Kweni Yehova wakukhazga kuti timulindilirenge mwakuzikira, kuti wazakachitepo kanthu pa nyengo yake. Chifukwa wuli wakukhazga kuti timulindilirenge mwakuzikira? Kasi ntchivichi chingatovwira kuti tikondwenge apo tikumulindilira?

CHIFUKWA WULI YEHOVA WAKUKHAZGA KUTI TIMULINDILIRENGE?

Baibolo likuti: “Yehova wakulindilira waka kuti wamulongorani uwemi, ndipo wawukenge na kumulongorani lusungu. Pakuti Yehova ni Chiuta wa urunji. Mbakukondwa wose awo ŵakumulindilira.” (Yes. 30:18) Mazgu gha pa lemba ili ghakalutanga ku Ŵayuda ŵamtafu. (Yes. 30:1) Kweni pakaŵaso Ŵayuda ŵanyake ŵakugomezgeka, ndipo mazgu agha ghakaŵapa chigomezgo. Mazgu agha ghakupelekaso chigomezgo ku ŵateŵeti ŵakugomezgeka ŵa Yehova mazuŵa ghano.

Ntheura tikwenera kulindilira mwakuzikira chifukwa Yehova nayo wakulindilira mwakuzikira. Wali kutema kale nyengo iyo wazamuwuskirapo mgonezi uheni uwu, ndipo wakulindilira zuŵa ili na ora kuti likwane. (Mat. 24:36) Pa nyengo iyo, vizamuwonekerathu kuti vyose ivyo Dyabulosi wakuyowoyera Yehova kweniso ŵateŵeti ŵake ni vyautesi. Yehova wazamuparanya Satana na wose awo ŵali ku chigaŵa chake, kweni ise ‘wazamutilongora lusungu.’

Panyengo yasono Yehova wangawuskapo yayi masuzgo ghithu, kweni wakutisimikizgira kuti tingaŵa ŵakukondwa apo tikumulindilira. Nga umo Yesaya wakayowoyera, tingaŵa ŵakukondwa apo tikulindilira chinthu chiwemi kuti chichitikenge. (Yes. 30:18) a Kasi tingachita wuli kuti tikondwenge? Vinthu vinayi ivi vingatovwira.

UMO TINGAŴIRA ŴAKUKONDWA APO TIKULINDILIRA

Mughanaghanirenge viwemi. Themba Davide likakumana na vinthu vinandi viheni pa umoyo wake. (Sal. 37:35) Kweni likalemba kuti: “Khala chete pamaso pa Yehova na kumulindilira mwakuzika. Ungakwenyeleranga chara na munthu uyo vinthu vikumwendera makora.” (Sal. 37:7) Davide wakalondezga ulongozgi uwu pakughanaghanira  malayizgo ghose gha Yehova. Wakawonangaso vitumbiko ivyo Yehova wakamupa. (Sal. 40:5) Para nase tikughanaghanira chomene za vinthu viwemi ivyo vikuchitika pa umoyo withu na kuleka kuŵika mtima pa viheni, chiŵenge chipusu kulindilira Yehova.

Mulumbenge Yehova. Mulembi wa Salimo 71, uyo wakwenera kuti ni Davide, wakati kwa Yehova: “Nilindilirenge nipera; nilutilirenge kumulumbani.” (Sal. 71:14) Kasi wakamulumbanga wuli Yehova? Wakaphalirangako ŵanji vyakukhwaskana na Yehova kweniso kumwimbira sumu zamalumbo. (Sal. 71:​16, 23) Nga ni Davide, nase tingaŵa ŵakukondwa uku tikulindilira Yehova. Tikumulumba para tikupharazga, tikudumbiskana na ŵabwezi na ŵamumbumba yithu vyakukhwaskana na iyo, kweniso para tikwimba sumu zamalumbo. Ntheura nyengo yiliyose para mukwimba sumu za Ufumu, ghanaghaniranipo chomene za uthenga uwo zikumuphalirani.

Muchezgenge na ŵabali na ŵadumbu kuti mukhozgeke. Apo Davide wakasangananga na masuzgo, wakamuphalira Yehova kuti: “Pamaso pa ŵakugomezgeka ŵinu, nigomezgenge mu zina linu.” (Sal. 52:9) Nase tingakhozgeka para tili lumoza na ŵabali na ŵadumbu ŵithu, pa maungano na mu uteŵeti pera yayi, kweniso nanga mpha nyengo ya ntchezgo.—Rom. 1:​11, 12.

Khozgani chigomezgo chinu. Lemba la Salimo 62:5 likuti: “Nkhulindilira waka chete kwa Chiuta, pakuti chigomezgo chane chili mwa iyo.” Ntchakuzirwa chomene kuŵa na chigomezgo chakukhora, chomenechomene para tikuwona kuti umaliro ukuchedwa kwiza. Tikwenera kukhorwa kuti malayizgo gha Yehova ghafiskikenge nadi kwambura kutondeka, nanga pangatora nyengo wuli. Tingakhozga chigomezgo chithu para tikusambira Mazgu gha Chiuta, ivyo vikusazgapo kusanda mauchimi na kuwona umo fundo zake zikukolelerana, kweniso kusambira vinandi vyakukhwaskana na Yehova. (Sal. 1:​2, 3) Kweniso tikwenera kulutilira “kulomba kuyana na mzimu utuŵa” kuti tilutilire kuŵa paubwezi uwemi na Yehova, apo tikulindilira layizgo lake la umoyo wamuyirayira kuti lifiskike.—Yuda 20, 21.

Nga ni Themba Davide, gomezgani kuti Yehova wakuwona awo ŵakumulindilira ndipo wakuŵalongora chitemwa chakugomezgeka. (Sal. 33:​18, 22, mazgu ghamusi) Lutilirani kulindilira Yehova mwakuzikira mwa kughanaghanira vinthu viwemi, kumulumba, kukhozgeka na ŵabali na ŵadumbu, kweniso kulutilira kukhozga chigomezgo chinu.