Nilokoswiritano, Yehovha u langutele leswaku hi lehisa mbilu loko ha ha rindzele leswaku hi nkarhi wakwe a endla leswi a hi tshembiseke swona. Hikwalahokayini a langutele leswaku hi endla tano? I yini leswi nga hi pfunaka leswaku hi rindza hi tsakile?

HIKWALAHOKAYINI YEHOVHA A LANGUTELE LESWAKU HI RINDZA?

Bibele yi ri: “Yehovha u lunghekele ku mi twela vusiwana, u ta mi khoma hi tintswalo. Hikuva Yehovha i Xikwembu xo lulama. Va tsaka lava tshamaka va n’wi languterile.” (Esa. 30:18) Marito lawa ya Esaya a ma byeriwa Vayuda lava a va ome tinhloko. (Esa. 30:1) Kambe a ku ri ni Vayuda van’wana lava a va tshembekile naswona marito lawa ma va nyike ntshembo. Namuntlha marito lama fanaka ma nyika malandza yo tshembeka ya Yehovha ntshembo.

Kutani hi fanele hi lehisa mbilu hikuva Yehovha na yena u endla tano. U veke nkarhi lowu a nga ta herisa misava leyi naswona u yimele siku ni nkarhi wa kona leswaku wu fika. (Mat. 24:36) Hi nkarhi wolowo, swi ta va erivaleni leswaku swihehlo leswi Diyavulosi a hehleke Yehovha ni lava N’wi gandzelaka i mavunwa. Kutani u ta herisa Sathana ni vanhu vakwe ivi hina A hi “khoma hi tintswalo.”

Swi nga endleka enkarhini wa sweswi Yehovha a nga yi susi miringo leyi hi nga langutanaka na yona kambe wa hi tiyisekisa leswaku hi nga tsaka loko ha ha rindzile. Hilaha Esaya a vuleke hakona, hi nga tsaka loko ha ha rindzele swilo leswinene leswaku swi endleka. (Esa. 30:18) a Hi nga wu kuma njhani ntsako wolowo? Ku ni swilo swa mune leswi nga hi pfunaka.

LESWI NGA HI PFUNAKA LESWAKU HI TSAKA LOKO HA HA RINDZILE

Ehleketa hi swilo swa kahle leswi endlekaka evuton’wini bya wena. Hosi Davhida u hlangane ni swilo swo tala swo biha evuton’wini byakwe. (Ps. 37:35) Hambiswiritano, u tsale a ku: “Miyela u ku whii, emahlweni ka Yehovha, n’wi rindzele u nga heli mbilu. U nga hlundzukisiwi hi munhu loyi makungu yakwe yo biha ma humelelaka.” (Ps. 37:7) Davhida u  ma tekele enhlokweni marito wolawo hi ku tshembela eka Yehovha leswaku a n’wi ponisa. Nakambe a a swi tlangela swilo hinkwaswo leswinene leswi Yehovha a a n’wi endlela swona. (Ps. 40:5) Hilaha ku fanaka, na hina swi ta hi olovela ku rindzela Yehovha loko ntsena hi nga tshameli ku ehleketa hi swilo swo biha leswi hi endlekelaka, kambe hi ehleketa ntsena hi swilo leswinene leswi Yehovha a hi endlelaka swona.

Tshama u khomekile hi ku dzunisa Yehovha. Swi vonaka onge Davhida hi yena mutsari wa Pisalema 71 naswona u te: “Ndzi ta tshama ndzi rindzile; ndzi ta ku dzunisa ku tlula eku sunguleni.” (Ps. 71:14) A a ta n’wi dzunisa njhani Yehovha? A ta byela van’wana hi Yehovha ni ku yimbelela tinsimu to n’wi dzunisa. (Ps. 71:​16, 23) Ku fana na Davhida, hi nga swi kota ku tsaka loko ha ha rindzele Yehovha. Hi dzunisa Yehovha loko hi chumayela van’wana, hi vulavula hi yena eka maxaka ni vanghana ni loko hi yimbelela tinsimu ta Mfumo. Loko enkarhini lowu taka u yimbelela risimu ra Mfumo, ehleketisisa hi marito ya rona ni ndlela leyi ri ku khutazaka hayona.

Pfumelela vamakwerhu va ku khutaza. Loko Davhida a langutane ni miringo, u byele Yehovha leswi: “Exikarhi ka vanhu va wena vo tshembeka, ndzi ta tshemba vito ra wena.” (Ps. 52:9) Na hina vamakwerhu va nga hi khutaza ku nga ri loko hi ri etinhlengeletanweni ta vandlha kumbe eku chumayeleni ntsena kambe ni loko hi hlanganile leswaku hi titsakisa.—Rhom. 1:​11, 12.

Vana ni ntshembo lowu tiyeke. Pisalema 62:5 yi ri: “Ndzi rindzela Xikwembu ndzi miyerile, hikuva i xihlovo xa ntshembo wa mina.” I swa nkoka swinene ku va ni ntshembo lowu tiyeke ngopfungopfu loko makumu ma nga hatli ma fika hilaha hi ma rindzeleke hakona. Hi fanele hi tiyiseka leswaku switshembiso swa Yehovha swi ta endleka swi nga ri na mhaka leswaku hi nga ha boheka ku rindza nkarhi wo tanihi kwihi. Hi nga va ni ntshembo lowu tiyeke hi ku dyondza Rito ra Xikwembu, vuprofeta, ndlela leyi byi pfumelelanaka hayona ni vuxokoxoko lebyi kombisaka muxaka wa Xikwembu lexi Yehovha a nga xona. (Ps. 1:​2, 3) Nakambe hi fanele hi ya emahlweni hi “khongela hi moya wo kwetsima” leswaku hi tshama hi ri ni vuxaka lebyinene na Yehovha loko ha ha rindzele leswaku a hetisisa xitshembiso xakwe xa ku hi nyika vutomi lebyi nga heriki.—Yuda 20, 21.

Ku fana na Hosi Davhida, tiyiseka leswaku Yehovha u sirhelela lava N’wi rindzeleke naswona U va kombisa rirhandzu lerikulu. (Ps. 33:​18, 22) Tshama u rindzele Yehovha hi ku ehleketa hi swilo leswinene leswi endlekaka evuton’wini bya wena, u dzunisa Yehovha, u pfumela ku khutaziwa hi vamakwerhu ni ku tshama u ri ni ntshembo lowu tiyeke.