Fe tean’i Jehovah handiny avao tsika zisiky iavian’ny fotoa voatondrony. Manino tsika ro teany hanao ani-zay? Ino ty hanampy antsika ho falifaly avao lafa mandiny azy?

MANINO TSIKA RO TEAN’I JEHOVAH HANDINY?

Hoy ty Baiboly: “Mbo mahaliny avao Jehovah satria ta hiferinay anareo, le hitsanga ie satria ta hamindra fo aminareo. Ndranahary manao ty rariny Jehovah, ka sambatsy ze olo iaby mitamà azy.” (Isaia 30:18) Natao ho an’ny Jiosy maheriloha rey tse ty Isaia toko faha-30, tamy voalohany. (Isaia 30:1) Fe misy hafatsy manome fanantenà ho ani-ze Jiosy tsy nivaliky, amy andininy faha-18 io. Mbo manome fanantenà ho an’ny mpanompon’i Jehovah tsy mivaliky henanizao koa safà reo.

Tsy maintsy mandiny zany tsika satria Jehovah mbo mahaliny avao. Fa nanondro fotoa ie mba handripaha an’ny tontolo raty toy, le mandiny ty hiavian’ny andro noho lera zay ie. (Mat. 24:36) Ho hita mazava soa amy fotoa zay fa diso ty fanasarà ataon’i Devoly an’i Jehovah noho ty mpanompony. Haripakin’i Jehovah, Satana noho ze olo manoha azy, fe ‘hamindra fo amintsika’ ie.

Mety tsy hanafaky ty problemo mahazo antsika Jehovah zisiky hiaviani-zay, fe manome toky antsika ie fa afaky ho falifaly tsika lafa mandiny. Zay mihintsy nivolanin’i Isaia iny hoe afaky ho falifaly tsika laha maniry na mitamà hoe hisy raha soa hiseho. (Isaia 30:18) a Akory ty hahazoantsika an’ny fifalea zay? Retoa misy raha efatsy hanampy antsika.

INO TY HANAMPY ANTSIKA HO FALIFALY AVAO LAFA MANDINY?

Mifantoha amy lafy soan-draha. Nahita raha raty maro Davida Mpanjaka tamy ty fiainany. (Sal. 37:35) Fe hoy ty asany: “Mitsìna anatrehan’i Jehovah eo, le linaso avao ie. Ka sosotsy amin’olo mahavita manatanteraky ty tetiky ataony.” (Sal. 37:7) Norihin’i Davida torohevitsy zay ka nifantoky tamy fanavota nampitamanin’i Jehovah azy ie. Nitiaroviny koa ty fitahia iaby namean’i Jehovah azy. (Sal. 40:5) Laha tsika koa mifantoky amy ty raha soa amy fiainantsika fa tsy miasa loha amy  ty raha raty manodidy antsika, le ho mora amintsika ty handiny an’i Jehovah.

Mazotoa midera an’i Jehovah. Zao ty nivolanin’ny mpanoratsy Salamo 71 tamy Jehovah: “Mbo handiny anao avao aho; vomaiky aho hidera anao.” (Sal. 71:14) Mety Davida vasa olo io. Amy fomba akory ty hideràny an’i Jehovah? Niresaky mikasiky an’i Jehovah tamin’olo ie sady nihira fiderà ho azy. (Sal. 71:16, 23) Manahaky an’i Davida, le afaky ho falifaly koa tsika lafa mandiny an’i Jehovah. Midera azy tsika lafa mitory, miresaky mikasiky azy amy ty namantsika noho ty fianakaviantsika, sady mihira an’ny hirantsika rey. Lafa iha mihira ty raiky amy hirantsika rey amy manaraky, le diniho soa ty tonony noho ty hafatsy mampahery anatiny ao.

Engao hampahery anao rahalahy noho anabavinao reo. Lafa niatriky raha sarotsy Davida, le zao ty nivolaniny tamy Jehovah: “Hasehoko anatrehan’olo tsy mivaliky aminao reo fa mitamà ty anaranao aho.” (Sal. 52:9) Afaky mahazo fampahereza baka amy mpiara-manompo tsy mivaliky reo koa tsika. Tsy hoe lafa mivory noho manompo avao, fa lafa miaraky amin-drozy amy fotoa hafa koa.​—Rom. 1:11, 12.

Miezaha hatòky ty raha tamaninao. Hoy ty Salamo 62:5: “Mandiny a-Ndranahary aho ka tsy hivola, satria ie ro tamaniko.” Tena mila manatanjaky ty fanantenantsika tsika sirtò laha tsy avy amy fotoa nieritseretantsika azy ty farany. Tokony ho resy lahatsy tsika hoe tsy maintsy ho tanteraky ty fampitamanan’i Jehovah, ndre mbo ela manao akory aza ty andinisantsika azy. Vomaiky hatòky ty raha tamanintsika tsika laha mianatsy ty Safà-Ndranahary. Diniho, ohatsy, faminania iaby niresahin’ny Baiboly fe fa nitanteraky rey. Diniho koa fa samby hafa ty mpanoratsy Baiboly fe mifanaraky soa ty raha ao, le eo koa ty tsipiriany maro nambaran’i Jehovah mikasiky azy. (Sal. 1:2, 3) Mila mazoto ‘mivavaky’ koa tsika le ‘engantsika hiasa amintsika ty fanahy masy.’ Hifandramby soa amy Jehovah avao tsika amy zay, zisiky andinisantsika ty hahatanteraky ty fampitamanany fiaina mandrakizay.​—Joda 20, 21.

Manahaky an’i Davida Mpanjaka, le matokisa fa tena darean’i Jehovah ty olo mandiny azy sady ampisehoany fitiava noho tsy fivaliha. (Sal. 33:18, 22) Miezaha avao zany handiny an’i Jehovah ka mifantoha amy ze raha soa amy fiainanao, miderà an’i Jehovah, engao hampahery anao ty mpiara-manompo, le hatanjaho avao ty fanantenanao.