Nakoso, Yehowa pena kyɛ yɛkɔso yɛnwondɛ ye, kodwu kyɛ mmerɛ kɔso maa ɔkɔye yɛ haw kofi berɛ ɔ. Yede nzuati yeɛ Yehowa pena kyɛ yɛyɛ sɔ ɔ? Na nzu yeɛ ɔkɔboka yɛ maa yɛnye kɔhɔso kɔgye mmerɛ bɔ yɛnwondɛ ye ne?

NZUATI YEƐ YEHOWA PENA KYƐ YƐNWONDƐ YE Ɔ?

Bible ne kã kyɛ: “AWURADE ɔnwondɛ kyɛ ɔkɔlo ɛmɔ ɔ, na waboaboa ye nwo kyɛ okonwu ɛmɔ anwumvoin ɔ, ofikyɛ AWURADE te pɛpɛɛpɛyɛlɛ Nyameɛ, na ebiala bɔ ɔfa ye wora wura ye nu ne, onya saleɛ.” (Yes. 30:18) Né sɔ dwirɛ ne kɔ ma Yudafoɛ bɔ né bendie Yehowa dwirɛ ne. (Yes. 30:1) Nakoso Yudafoɛ bɔ né bedi nahorɛ bɛma Yehowa ne, edwirɛ bɔ Yesaya hworɔle ne bokale bɛ maa benyane anyelasoɛ. Ɛnnɛ koso, yɛbɔ yɛsõ Yehowa ne, ɔmaa yenya anyelasoɛ.

Yeti yɛ koso odikyɛ yesuesũa Yehowa, na yɛkɔso yɛnwondɛ. Nningyein tɛ́ɛ bɔ ɔkɔso wɔ ewiase he anu ne, Yehowa ahyɛ mmerɛ bɔ ɔkɔfa kɔye ye mukoraati kofi berɛ ɔ. Nakoso ɔnwondɛ kyɛ, sɔ kyẽa ne, ɔne dɔnhwere ne kɔsõ kora né wayɛ sɔ. (Mat. 24:36) Sɔ mmerɛ ne, né ebiala anwu ye kyɛ, edwirɛ bɔ Satan ahã ato Yehowa, ɔne mmenia bɔ bɛsõ ye ne mukoraati so ne, ɔte ngondombo. Yeti, Yehowa kɔye Satan ne bɛbɔ bɛboka yeso ne mukoraati kofi berɛ. Nakoso yɛde, Yehowa “konwu [yɛ] anwumvoin.”

Yeti kesaalae bɔ yɛnwondɛ kyɛ sɔ mmerɛ ne kɔsõ ne, ebia Yehowa ngɔye ɔhaw bɔ yɛfa nu namu ngofi berɛ. Nakoso wama yɛ awerɛhyɛmuɛ kyɛ, yɛnye kɔhora kɔgye mmerɛ bɔ yɛnwondɛ ye ne. Kyɛbɔ Yesaya hãne ne, sɛ nningyein pá bɔ yɛnye la so ne walle nu po a, yɛnye kɔhora kɔgye. (Yes. 30:18) Yede, yɛkɔyɛ sɛɛ né yanya sɔ anigye ne? Nningyein nna hemɔ kɔboka yɛ.

BƆ ƆKƆBOKA WƆ MAA WƆNYE KƆGYE MMERƐ BƆ ƐNWONDƐ NE

Nningyein pá bɔ ɔkɔso wɔ w’asetena nu ne, fa w’adwene sie so. Wɔ Ɔhene Dawide asetena nu ne, né mmenia bɔ bɛ tianu yɛ se apɛ yenwo ayia. (Edw. 37:35) Nakoso ɔhworɔle kyɛ: ‘Yɛ konn wɔ AWURADE nyunu, ná to wɔ bo ase nwondɛ ye. Sona bɔ ɔnate ye bɔbɔ ye atee so onya ye nwo, yeɛ sona bɔ ɔdwene nikyee tɛɛ nwo, ná ɔyɔ ne, nnɛma ye nwo adwenedwene tɔ wɔ so.’ (Edw. 37:7) Dawide bɔbɔ deinn fale sɔ dwirɛ he bɔle ye bra. Yeti nningyein bɔ né Yehowa ayɛ ama ye, ɔne bɔ né wafa wahyɛ ye bɔ ne, ɔfale ye adwene siele so. (Edw. 40:5) Yɛ koso, odikyɛ  yɛfa yɛ adwene yesie nningyein pá bɔ ɔkɔso wɔ yɛ asetena nu naso, na ɔnzɛkyɛ yɛdwenedwene nningyein tɛ́ɛ bɔ wapɛ yɛnwo wayia nanwo. Sɛ yɛyɛ sɔ a, ɔkɔboka yɛ maa yɛnye kɔgye mmerɛ bɔ yɛnwondɛ Yehowa ne.

Yenwo atẽe biala bɔ ekonya ye ne, fa ye Yehowa ayɛ. Edwein 71 ne, ɔkɔyɛ kyɛ Dawide yeɛ ɔhworɔle ɔ, na ɔhãhyirele Yehowa kyɛ: “Nakoso me de, ngonya anyelasoɛ daa, na ngɔhɔ so ngɔye wɔ ayɛ.” (Edw. 71:14) Atẽe beni yeɛ né Dawide kɔfa so kɔye Yehowa ayɛ ɔ? Yeɛ ole kyɛ, né ɔkɔhã Yehowa nwo dwirɛ kohyire mmenia, na wato ayɛyelɛ dwein wama ye. (Edw. 71:​16, 23) Yɛ koso, yɛhɔhora yekosuesũa bɔ Dawide yɛle ne. Ebie yeɛ ole kyɛ, yɛkɔyɛ asɛnga adwuma ne, na yahã bɔ Yehowa ayɛ ama yɛ nanwo dwirɛ yahyire yɛ damvomɔ, ɔne y’abusũafoɛ. Afei, odikyɛ yefi y’ahõne nu yɛto asafo dwein ne bie. Sɛ ɛto a, edwirɛ bɔ ɔhyɛ ngunaen bɔ ɔwɔ nu ne, ɛyɛ a fa w’adwene sie so.

Ma aliemaamɔ hyɛ wɔ ngunaen. Mmerɛ bɔ Dawide hɔle anwokyere nu ne, ɔhãhyirele Yehowa kyɛ: “Ngɔfa me wora ngowura wɔ dumaa nu wɔ w’anwoteefoɛ mɔ nyunu.” (Edw. 52:9) Yɛ koso, aliemaamɔ hyɛ yɛ ngunaen mmerɛ bɔ yahɔ asafo nhyiamu, ɔne mmerɛ bɔ yɛne bɛ abɔ nu yɛyɛ asɛnga adwuma ne. Sɛ yɛne bɛ bɔ nu yɛgye yɛnye koso a, bɛhyɛ yɛ ngunaen.—Rom. 1:​11, 12.

Anyelasoɛ bɔ ele ye ne, ma enu yɛ se. Edwein 62:5 kã kyɛ: “Me kra, Nyameɛ ngome yeɛ ma wɔ nye ɔla ye so ɔ, na ye berɛ yeɛ m’anyelasoɛ fi ba ɔ.” Sɛ yɛhyɛ anyelasoɛ bɔ yele ye nanu serɛ a, ɔmaa yenya gyidie paa kyɛ, ɔyɛ sɛɛ alaa a, nningyein bɔ Yehowa ahyɛ bɔ kyɛ ɔkɔyɛ ne mukoraati kɔwa nu. Bɔ yeti yeɛ odikyɛ yɛyɛ sɔ yeɛ ole kyɛ, ɔkɔmaa yɛkɔhɔso yɛkɔnwondɛ mmerɛ po bɔ ebia yɛ adwene yɛ yɛ kyɛ ewiase he ayieleɛ ne ahyɛ ne. Anyelasoɛ bɔ yele ye ne, sɛ yɛpena kyɛ enu yɛ se a, sana yɛyere yɛnwo yesũa Bible ne yé. Sɛ yesũa a, kyɛbɔ enu ngɔmhyɛ ahoroɛ ne awa nu, ɔne kyɛbɔ enu dwirɛ ne yia ne, odikyɛ yɛfa y’adwene yɛkɔ so. Afei, Yehowa subaen bɔ bahã yenwo dwirɛ ne, odikyɛ yɛfa y’adwene yɛkɔ so. (Edw. 1:​2, 3) Ebiekũ koso, odikyɛ yɛkɔso ‘yɛbɔ mbaeɛ wɔ Sunzum Krongron nu.’ Ɛhẽne kɔboka yɛ maa yɛne Yehowa afĩa kɔhɔso kɔyɛ kama, mmerɛ bɔ yɛnwondɛ kyɛ yɛsa kɔhã daa ngõa bɔ wafa wahyɛ yɛ bɔ ne.—Yuda 20, 21.

Tekyɛ Ɔhene Dawide ne, wɔ koso nya gyidie kyɛ, bɛbɔ bɛnye la Yehowa so ne, ye koso ɔye ye dɔ bɔ onni ngasi ne ali kyire bɛ. (Edw. 33:​18, 22) Yede, kɔso fa w’adwene sie nningyein pá bɔ ɔkɔso wɔ w’asetena nu naso, na ye Yehowa ayɛ. Asa koso, ma aliemaamɔ hyɛ wɔ ngunaen, na anyelasoɛ bɔ ele ye ne koso, ma enu yɛ se. Sɛ ɛyɛ sɔ a, ɔkɔboka wɔ maa ɛkɔnwondɛ Yehowa.