Ma tòg Yehovah wani taki wi musu abi pasensi èn taki wi musu wakti teleki a ten doro taki a o du wan sani. Fu san ede a e ferwakti dati fu wi? San kan yepi wi fu de koloku aladi wi e wakti?

FU SAN EDE YEHOVAH WANI TAKI WI MUSU WAKTI?

Bijbel e taki: „Yehovah o tan wakti unu, fu di a wani du bun gi unu. A o opo du wan sani fu sori unu sari-ati. Bika Yehovah na wan Gado di e koti krutu na wan reti fasi. Koloku fu ala den sma di e tan wakti en” (Yes. 30:18). Na a fosi presi, den wortu disi ben de gi den trangayesi Dyu (Yes. 30:1). Ma wan tu fu den Dyu ben de getrow sma èn den wortu disi ben e gi den howpu. Den srefi wortu disi e gi den getrow futuboi fu Yehovah howpu tu na ini a ten disi.

Sobun, wi musu wakti nanga pasensi fu di Yehovah e wakti nanga pasensi. A poti wan ten te a o tyari wan kba kon na a ogri grontapu disi èn a e wakti a dei nanga a yuru dati (Mat. 24:36). Na a ten dati, a o de krin fu si taki den sani di Didibri taki fu Yehovah èn fu den wan di e dini En, no tru srefsrefi. Dan a o puru Satan nanga ala sma di teki en sei, ma a o „sori sari-ati” gi wi.

Kande Yehovah no o lusu den problema fu wi nownowde, ma a e gi wi a dyaranti taki wi kan de koloku aladi wi e wakti. Soleki fa Yesaya sori, wi kan de koloku aladi wi e wakti fu Yehovah du bun gi wi (Yes. 30:18). Fa wi kan de koloku? Fo sani kan yepi wi.

FA WI KAN DE KOLOKU ALADI WI E WAKTI?

Prakseri den bun sani di e psa na ini yu libi. Kownu David ondrofeni furu takru sani na ini en libi (Ps. 37:35). Tòg a ben skrifi: „Tan pî te yu de na fesi Yehovah. Èn tan wakti en nanga yu heri ati. No nyan yu niri te trawan e du sani fu meki a libi fu den waka bun, iya, te yu e si fa sma e waka e du den takru sani di den abi na prakseri” (Ps. 37:7). David srefi fiti a rai disi di a poti prakseri na a pramisi di Yehovah ben gi en taki a ben o ferlusu en. A ben abi warderi tu gi ala den bun sani di Yehovah du gi en (Ps. 40:5). Efu wi e  poti prakseri tu na den bun sani na ini wi libi, na presi taki wi e tan luku den takru sani, dan wi o feni en moro makelek fu wakti tapu Yehovah.

Gebroiki ibri okasi fu prèise Yehovah. Soleki fa a sori, dan David ben de a skrifiman fu Psalm 71. A ben taigi Yehovah: „Mi fu mi sei, o wakti yu ala ten baka, èn mi o prèise yu moro ete” (Ps. 71:14). Fa yu denki taki a ben prèise Yehovah? A ben e ferteri trawan fu Yehovah èn a ben e singi prèisesingi gi en (Ps. 71:16, 23). Neleki David wi kan de koloku aladi wi e wakti Yehovah. Wi kan prèise en te wi e preiki gi sma, te wi e taki fu en nanga wi famiri noso mati, èn te wi e singi prèisesingi gi en. Wan tra leisi te yu o singi wan Kownukondre singi, dan a bun fu denki dipi fu den wortu èn fu a fasi fa den e gi yu prisiri.

Meki den brada nanga sisa fu yu gi yu dek’ati. Di David ben kisi problema, a taigi Yehovah: „Mi o tan frutrow na tapu yu nen, makandra nanga den wan di e tai hori na yu” (Ps. 52:9). Wi kan kisi dek’ati tu fu den brada nanga sisa fu wi te wi de na den konmakandra fu wi èn na ini a preikiwroko, ma sosrefi te wi abi prisiri demakandra.​—Rom. 1:11, 12.

Tranga a howpu fu yu. Psalm 62:5 e taki: „Nanga pasensi mi o wakti Gado, fu di na en e gi mi howpu.” A prenspari srefsrefi fu abi wan tranga howpu, spesrutu te wi e si taki a kba no e doro so esi leki san wi ben denki. Wi musu abi a tranga bribi taki Yehovah o meki ala pramisi fu en kon tru, awinsi o langa wi musu wakti. Wi kan tranga a howpu fu wi te wi e studeri den profeititori na ini Bijbel, te wi e ondrosuku fa ala den Bijbel buku abi fu du nanga makandra, èn te wi e si fa Gado e yepi wi fu kon sabi en moro bun (Ps. 1:2, 3). Boiti dati, wi musu go doro fu „begi nanga santa yeye” so taki wi man tan abi wan bun matifasi nanga Yehovah, aladi wi e wakti en fu gi wi têgo libi soleki fa a pramisi.​—Yud. 20, 21.

Neleki Kownu David, yu kan de seiker taki Yehovah e poti prakseri na den wan di e wakti En èn taki a e sori den bun-ati (Ps. 33:18, 22). Sobun, prakseri den bun sani di e psa na ini yu libi, prèise en, meki den brada nanga sisa gi yu dek’ati, èn sorgu taki a howpu fu yu tan tranga. Na so yu e sori taki yu e tan wakti tapu Yehovah.