Peta muloo p’okiotengiela Yehowa na luishinko loso
OTENGIELAA n’eshimba kuiyilu nsaa y’abakakatusha mianda yoso ibubi na kuikasha bintu bioso bu bipia kui Yehowa su? (Kbf. 21:1-5) Kushi mpaka okuete kutengiela! Anka, ingi nsaa t’abikalaa bibofule buatudia kutengiela Yehowa na luishinko nya, bikishekishe patudi na nkalakashi. Nsaa y’atukulupila kintu kish’akilombana bukidi, abitukiengieshaa kuishimba.—Nki. 13:12.
Kadi Yehowa akumiina’shi tumutengiele na luishinko buadia kukita mianda mu kipungo kiaye kitshibibue. Buakinyi akumiina’shi tutengiele na luishinko? Nkinyi kilombene kuitukuasha bua kuikala na muloo patuki’atutengiela?
BUAKINYI YEHOWA AKUMIINA’SHI TUTENGIELE?
Bible amba’shi: ‘Yehowa mmutengyele kipungo kilombeene kwinufwila lusa; akeebwo bwa kwinuleesha kalolo kaaye, mwanda Yehowa nyi Efile Mukulu a bululame: be na muloo mbaano booso abakulupila mwadi.’ (Yesh. 30:18) Ano mayi, Yeshaya badi muiafundile bena Yuda bantomboshi. (Yesh. 30:1) Anka, kubadi bangi bena Yuda babadi na lulamato munkatshi muabo, na ano mayi abadi ebape lukulupilo. Ano mayi amune, akuete kunyingisha bafubi ba Yehowa be na lulamato lelo uno.
Biabia, abitungu tutengiele na luishinko loso muanda Yehowa namu atengielaa na luishinko. Mmutshibe kipungo kiafudiisha uno ndumbuluilo a mianda, na atengiela diadia efuku na yaya nsaa na luishinko. (Mat. 24:36) Mu kiakia kipungo abikaleshibua patoka’shi mianda yoso i Diabulu afundu nayo Yehowa na bafubi baye ngia madimi. Paapa, akabutula Satana na bantu boso be kupese luaye, kadi ‘aketulesha lusa’ luaye.
Kadi patuki’atutengiela, pangi Yehowa ta mulombene kukatusha nkalakashi yetu nya, sunga mbiabia, etushinkamiisha’shi tui balombene kuikala na muloo patukuete kutengiela. Anka bu bibakuile Yeshaya, tui balombene kuikala na muloo patukuete kutengiela n’eshimba dimune bua’shi muanda wibuwa ukitshikie. (Yesh. 30:18) a Tui balombene kupeta wawa muloo naminyi? Tutaleyi mianda inanka ilombene kuitukuasha.
BIA KUIKALA NA MULOO PATUKUETE KUTENGIELA
Tula binangu ku mianda ibuwa. Nfumu Davide badi mufumankane na nkalakashi ibungi mu nshalelo aye. (Mis. 37:35) Anka, bafundile’shi: ‘Shala mwimiine, otengiele na lwishinko byabya by’abakyebe kukita kwi Yehowa. Tofitanga munda pa mwanda wa babi abalombasha myanda yabo.’ (Mis. 37:7, EMM) Davide nabene badi mutumikile dino elango pa kutula binangu biaye ku milayilo ya Yehowa ya’shi amukuasha. Badi’nyi alesha lutumbu bua mianda yoso ibuwa ibadi Yehowa amukitshina. (Mis. 40:5) Su atue namu atushala batule binangu bietu ku mianda ibuwa ayikitshika mu nshalelo etu, kushi kuibitula ku nkalakashi, abikala bibofule buatudia kutengiela Yehowa.
Fubisha mushindo oso aumueneka bua kutumbisha Yehowa. Davide badi pangi mufunde Musambo 71, baluinguile Yehowa’shi: ‘Bwande’mi, naashala mukulupile, ntungunukye na nkutumbisha.’ (Mis. 71:14) Davide badi mutumbishe Yehowa naminyi? Badi alungula bangi mianda ya Yehowa na ayimbi bua kumutumbisha. (Mis. 71:16, 23) Anka bu Davide, atue namu tui kupeta muloo patuki’atutengiela Yehowa. Atumutumbisha patulungula mukandu wibuwa, mu miisambo yetu y’efuku dioso, na patuyimbi ngono ya bufumu. Musango aufiki, p’oyimbi ngono yetu ya bufumu, nangushena kalolo ku mayi aayo na ku biayidia nkupa muloo.
Nyingishibua pa kukisha nsaa pamune na bakuetu balume na bakashi. Pabadi Davide na nkalakashi, balunguile Yehowa’shi: ‘Kumpala kua baba be na lulamato kodi, nakakulupila muishina diobe.’ (Mis. 52:9) Atue namu tui balombene kunyingishibua na bakuetu balume na bakashi, kushi penda patudi mu bisangilo na mu bulungudi, kadi patukisha nabo nsaa pamune.—Lom. 1:11, 12.
Nyingisha lukulupilo lobe. Misambo 62:5 amba’shi: ‘Natengiela Efile Mukulu na luishinko, muanda lukulupilo luande lui muadi.’ Lukulupilo lunyingie lui na muulo ukata, bikishekishe su nfudiilo a uno ndumbuluilo tamufikie bukidibukidi bu biatutengielanga. Abitungu tuikale bashinkamishe’shi milayilo ya Yehowa ayikakumbana, sunga biekala’shi atuiyitengiela takudi bipua bi bungi. Tui kunyingisha lukulupilo luetu pa kuilongiela Eyi di’Efile Mukulu, kuamba’shi, matemuki, mushindo wipushene ma verse ebungi, na ingi mianda ibadi Yehowa muleshe pabimutale. (Mis. 1:2, 3) Dingi, abitungu tutungunukie na “kuteka mu kuipushena na kikudi kiselele” bua kulama kipuano kietu kibuwa na Yehowa, bu biatuki’atutengiela’shi alombashe mulayilo waye wa kuitupa muwa wa loso.—Yu. 20, 21.
Anka bu Nfumu Davide, ikala mushinkamishe’shi Yehowa apasukilaa baba abamutengiela na ebalesha kifulo kiaye kia lulamato. (Mis. 33:18, 22) Biabia, tungunuka na kutengiela Yehowa na luishinko loso pa kutula binangu ku mianda ibuwa yodi nayo mu nshalelo obe, kumutumbisha, na kunyingishibua pa kukisha nsaa pamune na bakuetu balume na bakashi, na kulama lukulupilo lobe lunyingie.
a Mu ludimi lua ku kibangilo, kishima kiabadi baalule bu “kukulupila muadi” nkilombene dingi kupushisha’shi “kutengiela n’eshimba dimune bua’shi muanda ukampanda ukitshikie.” Bino abilesha’shi tabi bubi kutengiela bua’shi Yehowa apue nkalakashi yetu.
