Kae e manako eiloa a Ieova ke ‵nofo fakatalitali tatou mo te kufaki ke gasue a ia i tena taimi tonu. Kaia e manako a ia ke fai tatou penā? Ne a mea e mafai o fesoasoani mai ke fia‵fia tatou i te taimi e ‵nofo fakatalitali ei?

KAIA E MANAKO EI A IEOVA KE ‵NOFO FAKATALITALI TATOU?

E fai mai te Tusi Tapu: “Ieova e fakatalitali mo te kufaki o fakaasi te alofa ki a koutou, kae ka tu aka a ia o fakaasi atu te alofa fakamagalo ki a koutou. Me i a Ieova ko te Atua fai mea tonu. E fia‵fia a latou katoa kolā e ‵nofo fakatalitali ki a ia.” (Isa. 30:18) A pati konei a Isaia ne fakasino fakapitoa atu eiloa ki tino Iutaia loto ma‵keke. (Isa. 30:1) Kae e isi eiloa ne tino fakamaoni kolā ne aofia i te kau Iutaia, kae ne maua ne latou se fakamoemoega ona ko pati konei. E tuku mai foki ne pati konei se fakamoemoega ki tavini fakamaoni a Ieova i aso nei.

Tela la, e ‵tau o ‵nofo fakatalitali tatou mo te kufaki me e nofo fakatalitali foki a Ieova mo te kufaki. E isi se taimi tonu ka fakaseai ei ne ia a te olaga tenei, kae e nofo fakatalitali a ia ki te oko mai o te aso mo te itula tenā. (Mata. 24:36) Tenā te taimi, ka lavea faka‵lei atu i ei a te ‵se o ‵losiga a te Tiapolo e fai e uiga ki a Ieova mo latou kolā e tavini atu ki a Ia. Tenā ka fakaseai atu ne ia a Satani mo so se tino e ‵kau mo ia, kae ka ‘fakaasi mai ne Ia te alofa fakamagalo ki a tatou.’

I te taimi tenei, e se ave kea‵tea ne Ieova a ‵tou fakalavelave, kae e fakatalitonu mai a ia me e mafai eiloa o fia‵fia tatou i te taimi e ‵nofo fakatalitali ei. E pelā mo pati a Isaia, e mafai o fia‵fia tatou i te taimi e fakatalitali io me fakamoe‵moe tatou ke tupu se mea ‵lei. (Isa. 30:18) a E mafai pefea o maua ne tatou a te fiafia tenā? E fa auala e mafai o fesoasoani mai.

AUALA KE FIA‵FIA I TE TAIMI E ‵NOFO FAKATALITALI EI

‵Saga tonu ki mea ‵lei. E uke ‵ki a mea ma‵sei ne fepaki mo te tupu ko Tavita i tena olaga kātoa. (Sala. 37:35) Kae ui ei, ne tusi mai a ia: “Ke nofo filemu i mua o Ieova kae nofo fakatalitali ki a ia. Sa kaitaua ki te tagata telā e manuia i te faiga o ana togafiti.” (Sala. 37:7) Ne fakagalue ne Tavita a te  manatu fesoasoani tenā mai te saga tonu atu fua ki tena fakamoemoega o te fakaolataga. Ne loto fakafetai foki a ia ki mea ‵lei katoa ne fai ne Ieova mō ia. (Sala. 40:5) Kafai foki e ‵saga tonu tatou ki mea ‵lei i ‵tou olaga kae e se ki fakalavelave e fe‵paki mo tatou, ka faigofie ke ‵nofo fakatalitali tatou ki a Ieova.

Fakaaoga so se avanoaga ke ‵viki atu ki a Ieova. Ne fai atu a te tino ne tusi ne ia te Salamo 71, ko Tavita ki a Ieova: “Ka faka‵tali faeloa au; ka fakaopoopo ne au ou vikiga.” (Sala. 71:14) Ka ‵viki atu pefea a ia ki a Ieova? Ka fakailoa atu ne ia ki nisi tino a mea e uiga ki a Ieova kae usu a pese o vikiga ki a ia. (Sala. 71:​16, 23) E pelā mo Tavita, e mafai foki o maua ne tatou te fiafia i te taimi e ‵nofo fakatalitali tatou ki a Ieova. E ‵viki tatou ki a ia e auala i te ‵tou galuega talai, ‵tou sau‵talaga i aso takitasi, mo ‵tou pese o tapuakiga. Te suā taimi e usu ne koe se pese o te Malo, mafaufau faka‵lei ki pati o te pese mo te auala e maua ne koe mai i ei a te fiafia.

‵Sala ki fakamalosiga mai ou taina mo tuagane. I te taimi ne fepaki a Tavita mo mea faiga‵ta, ne fai atu a ia ki a Ieova: “I mua o ou tino fakamaoni, ka fakamoemoe au ki tou igoa.” (Sala. 52:9) E mafai foki o maua ne tatou a fakamalosiga mai taina tapuaki fakamaoni e auala i ‵tou fakatasiga, galuega talai kae penā foki mo ‵tou maopoopoga fakafiafia.—Loma 1:​11, 12.

Fakamalosi aka tou fakamoemoega. E fai mai te Salamo 62:5: “E faka‵tali au mo te filemu ki te Atua me i toku fakamoemoega e maua mai i a ia.” E tāua ‵ki ke malosi te ‵tou fakamoemoega maise loa māfai e fui oko mai a te gataga e ‵tusa mo te mea ne mafau‵fau tatou ki ei. E ‵tau o tali‵tonu tatou me ka taunu eiloa a folafolaga a Ieova faitalia te leva e mafai o faka‵tali tatou ki ei. E mafai o fakamalosi aka ne tatou a te ‵tou fakamoemoega mai te suke‵suke ki te Muna a te Atua—e pelā mo valoaga, te auala e fetaui ‵lei ei a fakamatalaga a tino kolā ne tusi ne latou te Tusi Tapu, mo fakamatalaga ne fakaasi mai ne Ieova e uiga ki a ia eiloa. (Sala. 1:​2, 3) E se gata i ei, e ‵tau o tumau tatou i te “‵talo fakatasi mo te agaga tapu” ke fakatumau ‵tou fesokotakiga ‵lei mo Ieova a koi ‵nofo fakatalitali tatou ki te fakataunuga o tena folafolaga e uiga ki te ola se-gata-mai.—Iuta 20, 21.

E pelā mo te tupu ko Tavita, ke tali‵tonu me i a Ieova e kilokilo mai ki a latou kolā e ‵nofo fakatalitali ki a Ia kae fakaasi atu Tena alofa fakamaoni ki a latou. (Sala. 33:​18, 22) Ke nofo fakatalitali mo te kufaki ki a Ieova mai te saga tonu ki mea ‵lei i tou olaga, ‵viki atu ki a ia, ‵sala ki fakamalosiga mai ou taina Molimau, kae fakatumau te malosi o tou fakamoemoega tāua.