Ikkirono Yihowa isi hirqino yanna iillita geeshsha cincine agadhinammora hasiˈranno. Isi cincine agadhinammora hasiˈrannohu mayiraati? Cincine agadhineemmo woyite hagiirraamma ikkineemmo gede kaaˈlannonkeri maati?

YIHOWA CINCINE AGADHINAMMORA HASIˈRANNOHU MAYIRAATI?

Qullaawu Maxaafi togo yaanno: “Kaaliiqi maaraˈnera qixxaawe [“cince agadhe” NW] no. Kaaliiqi taashshanno Magano ikkino daafira, mararinoˈne; kunnira Kaaliiqa hexxitannori baˈraadhinoreeti.” (Isa. 30:18) Isayyaasi tenne hedo borreessinohu haxawarrootu Ayihudete manniraati. (Isa. 30:1) Ikkirono Ayihudete manni giddo mitu ammanaminoho; tini hedo insara hexxo heedhannonsa gede assitannote. Tini hedo xaa yannara noote ammanantinote Yihowa soqqamaanorano hexxo heedhannonsa gede assitannote.

Yihowa cince agadhe noo daafira ninkeno cincine agadha hasiissannonke. Isi tenne busha alame hunanno yanna hirqe no; qoleno hakku barrinna saate iillita geeshsha cince agadhe no. (Mat. 24:36) Hatte yannara Sheexaanu Yihowanna iso magansidhannore kassasino kisse kapho ikkase xabbe leeltanno. Hakkiinni Yihowa Sheexaanenna isi wido ikkitinore baala hunanno; ‘ninke kayinni maarannonke.’

Hatti yanna iillita geeshsha kayinni Yihowa iillannonke qarra dihoolanno; ikkirono kayinni cincine agadhineemmo woyite hagiirraamma ikka dandiineemmota buuxisinonke. Isayyaasi coyiˈrinonte gede albillitte ikkannoha dancha coye agadhineemmo woyite woy hexxineemmo woyite hagiirraamma ikka dandiineemmo. (Isa. 30:18) a Hagiirraamma ikka dandiineemmohu hiittoonniiti? Hanni tennera kaaˈlannonkeha shoole coye laˈno.

CINCINE AGADHINEEMMO WOYITE HAGIIRRAAMMA IKKA DANDIINEEMMO GARA

Dancha danchare hedde. Moote Daawiti heeshshosi diro woˈma lowo bunshe laino. (Far. 37:35) Ikkirono isi togo yee borreessino: “Cincite Kaaliiqi assannore agadhi; wolootu durooˈmituro, bunshe  assitannorira qiniinsaro giirantooti.” (Far. 37:7) Daawiti umisi Yihowa gatisannosita kule uyinosi hexxo illachishe tenne amaale loosu aana hosiisino. Qoleno isi Yihowa uyinosi atooti baalaho galatu noosita leellishino. (Far. 40:5) Ninkeno qooxeessinkera ikkannoha gara ikkino coye laˈne giirama agurre dancha danchare hendeemmoha ikkiro cincine Yihowa agadha shota ikkitannonke.

Yihowa guwisiˈrate afidhini faro baala horoonsidhe. Faarso 71 borreessinohu Daawiti ikkikki digatino; isi togo yiino: “Ani kayinni woˈmanka woyite hexxeemmohe [“cince agadheemmo,” NW]; lede lede galaxxeemmohe.” (Far. 71:14) Isi Yihowa galaxxinohu hiittoonniiti? Isi wolootaho Yihowa daafira kulino hattono iso faarsotenni guwisiˈrino. (Far. 71:16, 23) Daawiti gede ninkeno Yihowa cincine agadhineemmo woyite hagiirraamma ikka dandiineemmo. Soqqanshonkenni, barru baala hasaambeemmo hasaawinninna faarsotenni iso guwisiˈra dandiineemmo. Aantanno yannara faarso faarsatto woyite jawaachishannoha faarsote gixima woy kiiro illachisha dandaatto?

Ammanate roduuwiˈnewiinni jawaante afiˈra dandiitinanni. Daawitira qarru iillisi yannara Yihowa, “Suˈmikki danchumma mannikki xaadinowa lallaweemmo [“suˈmakki hexxeemmo” NW]” yiino. (Far. 52:9) Ninkeno gambooshshunniwanna soqqansho fulleemmo woyite calla ikkikkinni ammanate roduuwinke ledo yanna sayinseemmo woyiteno jawaante afiˈra dandiineemmo.—Rom. 1:11, 12.

Hexxoˈne kaajjishidhe. Faarso 62:5 “Hexxeemmohu isootina, lubboˈya, ati sammi yite Magano calla agadhi” yitanno. Roorenkanni tini busha alame baˈanno yanna ninke hendoommohunni saˈe keeshshitanno woyite kaajjado hexxo hasiissannonke. Cincine agadhineemmo yanna ikkitu geeshshitano ikkituro Yihowa eino qaali woˈmannota addaxxa hasiissannonke. Qullaawa Maxaafa xiinxalline lawishshaho masaalo, Qullaawu Maxaafi isi isiniiwa sumuu yaanno garanna Yihowa umisi daafira kulinonkeha mitto mittonka coye xiinxalline hexxonke kaajjishiˈra dandiineemmo. (Far. 1:2, 3) Qoleno Yihowa hegere heeshsho aankera eino qaali woˈmanno yanna cincine agadhineemmo woyite Yihowa ledo noonkehu danchu jaaloomi baˈˈannokki gede woˈmanka woyite ‘Qullaawu Ayyaaninni huucciˈra’ hasiissannonke.—Yih. 20, 21.

Moote Daawiti gede Yihowa Iso cincite agadhitannore laˈˈannotanna bagamannokki baxillesi leellishannonsata addaxxe. (Far. 33:18, 22) Dancha danchare heddine, Yihowa guwisidhine, ammanate roduuwiˈnewiinni jawaante afidhinenna muxxe ikkitino hexxoˈne kaajjishidhine woˈmanka woyite Yihowa cincitine agadhe.