Nájkiruka no fásiliika Tata Diosï Jeoba uékasïndi eskachi tekaantskua xarhataaka ka eskachi erokuarhiaka imani jurhiatikuani enga Tata Diosï Jeoba eratsetini jakaia ambantskantani. ¿Andisï uéjki eskachi ísï uaaka? Ka ¿ambejtsïni jarhuataa tsípikua jingoni irekani jarhani enga jamberi janoaka ima jurhiatikua?

ANDISÏ TATA DIOSÏ JEOBA UÉJKI ESKACHI NO KUATANTAAKA

Ju je exeni ambe enga Biblia uandajka: “Tata Diosï Jeoba tekaantskua jingoni erokuarhixati paraksïni kóntperatechani íntskuani ka jauaraati paraksï pʼamojperata xarhatacheni. Jimboka Jeoba Tata Diosï máeska jurhimbikueri. Tsípisïndiksï iámindu imeecha engaksï mintsinharhikua jingoni erokani jaka imani” (Is. 30:18). Isaías ini uandakuechani judiuechani arhiaspti engaksï no nani máru kurhanguenga (Is. 30:1). Joperu jarhasptiksï máru judiuecha engaksï sési marhuakuni japka Tata Diosï, jimboksïsï i uandakuecha sési pʼikuastaantapti imeechani ka juchantsïntujtsïni uaati sési pʼikuastantani.

Jiájkani, ¿andichisï jatsi para tekaantskua jingoni erokuarhini? Jimboka Tata Diosï Jeobajtu tekaantskua jingoni erokuarhixaka. Ima jatsikuarhetixatia jurhiatikuani ka jandora káni enga kʼamajkuaka ini parhakpinini, joperu jatsiti para erokuarhini eska niáraka ima jurhiatikua (Mat. 24:36). Enga niáraka ima jurhiatikua, xarharaati eska iámindu ambe enga Noambakiti xáni uandaka Tata Diosï Jeobaeri ambe ka imeeri marhuariicheeri chkuanderakua ambeespka. Jiáni kénditaati Satanásini ka iámindu imeechani engaksï imani jingoniika. Joperu imeeri marhuariichani aiakuasïndi eska ‘pʼamojperata xarhatakuauaka’.

Enga jamberi niáraaka ima jurhiatikua, jamberijtsïni Tata Diosï Jeoba no kénditacheani iámindu uandanhiateechani. Joperujtsïni aiachisïndi eskachi uaaka tsípikua jingoni irekani. Inde ambesï uandapti Isaías, uaakachi tsípikua jingoni irekuarhini enga jamberi janoaka ima jurhiatikua engachi xáni uékani jakaia (Is. 30:18). a ¿Ambejtsï jarhuataa? Ju je exeni tʼámu ambe engachi jatsika para úni.

NÉNACHI UAA TSÍPIKUA JINGONI IREKANI ENGA JAMBERI JANOAKA IMA JURHIATIKUA

Ju je imani ambe eratseni engajtsïni jarhuataaka. Jiáni enga Rei Dabidi irekapka exespti uánikua ambe enga no sési japka (Sal. 37:35). Nájkiruka indeni ambe exeenga  ima ísï karaspti: “Pínasku pakara Tata Diosï Jeobani japarini ka tekaantskua jingoni erokani ja. Asï jáma ikiani enga kʼuiripu ma jirinhakuntani jarhajka néna no sési ambe niátani ka enga sési nikuaka” (Sal. 37:7). Dabidi ini ambesï úpti. ¿Néna? Sánderu imani ambe eratsesïreendi eska Tata Diosï Jeoba pʼímutantapiringa. Ka ístu kánikua jukaparharasïreendi ambe enga Tata Diosï xáni úpkia imani jimbo (Sal. 40:5). Engachi juchajtu májkueni úska, ka eratsentanchi sési jásï ambe engachi nitamakuarhini jaka ka no imani ambe engachi no sési úkuarhinchajka, sánderu fásiliuati eskachi erokuarhiaka imani jurhiatikuani enga Tata Diosï Jeoba sési peentaaka iámu ambe.

Ju je méntkisï jirinhakuntani néna kʼéri ambe Tata Diosï Jeobani. Ima enga Salmo 71 karaka, jamberi Dabidiipti enga arhipka Tata Diosï Jeobani: “Ji seguiriini jauaka erokuarhini; sánderukeni kʼéri ambe arhiaka” (Sal. 71:14). ¿Ambe úsïreni para kʼéri ambe arhini? Aianguasïreendi máteruechani Tata Diosï Jeobaeri ambe ka pirekusïrendi (Sal. 71:​16, 23). Juchajtuchi uaaka májkueni úni eska Dabidi, kʼéri ambe arhini Tata Diosïni engachi aianhpijka, engachi aianguajka Tata Diosï Jeobaeri ambe juchaari amiguechani, juchaari familiani ka engachi pirekujka. Ísï jimbo engajtsï ménderu pirekuaka Tata Diosï Jeobani, jánguarhinta je jingontku kurhaani ambe engajtsï pireni jaka. Iámindu inde ambejtsïni jarhuataati parachi tsípikua jingoni irekuarhini, engachi jamberi erokani jauaka imani jurhiatikuani.

Ju je tiempu arhutani parachi juchaari erachiicha jingoni jarhani. Enga Dabidi uandanhiateechani jatsiapka arhispti Tata Diosï Jeobani: “Mintsikaaka chiiti nombrini imeechani japarini engaksïni no méni jurajkujka” (Sal. 52:9). Dabidi úspti uinhapentani enga kúrhiapka máteru Tata Diosï Jeobaeri marhuariichani, juchajtuchi uaaka uinhapentani engachi jarhaska juchaari erachiicha jingoni tánguarhikuecharhu, aianhpikuarhu ka ístu máteru jurhiatikuechani jimbo (Rom. 1:​11, 12).

Ju je sánderu mintsikani ambe engachi erokuarhini jaka. Salmo 62:5 arhisïndi: “Ji méntkuni no sáni kuatantasïnga erokani Tata Diosïni, jimbokarini imasï íntskuaka ambe engani xáni erokuarhini jaka”. Kánikua jukaparhakuesti mintsikani eska janoaka ambe engachi erokuarhini jaka ka sánderia enga ísï xarharani jauaka eska ióndaxaka. No arhiparini na xánchi ióni jatsiski para erokuarhini, jatsiskachi para seguru jarhani eska Tata Diosï Jeoba uaaka ambe engajtsïni aiachika. ¿Ka nénachi uaa sánderu mintsikani ini ambe? Jorhenguarhiparini Bibliani, exeparini na enga terukuntajka iámu Biblia, eratsentani ambe engaksï uandajka profesiecha, ka ístu engachi eratsentaska ambe engachi xáni jorhenguarhijka Tata Diosïiri Jeobaeri ambe (Sal. 1:​2, 3). Ístuchi jatsiska para seguiriini kómarhini Tata Diosïiri Jeobani ka kurhakuni imeeri espiritu santuni parakajtsïni jarhuataaka seguiriini sési pájperani imani jingoni engachi jamberi erokuarhiaka ambe engajtsïni aiachini jaka tsípikua para méntkisï (Jud. 20, 21).

Májkueni eska rei Dabidi, uaakachi seguru jarhani eska Tata Diosïri Jeobaeri eskuechaksï imeechani exeaxaka engaksï mintsikajka eska ima uaaka ambe ma ka eska ambakiti uékperakua xarhatakuauaka (Sal. 33:​18, 22). Ísï jimbo, parachi seguiriini tsípikua jingoni irekani engachi jamberi tekaantskua jingoni erokuarhini jauaka Tata Diosï Jeoba jurhiatikuani, ju je eratsentani sési jásï ambe engachi nitamakuarhijka, kʼéri ambe arhini Tata Diosï Jeobani, májku kʼéri jarhani juchaari erachiicha jingoni ka sánderu mintsikani imani ambe engachi erokuarhini jaka.