Faie mitamà ty Jehovah fa handigne i fotoagne fa tinondro’ey am-paharetagne tikagne. Nagnino reke ro mitamà izay amantikagne? Ino ty hagnampe antika ho fale avao naho fa mandigne i Jehovah?

NAGNINO TY JEHOVAH RO MITAMÀ FA HANDIGNE AZE TIKA?

Hoe ty Baiboly: “Mbe mandigne avao ty Jehovah, satria te hitrétré anareo, le hiongake reke satria te hamindra fo ama’areo. Ty anto’e, Andrianagnahare ty rare’e ty Jehovah, le sambatse ze mitamà aze.” (Isaia 30:18) Nivantagne tamy i Jiosy nimafe loha rey o reha Isaia mpaminany iohoe. (Isaia 30:1) Faie nagnomey fanantenagne ty Jiosy ila’e tsy nivalike o rehake rehoe. Mbe magnomey fanantenagne hoahy ty vahoa i Jehovah tsy mivalike amy izao ka o rehake reo.

Mila mandigne areke tika satria ndra i Jehovah ka mandigne. Fa nanondro fotoagne hamaragnagne ty tontolo toy reke, le mandigne ty hiavia o lera naho o andro iohoe. (Mat. 24:36) Amy ze fotoagne zay, le hazava soa tie diso ty fagnaratia i Satana i Jehovah naho ty vahoa’e. Avy eo ty Jehovah handringagne i Satana naho ze ndaty manohagne aze, faie “hitretré” antikagne Reke.

Amparake ty hiavia izay, le va’e tsy hafaha i Jehovah ty olagne manjò antika, faie magnomey toky antika reke fa afake ty ho fale avao tika ndra tie mandigne izay aza. Arake ty nirehafe Isaia, le afake ty ho fale avao tika naho fa mandigne ty raha soa tamaentikagne. (Isaia 30:18) a Ino ty hagnampe antika ho fale? Misy raha efatse retoa.

FALE AVAO NDRA TIE MANDIGNE

Mifantoha amy ty raha soa. Niatreke olagne maro ty Davida Mpanjaka tagnate ty androm-piaigna’e. (Sal. 37:35) Izao ty nisorate’e: “Toko’e hitsigne agnatreha i Jehovah eo rehe, le handigne aze avao. Ko boseke amy ty ndaty mahavita magnatanterake ty raha raty safirie’e hatao.” (Sal. 37:7) Nifantoke tamy ty raha natao i Jehovah hagnampeagne aze avao ty Davida. Ze fitahiagne nimea i Jehovah aze ty tena nifantoha’e fa tsy ty olagne natrehe’e. (Sal. 40:5) Naho fa mifantoke  amy ty raha soa tamaentika avao tika fa tsy mifantoke amy ty raha raty miseho, le tsy ho sarotse amantika ty handigne i Jehovah.

Miderà i Jehovah isake tie afake manao izay. Nirehake hoe izao tamy i Jehovah ty Davida naho fa nanoratse ty Salamo 71: “Handigne azo avao raho, sady vao mainke hidera azo.” (Sal. 71:14) Akore ty fomba nidera’e i Jehovah? Nirehake tamy ty hafa ty miomba i Jehovah naho nihira fideragne ho aze reke. (Sal. 71:16, 23) Manahake i Davida le afake ty ho fale ka tika naho fa mandigne i Jehovah. Afake midera aze tika naho fa amy i fanompoagney ey naho fa mideba le naho fa mihira. Naho fa mihira ty hira i Fanjakagney rehe, le saintsaigno ty togno i hiray naho ty fomba agnampea izay azo ho fale.

Mangalà fampaherezagne boake amo o mpiara-manompò. Naho fa niatreke olagne ty Davida, le hoe reke tamy i Jehovah: “Hatoroko agnatreha o ndaty tsy mivalike ama’o reo fa tena mitamà ty tahina’o raho.” (Sal. 52:9) Tsy tihoe naho fa am-pivoriagne agne avao ndra amy i fanompoagney ey avao ty ahafahantika mangalake fampaherezagne amo o mpiara-manompò, fa afake manao izay ka tika naho fa amy ty fotoagne hafa iarahantika amy iareo.​—Rom. 1:11, 12

Hamafeso ty fanantenà’o. Hoe ty Salamo 62:5: “Mandigne azo am-pilaminagne raho satria boake ama’o ty raha tamaeko.” Tena lahibey ty hagnamafesantika ty fanantenantika lohotsie naho tsy avy aniany arake ty nieretseretantika aze ty fara ty tontolo toy. Toko’e ho rese lahatse tika tie ho tanterake ty raha nampitamae i Jehovah ndra tie manao akore ty haela ty fotoagne andignasantika aze. Hagnamafe ty fanantenantika tika naho fa mianatse ty Saontsin’Agnahare agnisa izay i faminania ty Baiboly taloha fa nitanterake rey naho ty fomba nandikà i mpanoratse Baiboly sambe hafa rey aze. (Sal. 1:2, 3) Mila ‘mivavake tsy tapake ka tika mba hiasa amantika ty fagnahy masigne’ amy izay ho soa avao ty fifandrambesantika amy i Jehovah am-padignasagne ty hiavia i fiaignagne nainai’e tamaentikay.​—Joda 20, 21.

Tahafo ty Davida Mpanjaka le matokia fa mivazoho ze ndaty mandigne aze ty Jehovah sady tea’e iareo. (Sal. 33:18, 22) Mandignisa i Jehovah avao le mifantoha amy ty raha soa amy ty fiaigna’o, derao reke, mangala fampaherezagne boake amy ty hafa sady hamafeso avao ty fanantenà’o.