Mukondwengi Muchilindizga Yehova Mwakuzikira
KUMBI mukhumbisiska kuwona nyengu yo Yehova wazamutuzgiyapu vinthu vosi viheni pacharu ndi kupanga vinthu vosi kuja vifya? (Chivu. 21:1-5) Tikayika cha kuti mukhumbisiska. Kweni ntchipusu cha kulindizga Yehova mwakuzikira, ukongwa asani tikumana ndi masuzgu. Ve viyo chifukwa asani vo tilindizga viswera kufiska, vitamisa mtima.—Nthanthi 13:12, mazu ngamumphata.
Chinanga kuti ve viyo, Yehova wakhumba kuti timulindizgengi mwakuzikira kuti wazichitepu kanthu pa nyengu yo wakusankha. Ntchifukwa wuli wakhumba kuti tichitengi venivi? Ntchinthu wuli cho chingatiwovya kuti tikondwengi pa nyengu yo tilindizga?
NTCHIFUKWA WULI YEHOVA WAKHUMBA KUTI TILINDIZGENGI?
Bayibolu likamba kuti: “Yehova walindizga mwakuzikira kuti wakulongoni wezi, ndipu wazamuyuka kuti wakulongoni lisungu. Pakuti Yehova ndi Chiuta waurunji. Mbakukondwa ŵanthu wosi wo atimulindizga.” (Yesa. 30:18) Mazu ngenanga ngo Yesaya wangulemba, wangulembe Ayuda amtafu. (Yesa. 30:1) Kweni penga Ayuda anyaki akugomezgeka ndipu mazu ngenanga nganguŵapaska chilindizga. Ndipu ngatiŵapaska so chilindizga ateŵeti aku Yehova akugomezgeka mazuŵa nganu.
Tikhumbika kulindizga mwakuzikira chifukwa Yehova walindizga mwakuzikira. Iyu wakusankha nyengu yo wazamutuzgiyapu charu chiheni ichi, ndipu pasonu panu walindizga kuti zuŵa kweniso ora lenilo lifiki. (Mate. 24:36) Pa nyengu yeniyo, vazamuwoneke limu kuti vo Dyaboli wakambanga vakukwaskana ndi Yehova kweniso ateŵeti Ŵaki vaboza. Pavuli paki, Yehova wazamutuzgapu Satana limoza ndi weyosi yo we kuchigaŵa chaki, kweni isi ‘wazakutilongo lisungu.’
Pasonu panu, Yehova wangatuzgapu cha mayeseru ngo tikumana nangu kweni watitisimikiziya kuti tingakondwa pa nyengu yo tilindizga. Nge mo Yesaya wangukambiya, tingakondwa po tilindizga pamwenga kukhumbisiska kuti chinthu chamampha chichitiki. (Yesa. 30:18) a Kumbi tingachita wuli kuti tikondwengi? Vinthu vinayi vo ve mumphata umu vingatiwovya.
KUMBI TINGACHITA WULI KUTI TIKONDWENGI PA NYENGU YO TILINDIZGA?
Muŵanaŵaniyengi vinthu vamampha vo vichitika pa umoyu winu. Pa umoyu waki wosi, Fumu Davidi yingukumana ndi masuzgu nganandi. (Salimo 37:35) Chinanga kuti venga viyo, yingulemba kuti: “Ja cheti pa masu paku Yehova ndipu umulindizgi mwalinweka. Ungaguŵanga cha chifukwa cha munthu Yo wafiska viŵembu vo wanozga.” (Salimo 37:7) Davidi wangugwiriskiya ntchitu mazu ngenanga chifukwa waŵanaŵaniyanga vo Yehova wangumulayizga kuti wamutaskengi. Iyu wawonganga so ukongwa chinthu chechosi chamampha cho Yehova wamuchitiyanga. (Salimo 40:5) Asani nasi tiŵanaŵaniya vinthu vamampha vo vichitika pa umoyu widu mumalu mwakuŵanaŵaniya vinthu viheni pe, vitisuzgengi cha kulindizga Yehova.
Muthamikengi Yehova. Yo wangulemba Salimo 71 ndipu viwoneka kuti wenga Davidi wangukambiya Yehova kuti: “Ini ndilutirizgengi kulindizga; ndisazgiyengeku kukuthamikani.” (Salimo 71:14) Kumbi iyu wamuthamikanga wuli Yehova? Wakambiyanga ŵanthu anyaki vakukwaskana ndi Yehova kweniso wambanga sumu zakumuthamika. (Salimo 71:16, 23) Nge Davidi, nasi tingakondwa tichilindizga Yehova. Titimuthamika asani tipharazga, tikambiskana ndi anyidu vakukwaskana ndi iyu kweniso asani titumba sumu zidu. Nyengu yinyaki po mwazamumbiya sumu ya Ufumu, muziyesesi kuŵanaŵaniya ukongwa uthenga wakuchiska wo we mu sumu yo.
Muchiskikengi ndi abali kweniso azichi. Pa nyengu yo Davidi wakumananga ndi masuzgu, wangukambiya Yehova kuti: “Pa masu pa ŵanthu ŵinu akugomezgeka, ndigomezgengi zina linu.” (Salimo 52:9) Nasi tingachiskika ndi abali ndi azichi ndipu tingachita venivi pa maunganu, mu upharazgi kweniso asani ticheza.—Aro. 1:11, 12.
Mukholesengi chilindizga chinu. Lemba la Salimo 62:5 likamba kuti: “Ndilindizga Chiuta mwachisisi chifukwa chilindizga changu chituliya kwaku iyu.” Chilindizga chakukho ntchakukhumbika ukongwa, ukongwa asani tiwona kuti umaliru wa charu ichi uswera. Tikhumbika kusimikiza kuti malayizgu ngaku Yehova ngazamufiskika kwali tingangalizga kwa nyengu yitali wuli. Tingaja ndi chilindizga chakukho asani tisambira Mazu ngaku Chiuta. Mwakuyeruzgiyapu, tiwanaŵaniyengi mauchimi ngosi ngo ngakufiskika, kukoliyana kwa Bayibolu chinanga kuti likulembeka ndi ŵanthu akupambanapambana kweniso vo Yehova wakuvumbuwa vakukwaskana ndi iyu. (Salimo 1:2, 3) Ndipuso tikhumbika kulutirizga ‘kupemphera mwakukoliyana ndi mzimu wakupaturika’ kuti tilutirizgi kuja pa ubwezi wakukho ndi Yehova, tichilindizga kuti wazifiski layizgu laki lakukwaskana ndi umoyu wamuyaya.—Yuda 20, 21.
Nge Fumu Davidi, musimikizengi kuti Yehova wawona ŵanthu wo atimulindizga ndipu watiŵalongo chanju Chaki chambula kumala. (Salimo 33:18, 22) Lutirizgani kulindizga Yehova mwakuzikira mwa kuŵanaŵaniya vinthu vamampha vo vichitika pa umoyu winu, kumuthamika, kuchiskika ndi Akhristu anyinu kweniso kulutirizga kuja ndi chilindizga chakukho.
a Mazu ngo akungafwatuliya kuti ‘kulindizga ndi mtima wosi’ ngangang’anamuwa so “kukhumbisiska pamwenga kukhaza kuti chinthu chinyaki chichitikengi.” Venivi vilongo kuti mbuheni cha kukhumbisiska kuti Yehova watuzgepu masuzgu.
