Ындыг-даа болза, хөделип эгелээр үезин Иегова бисти маназын деп күзээн. Чүге? Манаашкынга өөрүшкүнү чидирбезинге биске чүү дузалаар?

ИЕГОВА БИСТИ ЧҮГЕ МАНАЗЫН ДЕП КҮЗЭЭН?

Библияда мынча дээн: «[Иегова] элээн манааш, силерге өршээл көргүзер, Ол туруп келгеш, силерже ээ көрнүр. Чүге дээрге [Иегова]... — чөптүг Бурган-дыр. Аңаа идегээр бүгү улус амыр-чыргалдыг!» (Иса. 30:18). Исайя бо сөстерни баштай дедир-чөрүү еврейлерге чугаалаан (Иса. 30:1). Чоннуң аразында шынчы бараалгакчылар турган. Оларга ол сөстер идегелди берген. Амгы үеде Иегованың шынчы бараалгакчыларынга ол-ла сөстер идегелди эккеп турар.

Иегова шыдамыккай манап турар болганда, бис база шыдажыр ужурлуг бис. Бо делегейни узуткаар ай-хүнүн ол манап турар (Мф. 24:36). Ынчан Иеговага база ооң бараалгакчыларынга удур Эрликтиң мегези көстүп кээр. Ооң соонда Бурган Эрликти болгаш ооң талалакчыларын узуткап каар, а биске «энерелдиг болур».

Амгы үеде шенелделерге таваржып турар бис. Ол бергелерден Иегова чамдыкта камгалавас-даа болза, өөрүшкүлүг манап болурувусту бүзүреткен. Исайяның чугаалааны ышкаш, эки чүвени четтикпейн манап тургаш, аас-кежиктиг болур аргалыг бис (Иса. 30:18) a. Шак ындыг аас-кежикти канчаар чедип алыр? Маңаа дөрт сүме дузалаар.

МАНААШКЫНГА ӨӨРҮШКҮНҮ КАНЧААР ЧИДИРБЕЗИЛ?

Угааныңарны өөрүшкүлүг бодалдар-биле долдуруңар. Давид каржы болгаш чөптүг эвес чорукту хөй көрген (Ыд. ыр. 36:35). Ынчалза-даа ол: «[Иегованың] мурнунга хөлзеве, Аңаа ынан. ...Кара сагыштыг бодалдарын боттандырып чоруур кижи дээш хорадава» деп бижээн (Ыд. ыр. 36:7). Давид ол сүмени боду ажыглап, Иегованың дузазынче кол кичээнгейни салып  турган. Оон аңгыда, бүгү буяны дээш Иеговага өөрүп четтирип чораан (Ыд. ыр. 39:6). Байдалдың эки талаларын дилеп, муңгаранчыг бодалдарга алыспас болзувусса, Иегованы манаары биске чиик болур.

Иегованың дугайында канчаар хөй чугаалап болур? 70-ги Ырының автору Иеговага мынчаар ырлаан: «А мен кезээде Сеңээ идегеп, Сени мактаан сөстеримни ам-даа немээйн» (Ыд. ыр. 70:14). Иегованы ол канчаар алдаржытканыл? Ооң дугайында улуска чугаалап, алгап ырлап турган (Ыд. ыр. 70:16, 23). Давид ышкаш, Иегованы өөрүшкүлүг манап болур бис. Бурганны суртаалга, хүн бүрүде чугаага, ырыга алдаржыдып болур бис. Ырларывысты күүседип тургаш, ооң сөстери кайы хире өөрүшкүнү эккээрин ханы боданып көрүңер.

Акы-угбалар-биле аралажып, деткимчени алыңар. Давид бергелерге таварышкаш, Иеговага мынча дээн: «Сээң адыңга ынанырымны сеңээ бердинген улуска көргүзер мен» (Ыд. ыр. 52:9, Чаа делегей). Бис база акы-угбалар-биле чыыштардан аңгыда, хостуг үевисти кады эрттирип тургаш, күш кирип ап болур бис (Рим. 1:11, 12).

Идегелиңерни быжыглаңар. Ырлар 61:6-да: «Сеткилим оожургалды чүгле Бургандан алзын, идегелим чүгле Оон кээр» деп сөстер бар. Бо делегейниң төнчүзүн манаары бодаанывыстан үр апаарга, биске быжыг идегел эргежок чугула. Кайы хире-даа үр манаар болза, Иегованың шупту аазаашкыннары күүсеттинер деп бүзүрел херек. Библияның медеглелдерин, ооң карышкак чогун, Иегованың дугайында чүнү ажыдып турарын шинчилээш, идегеливисти быжыктырары чугула (Ыд. ыр. 1:2, 3). Оон аңгыда, ыдыктыг сүлдениң удуртулгазынга дүүштүр мөргүүрүн уламчылаар болза эки. Аазаан мөңге чуртталганы манавышаан, Иегова-биле найыралывысты быжыглаарынга ол бүгү чүүл дузалаар (Иуда 20, 21).

Давид ышкаш, Иегова ону манап турар улусту хайгаарап чоруур деп, бүзүрелдиг болуңар. Бурган ындыг бараалгакчыларынга шынчызы-биле ынак (Ыд. ыр. 32:18, 22). Угааныңарны өөрүшкүлүг бодалдар-биле долдуруп, Бурганны алдаржыдыңар. Акы-угбалар-биле аралажып, деткимчени алыңар. Үнелиг идегелиңерни өжүрбеңер. Ол бүгүнү кылыры Иегованы шыдамыккай манаарынга силерге дузалаар.