Hambileswo, Yehovha a lava swaku hi lehisa mbilu hi nyimela nkama lowu a nga ta lunghisa swilo hinkwaswu lani amisaveni. Hi mhaka muni Yehovha a lava swaku hi yendla leswo? Naswona i mpsini leswi nga ta hi pfuna swaku hi tama hi nyimela na hi tsakile?

HI MHAKA MUNI YEHOVHA A LAVA SWAKU HI LEHISA MBILU?

Bibele li li: “Yehovha a lunghekele ku mi twela wusiwana, a ta mi komba timpsalu. Hikusa Yehovha i Xikwembu xa ku lulama. Va tsaka lava tshamaka na va mu nyimelile.” (Esa. 30:18) Marito lawa ma nga tsaliwa hi muprofeta Esaya, a ma tsaleliwe Vayuda lava a va nga mu yingisi Yehovha. (Esa. 30:1) Kambe xikarhi ka Vayuda lava a ku ni vanhu van’wani lava a va tshembekile ka Yehovha naswona ku va va twe marito lawa swi va nyike ntshembo. Namuntlha vanhu va Yehovha loko va lerha marito lawa na vona va nga kuma ntshembo lowu fanaka.

Hina hi fanele hi lehisa mbilu hikusa na yena Yehovha wa lehisa mbilu. Phela Yehovha se wa swi tiva swaku a misava leyi ya ku biha a ta yi helisa siku muni kambe ni swoswi Yehovha wa ha lehisa mbilu na a nyimela nkama ni siku leli a nga ta yendla leswo. (Mat. 24:36) Hi siku leli Yehovha a nga ta yendla leswo swi ta tikomba swaku hinkwaswu leswi Sathana a nga swi vula hi Yehovha ni vanhu va Yena i mavunhwa. Se ndzhaku ka leswo Yehovha a ta helisa Sathana ni hinkwavu lava va nyimaka na Sathana. Kambe hina, Yehovha a ta hi twela wusiwana.

Na siku lelo li nga se fika, swi nga yendleka Yehovha a nga swi susi swikarhatu leswi hi kumanaka na swona kambe Yehovha a hi tiyisekisa leswaku hi nga swi kota ku tama hi tsaka na hi nyimela swaku a helisa swikarhatu swa hina. Hilani muprofeta Esaya a nga vula hi kona, swa koteka swaku hi tama hi tsaka na hi nyimela nchumu wawunene swaku wu hi yendlekela. (Esa. 30:18) a Kambe swi kotekisa ku yini leswo? A hi voneni 4 wa swilo leswi swi nga ta hi pfuna ku twisisa mhaka leyi.

I MPSINI LESWI SWI NGA HI PFUNAKA SWAKU HI TAMA HI TSAKA NA HI NYIMELA SIKU LA YEHOVHA?

Pimisa hi swilo swaswinene. Hosi Davhida a vone wubihi la linyingi ka wutomi la yena. (Ps. 37:35) Hambileswo a tsale marito lawa: “Miyela u ku whii, phambheni ka Yehovha. Mu rindzele na u nga heli mbilu. U nga kwatisiwi hi munhu lweyi maplanu ya yena ya ku biha ma humelelaka.”  (Ps. 37:7) Davhida a ma tirhisile marito lawa ka wutomi la yena hi ku pimisa hi ntshembo lowu Yehovha a a mu nyike wona. Naswona a a khensa hi swilo hinkwaswu swaswinene leswi Yehovha a nga mu yendlela swona. (Ps. 40:5) Na hina loko hi yendla swa ku fana hi ku pimisa hi swilo swaswinene leswi hi nga na swona ka wutomi la hina, ku nga li ku pimisa hi swilo swa ku kala swi nga li swinene, swi ta hi vevukela kuva hi nyimela siku la Yehovha.

Tama u khomeka hi ku dzunisa Yehovha. Lweyi a nga tsala buku la Tipisalema 71, swi nga yendleka ku li Davhida naswona a te: “Ni ta tshama na ni rindzile; ni ta ku dzunisa ku tlula ku sunguleni.” (Ps. 71:14) Davhida a a ta mu dzunisisa ku yini Yehovha? A a ta yendla leswo hi ku vulavula hi Yehovha ni vanhu van’wani a tlhela a yimbelelela Yehovha tinsimu ta ku mu dzunisa. (Ps. 71:16, 23) Ku fana na Davhida, na hina hi nga tama hi tsaka na hi nyimela siku la Yehovha naswona hi dzunisa Yehovha loko hi li ka ntirho wa ku chumayela, ka mabulu ya hina ya siku ni siku ni loko hi yimbelela tinsimu ta hina. Se, ka khambi li taka u nga ta yimbelela lin’we la tinsimu ta hina, swi ngo yini u pimisa hi marito ya lona ni swaku ma yi khumbisa ku yini mbilu ya wena?

Tiyisiwa hi vamakwerhu. Nkama Davhida a nga kumana ni swikarhatu, yena a byele Yehovha a ku: “Xikarhi ka vanhu va wena va ku tshembeka, ni ta tshemba vito la wena.” (Ps. 52:9) Phela vamakwerhu va nga hi tiyisa loko hi li na vona amintlhanganwini ni ka ntirho wa ku chumayela. Naswona va nga hi tiyisa loko hi heta nkama na vona ka swiyimu swin’wani. — Rom. 1:11, 12.

Tiyisa ntshembo wa wena. Tipisalema 62:5 yi li: “Ni rindzela Xikwembu na ni miyelile, hikusa ntshembo wa mina wu ta hi ka xona.” I swa lisima hintamu ku tiyisa ntshembo wa hina ngopfungopfu loko se ku li khale na hi nyimela swaku siku la Yehovha li fika. Hi fanele hi tiyiseka swaku switshembiso hinkwaswu leswi Yehovha a swi yendlaka swi ta hetiseka ku nga na mhaka swaku se ku hundza nkama muni na hi swi nyimela. Hi fanele hi tiyisa ntshembo wa hina hi ku djondza Bibele, wuprofeta la le Bibeleni, swaku leswi swi nga ndzeni ka Bibele swi twananisa ku yini ni swin’wani leswi Yehovha a hi byelaka swona mayelana ni wumunhu la yena. (Ps. 1:2, 3) Swin’wani leswi hi nga swi yendlaka swaku hi tiyisa ntshembo wa hina i ku khongela ka Yehovha hi kombela leswaku a hi nyika moya wa yena wa ku kwetsima leswaku hi tiyisa wunghanu la hina na yena na hi nyimela swaku a hetisisa xitshembiso xa yena xa ku hi nyika wutomi la ku kala li nga heli ka nkama lowu taka. — Yud. 20, 21.

Ku fana na Hosi Davhida, tiyiseka swaku Yehovha wa va hlayisa, wa va vhikela, naswona wa va rhandza hinkwavu lava va lehisaka mbilu va Mu nyimela. (Ps. 33:18, 22) Hi mhaka leyo, tama u nyimela Yehovha na u lehisa mbilu. Nkama lowu u yendlaka leswo pimisa hi minchumu yayinene leyi yi ku yendlekelaka ka wutomi la wena, dzunisa Yehovha, tiyisiwa hi vamakwerhu naswona tiyisa ntshembo wa wena wa nkama lowu taka.