Pele Jehova uyanda kuti tulindile cakukkazika moyo kusikila akabweze ntaamu aciindi cakwe ncabikkide. Nkaambo nzi ncayanda kuti tucite boobo? Ncinzi cikonzya kutugwasya kuba bantu bakkomene ciindi notulindila?

NKAAMBO NZI JEHOVA NCAYANDA KUTI TULINDILE?

Bbaibbele lyaamba kuti: “Jehova ulalindila kakkazikide moyo kuti amufwide luzyalo, eelyo ulanyamuka kuti amufwide luse. Nkaambo Jehova ngu Leza uubeteka kabotu. Balikkomene boonse aabo bamulangila.” (Is. 30:18) Majwi aaya ngaakaamba Isaya, kumatalikilo wakali kwaambila ba Juda bazangi. (Is. 30:1) Pele akati kaba Juda aaba kwakali bamwi ibakali kusyomeka, balo ibakaba aabulangizi akaambo kamajwi aaya. Mazuba aano, majwi ngoonya aaya abapa bulangizi babelesi ba Jehova basyomeka.

Aboobo tweelede kulindila cakukkazika moyo nkaambo awalo Jehova ulalindila kakkazikide moyo. Wakabikka kale ciindi nayoonyonyoona bweende bwazintu oobu, pele ulalindila kuti buzuba oobo aciindi zisike. (Mt. 24:36) Aciindi eeco, ciyoolibonya caantangalala kuti makani ngaakaamba Diabolosi kujatikizya Jehova abaabo bamubelekela ngakubeja. Mpoonya uyoomugusya Saatani akunyonyoona baabo boonse ibanooli kulubazu lwakwe, pele swebo ‘uyootufwida luzyalo.’

Calino, ambweni Jehova inga tanaagwisya mapenzi eesu, pele utusyomezya kuti tulakonzya kuba bantu bakkomene ciindi notulindila. Kweelana ambwaakaamba Isaya, tulakonzya kukkomana ciindi notulindila cintu cimwi cibotu kuti cicitike. (Is. 30:18) Ino inga twalujana buti lukkomano oolo? Kuli zintu zyone zikonzya kutugwasya.

MBOMUKONZYA KUKKOMANA CIINDI NOMULINDILA

Amubikkile maano kuzintu zibotu. Mwami Davida wakalibonena zintu zibyaabi mubuumi bwakwe boonse. (Int. 37:35) Pele wakalemba kuti: “Koumuna kumbele lya Jehova akumulindila cakuyandisisya. Utacimwi akaambo kamuntu uuzwidilila kuzuzikizya makanze aakwe mabi.” (Int. 37:7) Davida lwakwe wakacita oobo kwiinda mukubikkila maano kucisyomezyo ca Jehova cakuti uyoomugwasya. Alimwi wakali kulumba kapati akaambo kazintu zibotu  zyoonse nzyaakali kumucitila Jehova. (Int. 40:5) Ikuti andiswe twabikkila maano kuyeeya zintu zibotu zitucitikila mubuumi bwesu ikutali mapenzi ngotujisi, ciyootuubila-ubila kulindila Jehova.

Amujate bubi kutembaula Jehova. Mulembi wabbuku lya Intembauzyo 71, uulangilwa kuti ngu Davida, wakaamba boobu kuli Jehova: “Ndilazumanana kulindila; ndinookutembaula kapati kwiinda kaindi.” (Int. 71:14) Ino wakali kuyoomutembaula buti Jehova? Wakali kuyoocita oobo kwiinda mukwaambila bamwi kujatikizya Jehova alimwi akumwiimbila nyimbo. (Int. 71:​16, 23) Mbubwenya mbuli Davida, tulakonzya kujana lukkomano ciindi notulindila Jehova. Tulamutembaula kwiinda mumulimo wesu wakukambauka, mumibandi yesu yabuzuba abuzuba alimwi amunyimbo zyesu zyabukombi. Aboobo ciindi ciboola mwaakutalika kwiimba lwiimbo lwa Bwami, amukabikkile maano kumajwi aali mumo akubona mbwaakonzya kumupa kukkomana.

Amukulwaizyigwe abakwesu abacizyi kwiinda mukuyanzana ambabo. Ciindi Davida naakajana mapenzi, wakaamba boobu kuli Jehova: “Kumbele lyabantu bako basyomeka, ndinoosyoma zina lyako.” (Int. 52:9) Andiswe tulakonzya kukulwaizyigwa abakwesu abacizyi ciindi notuyanzana ambabo kumiswaangano, mumulimo wamumuunda alimwi amukulikondelezya.—Rom. 1:​11, 12.

Amuyumye bulangizi bwanu. Intembauzyo 62:5 yaamba kuti: “Ndiluumwine kandilindila Leza nkaambo bulangizi bwangu buzwa kulinguwe.” Cilayandika kapati kuba abulangizi buyumu kwaambisya ciindi mamanino naatasika aciindi ncotwali kuyeeya kuti alasika. Tweelede kuba masimpe kuti zisyomezyo zya Jehova ziyoozuzikizyigwa ncobeni tacikwe makani naa tweelede kulindila kwaciindi cilamfwu buti. Aboobo tulakonzya kuyumya bulangizi bwesu kwiinda mukwiiya Jwi lya Leza. Mucikozyanyo, tulakonzya kuyeeya businsimi ibwakazuzikizyigwa kale, mbozyeendelana zintu nzyobakalemba balembi ba Bbaibbele baindene-indene, alimwi amakani ngayubununa Jehova kujatikizya nguwe. (Int. 1:​2, 3) Kuyungizya waawo, tweelede kuzumanana ‘kupaila amuuya uusalala’ kutegwa tuzumanane kuba acilongwe cibotu a Jehova ciindi notulindila kuzuzikizyigwa kwacisyomezyo cakwe cabuumi butamani.—Jud. 20, 21.

Mbubwenya mbuli Mwami Davida, amube alusyomo lwakuti Jehova ulababona aabo bamulindila akubatondezya luyando lutamani. (Int. 33:​18, 22) Aboobo amuzumanane kulindila Jehova cakukkazika moyo kwiinda mukubikkila maano kuyeeya zintu zibotu izicitika mubuumi bwanu, mukumutembaula, mukukulwaizyigwa abakwesu abacizyi alimwi akuzumanana kuyumya bulangizi bwanu.