife tingacita pibodzi pyene, mbatinyerezera pinthu pyadidi pinacitika mu umaso wathu, mbatikhonda kunyerezera pinthu pyakuipa, pinakhala pyakukhonda nentsa kudikhira Yahova.

Pitirizani kukhala aphinga mbamusimba Yahova. Adalemba Masalmo 71, wakuti panango ndi Dhavidhi, apanga Yahova: “Ine ndinapitiriza kukudikhirani; ine ndinathimizira kukusimbani.” (Mas. 71:14) Dhavidhi mbadasimba tani Yahova? Iye mbadalonga na anthu anango thangwi ya Yahova, pontho mbadaimba nyimbo zakunsimba. (Mas. 71:16, 23) Ninga Dhavidhi, ife tinapitirizambo kukhala akutsandzaya mu ndzidzi unadikhira ife Yahova. Tisansimba mu ndzidzi unamwaza ife mphangwa, pakucedza ntsiku na ntsiku na tingaimba nyimbo za Umambo. Mu ndzidzi unaimba imwe nyimbo za Umambo, musaona tani kuonesesa mwadidi mafala, mbamunyerezera kuti mafala anewa asatsandzayisa tani ntima wanu?

Wangiswani na abale. Dhavidhi pidatamba iye nyatwa, apanga Yahova: “Pamaso pa anthu anu akukhulupirika, ine ndinadzadikhira dzina yanu.” (Mas. 52:9) Tingakhala pabodzi na abale na alongo athu pa misonkhano, pakumwaza mphangwa na m’midzidzi inango, tisawangisana unango na ndzace.—Aroma 1:11, 12.

Wangisani cidikhiro canu. Lemba ya Masalmo 62:5 isalonga: “Ndiri kudikhira Mulungu mwakupirira, thangwi cidikhiro canga cisabuluka kuna iye.” Ndi pyakufunika kakamwe kuwangisa cidikhiro cathu ku mapikiro a Mulungu, makamaka khala tisantumikira mu pyaka pizinji. Tisafunika kunyindira kuti pinthu pyonsene pidapikira Yahova pinacitikadi, mwakukhonda tsalakana ndzidzi unafuna ife kudikhira. Tinakwanisa kukhala na cidikhiro cakuwanga tingapfundza Mafala a Mulungu, maprofesiya, makhundu akusiyana-siyana a Bhibhlya akuti asabverana, kuphatanizambo mphangwa zinapangiza Yahova thangwi ya makhaliro ace. (Mas. 1:2, 3) Tisafunikambo kupitiriza ‘kucita phembero mukutsogolerwa na nzimu wakucena’ toera tikhale na uxamwali wakuwanga na Yahova mu ndzidzi unadikhira ife kukwanirisika kwa mapikiro a umaso wakukhonda mala.—Yuda 20, 21.

Ninga Dhavidhi, khalani na cinyindiro cakuti Yahova asatsalakana, asatsidzikiza, pontho asapangiza ufuni wakukhonda mala kuna onsene anan’dikhira. (Mas. 33:18, 22) Natenepa, pitirizani kudikhira Yahova mwakupirira, mbamunyerezera pinthu pyadidi pinacitika mu umaso wanu, kunsimba, kuwangiswa na abale na alongo na kudikhira pinthu pyadidi kakamwe pya ntsogolo.