Jabula Njengobe Uselindze Jehova Ngesineke
UYASILANGATELELA yini sikhatsi lapho khona Jehova atawucedza bonkhe bubi futsi ente tonkhe tintfo tibe tinsha? (Semb. 21:1-5) Siyaciniseka kutsi uyasilangatelela! Nobe kunjalo, akuhlali kumelula kuchubeka silindzele Jehova ngesineke, ikakhulukati nangabe sinetinkinga. Nangabe solo kungenteki loko lesikulindzele, singalahlekelwa litsemba.—Taga 13:12.
Nobe kunjalo, Jehova ufuna simlindzele ngesineke kuze alungise tintfo ngesikhatsi sakhe lesifanele. Yini leyenta kutsi alindzele loko kitsi? Yini lengasisita kutsi sijabule njengobe sisemlindzile?
YINI LEYENTA JEHOVA AFUNE KUTSI SILINDZE?
LiBhayibheli litsi: “Jehova ulindze ngesineke kuze anentele umusa, futsi utawusukuma kuze anikhombise sihawu. Ngobe Jehova unguNkulunkulu lowehlulela ngekulunga. Bayajabula bonkhe labo labahlale balindzele yena.” (Isa. 30:18) Lamavi a-Isaya bekacondziswe kumaJuda langalaleli. (Isa. 30:1) Nobe kunjalo, akhona lamanye emaJuda lebeketsembekile, futsi lamavi awaniketa litsemba. Lamavi atiniketa litsemba netinceku taJehova letetsembekile lamuhla.
Ngako kufanele silindze ngesineke ngobe naJehova ulindze ngesineke. Ubeke sikhatsi latawususa ngaso lelive libi, futsi ulindze lelo langa neli-awa kutsi lifike. (Mat. 24:36) Ngaleso sikhatsi, kutawuba sebaleni kutsi loko Develi bekakusho ngaJehova nangalabo labamkhontako bekungemanga. Jehova utawubese uyamsusa Sathane nalabo labamsekelako, kodvwa tsine ‘utasikhombisa sihawu.’
Kwanyalo, Jehova angahle angatisusi tinkinga tetfu, kodvwa uyasicinisekisa kutsi singajabula njengobe siselindzile. Njengobe Isaya asho, singajabula njengobe silangatelela nobe sinelitsemba lekutsi kutawenteka lokutsite lokuhle. (Isa. 30:18) a Singayitfola njani lenjabulo? Nati tintfo letine letingasisita.
YINI LESINGAYENTA KUZE SIJABULE NJENGOBE SILINDZILE?
Naka tintfo letinhle. Kuko konkhe kuphila kweNkhosi Davide, beyibone bubi lobunyenti. (Hla. 37:35) Nobe kunjalo, yabhala yatsi: “Thula embikwaJehova futsi umlindzele ngekulangatelela. Ungatfukutseli ngenca yemuntfu lophumelelako ebucilini bakhe.” (Hla. 37:7) Davide wakwenta loko lakusho ngekutsi anake setsembiso saJehova sekumsindzisa. Waphindze wanaka konkhe lokuhle Jehova lebekamentele kona. (Hla. 40:5) Nangabe natsi sinaka tintfo letinhle ekuphileni kwetfu, singanaki tinkinga, kutawuba melula kulindzela Jehova.
Sebentisa onkhe ematfuba kuze udvumise Jehova. Davide, lokungenteka wabhala Tihlabelelo 71, watsi kuJehova: “Ngitawuchubeka ngilindzele wena; ngitakudvumisa kakhulu kunakucala.” (Hla. 71:14) Bekatamdvumisa njani Jehova? Bekatawutjela labanye ngaye futsi ahlabele amdvumise. (Hla. 71:16, 23) NjengaDavide, singajabula njengobe silindzele Jehova. Siyamdvumisa nasenta umsebenti wekushumayela, nasicoca nalabanye nalapho sihlabela tingoma tekumdvumisa. Nawuphindze uhlabela ingoma yeMbuso, cabangisisa ngemavi ayo nekutsi ikwenta njani ujabule.
Vumela bazalwane bakho nabodzadze bakukhutsate. Ngesikhatsi Davide anetinkinga, watsi kuJehova: “Embikwebantfu bakho labacotfo ngitawetsembela egameni lakho.” (Hla. 52:9) Natsi bangasikhutsata bazalwane betfu nabodzadze, hhayi nje kuphela nasisemihlanganweni yetfu nobe nasenta umsebenti wekushumayela kodvwa nalapho sihlangene sicitsa sikhatsi ndzawonye.—Rom. 1:11, 12.
Yenta litsemba lakho libe nemandla. Tihlabelelo 62:5 titsi: “Ngilindzele Nkulunkulu ngekubeketela ngobe yena ulitsemba lami.” Litsemba lelicinile lifaka ekhatsi kuciniseka ngelikusasa, lokuyintfo lebalulekile nangabe kutawudzingeka silindze sikhatsi lesidze kunaleso besisicabanga. Kufanele siciniseke kutsi tetsembiso taJehova titawufezeka ngisho nobe kungadzingeka sitilindze sikhatsi lesingakanani. Singenta litsemba letfu libe nemandla ngekutsi sidadishe liVi laNkulunkulu, lokufaka ekhatsi tiphrofetho talo, kuvumelana kwalo kanye netintfo letiveta buntfu baJehova. (Hla. 1:2, 3) Ngetulu kwaloko, kufanele sichubeke ‘sithantaza ngemoya longcwele’ kuze sihlale sinebuhlobo lobuhle naJehova njengobe siselindzele kutsi kufezeke setsembiso sakhe sekusinika kuphila lokuphakadze.—Juda 20, 21.
NjengeNkhosi Davide, ciniseka kutsi Jehova uyabanaka labo labalindzele yena futsi ubakhombisa lutsandvo lwakhe lolucotfo. (Hla. 33:18, 22) Chubeka ulindzele Jehova ngesineke ngekutsi unake tintfo letinhle ekuphileni kwakho, umdvumise, uvumele bazalwane bakho nabodzadze kutsi bakukhutsate futsi uligcine linemandla litsemba lakho.
a Ligama lelihunyushwe ngekutsi ‘hlale ulindzile’ lingaphindze lisho “kulangatelela nobe kwetsemba kutsi intfo letsite itawenteka,” lokukhombisa kutsi kungekwemvelo kulindzela kutsi Jehova acedze kuhlupheka kwetfu.
