Ambari ulolo, Jehovha o vbweta gu khuye hi vireya khu gu laphisa monyo kala a gira gilogyo khu tepo a yi vegisidego. Khu ginani a vbwetago gu khuye hi gira isoso? Ginani gi na hi phasago gu tsaka tepo hi vireyago?

KHU GINANI JEHOVHA A VBWETAGO GU KHUYE HI VIREYA?

Bhibhiliya yari khiyo: “Pfhumu Nungungulu a ngu lirela litshigu nya gu mi pwele wuhindzi; Uye a na simama a mi pwela wusiwana, kholu Pfhumu Nungungulu nya gululame; va kategide vatshavbo vale va mu tumbago.” (Isa. 30:18) Isaya a di loveya malito yaya Vajudha nya mba engisa. (Isa. 30:1) Ganiolu, vbakari nya Vajudha vovo, va di romo vambe Vajudha nyo tumbege, nigu malito yaya ma va ningide gutumba. Muhuno watshigu, malito yamamowo ma nga ninga gutumba sithumi nyo tumbege sa Jehovha.

Hi yede gu laphisa-monyo kholu Jehovha nuye a ngu laphisa-monyo. Uye a vegiside litshigu a na fuvisago litigo leli nyo vivbe, ganiolu a gu vireya litshigu ni ora yakone yi vboha. (Mat. 24:36) Ga litshigu lolo, si na wonega guagani gu khiso satshavbo esi Sathane a nga ganeya khu Jehovha ni sithumi Saye malipha. Khavbovbo, Jehovha a na fuvisa Sathane ni vatshavbo va mu seketeyago, ganiolu Jehovha a na hi “pwel[a] wuhindzi.”

Na li si vbohi litshigu lolo, adzina saye Jehovha kha na nga dusa satshavbo sigaradzo sathu, ganiolu a ngu hi tiyisegisa gu khuye hi nga tsaka tepo hi vireyago. Kha nga a ganedego Isaya, hi nga tsaka na hi gu vireya ni gu tumba gu khethu gilo nya gyadi gi na girega. (Isa. 30:18) a Sa gu kodzega kharini isoso? Hongoleni hi wona 4 silo si na hi phasago.

GINANI GI NA HI PHASAGO GU TSAKA TEPO HI VIREYAGO?

Vega gupima ga esi nya sadi. Pfhumu Dhavhidhe wonide silo nyo vivbe ngudzu womini gwaye. (Ndzi. 37:35) Uye a di lova gu khuye: “Nyi wonide muthu nya guvivbe na tade khu gu dzi gugumugisa, a nava gu fanana ni simbo nya gunyuge wa Libhanoni.” (Ndzi. 37:7) Dhavhidhe a di landrisa wusingalagadzi  wowu a bwe a vega gupima avba nya gitumbiso gya Jehovha nya gu mu vbulugise. Uye gambe a di gu bonga khu satshavbo silo nya sadi esi Jehovha a mu giredego. (Ndzi. 40:5) Ha gu vega gupima avba nya silo nya sadi womini gwathu hi bwe hi potsa gu vega gupima avba nya sigaradzo sathu, si na hi vbevbugeya gu vireya Jehovha.

Vbwetedzeya mathomo gasi gu ganeya gwadi khu Jehovha. Mulovi nya Ndzimo 71, adzina saye Dhavhidhe, a di embeya Jehovha gu khuye: “Aholu, eni nyi na vega gwago gutumba gwangu, nyi na simama gu gu dhumisa gikhati gyatshavbo.” (Ndzi. 71:14) Dhavhidhe a di hadzi dhumisa kharini Jehovha? Uye a di hadzi gu bhuleya vambe khu Jehovha a bwe a mu embeleya dzindzimo. (Ndzi. 71:16, 23) Gu fana ni Dhavhidhe, anethu hi nga simama na hi tsakide na hi gu vireya litshigu la Jehovha. Ethu hi ngu mu dhumisa khu gu tshumayela, khu mabhulo yathu ya tshigu ni tshigu ni gu embeleya dzindzimo dzathu. Khu kharato, ga mitshangano yi landreyago, tepo u embeleyago mweyo nya dzindzimo dzathu, vega gupima avba nya malito ni edzi ma tsakisago khidzo monyo wago.

Tiyiswa khu vandriyathu. Tepo Dhavhidhe a nga tshangana ni sigaradzo, a di embeya Jehovha gu khuye: “Mbeli nya sihathwa sago nyi na rungudza lina lago.” (Ndzi. 52:9) Anethu hi ngu tiyiswa khu vandriyathu, nasiri basi mitshanganoni ni thumoni nyo tshumayele, ganiolu ni tepo hi vbungadzago hatshavbo. — Rom. 1:11, 12.

Tiyisa gutumba gwago. Ndzimo 62:5 yari khiyo: “Hefemulo wangu wa gu [vireya] Nungungulu basi, kholu gutumba gwangu gwa guta khavbo gwaye.” Si na ni lisima gu tiyisa gutumba gwathu, ngudzu-ngudzu olu hi vireyago mahegiso nya mafu yaya khu tepo nyo laphe. Hi yede gu tiyisega gu khethu satshavbo situmbiso sa Jehovha si na tadzisega, na yi si khathadzisegi tepo hi na vireyago. Ethu hi nga tiyisa gutumba gwathu khu gu hevbula Lito la Nungungulu. Khu giyeyedzo, gu dundrugeya khu siprofeto nya Bhibhiliya si nga tadzisega, edzi sipandre nyo khaguri si pwananago khidzo ni simbe ni esi Jehovha a ganedego maningano khu makhalelo yaye. (Ndzi. 1:2, 3) Anethu hi yede gu ‘gombeya na hi gu thangedwa khu liphuvbo nya guage’ gasi hi si kodza gu tiyisa wupari wathu ni Jehovha tepo hi vireyago gu tadzisega nya gitumbiso nya womi nya mba vbeya. — Judha 20, 21.

Gu fana ni Dhavhidhe, tumba gu khuwe Jehovha a ngu khathaleya, gu vhikeya ni gu yeyedza lihaladzo nyo tumbege vatshavbo vale va mu vireyago. (Ndzi. 33:18, 22) Khu kharato, simama gu vireya Jehovha khu gu laphisa monyo, khu gu vega gupima ga silo nya sadi si giregago womini gwago, gu mu dhumisa, gu tiyiswa khu vandriyathu ni gu tiyisa gutumba gwago.