We be nalí, Jeobá ko nakí japi ta kilí buwéami nipo alí buwepo echalí rawé japalí echi ko isima japi anili. ¿Chúsiá Jeobá nakí japi echi riká nokiboa? Alí, ¿piri tamó iʼwírima kanílika buwea japi echi isima?

¿CHÚSIÁ JEOBÁ NAKÍ JAPI BUWEPO?

Echi Biblia aní: “Jeobá ko kilí niraa buwé jiti emi natimá, alí wilísima emi iʼwírimia. Jiti Jeobá ko ju bilé Onorúami wachía isíami. We kaníliami ju sinéami japi we inílika buwé echi” (Is. 30:18). Isaías oseli jena raʼicháliami echi judíos ke nijéwami (Is. 30:1). Nalí echalí niruili judíos japi a nijéwami nili alí japi anili Isaías iʼwírili jiti kilí buwema, alí ayénachó tamó iʼwírima jipi.

Nalí, ¿chúsiá kilí buwésaré? Jiti Jeobá ayénachó kilí buwé. Echi ko ma machí chu kabú alí chúrikó suwábima echi namuti chati jenaʼí Wichimóbachi alí buwé echalí rawé japalí echi riká isima (Mat. 24:36). Japalí ma nawasa echalí rawé, sinéami machimea japi echi Satanás ikaleka raʼíchili Jeobá jitra alí binoy siérvowala. Jeobá ko erta achama Satanás alí echi demonios alí suwábima echi pagótami chati, nalí iʼwírima binoy siérvowala.

Japalí ti bijí buwea muchuwi, a keʼré japi Jeobá ke suwábima echi namuti chati japi ta ikí. Nalí tamó ané japi oméripo kaníliami niya. Japi riká anili Isaías, tamujé omeri kaníliami niya japalí ti bijí buwé namuti aʼláala (Is. 30:18). a Nalí, ¿chúriká ti nokisáré jiti kaníliami nipo? Ma inepo naó namuti japi ta omeri nokayá.

CHÚRIKÁ KANÍLIAMI NIPO JAPALÍ TI BIJÍ BUWÉ

Natabo echi namuti aʼláala japi ta ikí. Echi silíami David ineli wiká namuti chati japalí biteili (Sal. 37:35). We be nalí, jériká osali: “Kilí asá alí we inílika buwé Jeobá. Kiti iy̱ó echi rijoi jitra japi echi chati namuti japi nátili aʼlá ikí” (Sal. 37:7). David ko binoy nijéwili jena busuréliami. ¿Chúriká? Echi ko we nátili japi Jeobá anili japi iʼwírima. Alí ayénachó we natéami niraa ineli japi Jeobá isili echi jitra (Sal. 40:5). Ati natásaká echi namuti  aʼláala japi ta ikí alí ke ko echi chati namuti, ke ti jilí nirabo buwea japi Jeobá isima.

Iʼwérika nokiboa sinibí walubéala anea Jeobá. Echi japi osali echi Salmo 71, japi mayéliwa japi David nili, jériká aneli Jeobá: “Nijé ko aminabi buwema; aminabi ni mi walubéala anema” (Sal. 71:14). ¿Chu isili jiti walubéala anema Jeobá? Echi ko raʼíchili jarecho Jeobá jitra, ayénachó wikaránili (Sal. 71:16, 23). Tamujé ayénachó omeri nokayá japi riká David japalí ti nawesa, japalí ti raʼicha Jeobá jitra tamujé amígowala yúa, tamujé téemala alí japalí ti wikarani. Jiti bela, japalí mi wikarani Jeobá, iʼwérili isí inamia japi aní echi canción. Suwaba jepuná tamó iʼwírima kaníliami niya japalí ti bijí buwea muchuwi japi Jeobá isima.

Napawika simáripo echi hermanos yúa. Japalí David olali karú ikiwáami, echi ko aneli Jeobá: “Japoná muchuwi japi mi nijewi ani bichíwima mujé riwalá, jiti aʼlá ju” (Sal. 52:9). Japi riká David napawili jarecho yúa japi nijéwami nili Jeobá alí echi riká iʼwérili nareli, tamujé ayénachó napawísaré echi hermanos yúa echoná napawíliwachi, japalí ta simía nawisasia alí ayénachó chuwé rawé ma (Rom. 1:11, 12).

Iʼwérika nokiboa aminabi we bichiwia japi ta buwea piré. Salmo 62:5 aní: “Ne bichíwali ni kilí buwé Onorúami jiti ni echi bichiwi”. We natéami ju japi ta we bichíwipo japi ta buwé, nalí wabé japalí ti mayé japi echi Jeobá rawéwala ke sapú nawá. Tákoré ti wiká bamíali buwésaré o kuabi ma, ata we bichíwisaré japi Jeobá ko a isima japi echi aní. ¿Alí chúriká we bichíwipo japi Jeobá isima? Bineka echi Onorúami Raʼicháala alí we aʼlá ineka echi profecías, ayénachó japi suwaba japi aní echi Biblia chopi iyiri ruyé alí suwaba echi namuti japi tamó bineri Jeobá jitra (Sal. 1:2, 3). Ayénachó ti ke riwésaré tania Jeobá echi espíritu santo jiti tamó iʼwírima we aʼlá amigo niya echi yúa japalí chéami ma ti oméripo sinibí pirea (Jud. 20, 21).

Japi riká echi silíami David, ati aʼlá machí japi Jeobá ko we natéami niraa iné echi japi buwea muchuwi japi echi isima alí néwariwéliti japi we galé echi (Sal. 33:18, 22). Jiti ta ke riwepo kaníliami niya japalí ti bijí buwea muchuwi japi Jeobá isima, natabo echi namuti aʼláala japi ta ikí, walubéala anepo Jeobá, napawika simáripo echi hermanos yúa alí iʼwérika nokiboa aminabi we bichiwia japi ta buwea piré.