Озьы ке но Иеговалэн потэ, ми солэсь пуктэм дырзэ чидаса мед возьмаломы шуыса. Малы солэн потэ, ми мед возьмаломы шуыса? Мар милемлы юрттоз шумпотонмес ыштытэк возьманы?

МАЛЫ ИЕГОВАЛЭН ПОТЭ, МИ СОЕ МЕД ВОЗЬМАЛОМЫ ШУЫСА?

Библиын гожтэмын: «Иегова возьмалоз, тӥледлы ӟечлыксэ возьматон понна, соин ик со ӝутскоз, тӥледыз гажан-жалян понна. Уго Иегова — шонерлыклэн Инмарез. Шудоесь ваньмыз сое возьмасьёс» (Ис. 30:18, ВД). Нырысь та кылъёс верамын вал еврейёслы, кудъёссэ Иегова тэрытскисьтэм муртъёсын нимаз (Ис. 30:1). Но еврей калык пӧлын вал оскымон ужась-тыршисьёс но. Та кылъёс соослы оскиськон кузьмазы. Туннэ но та кылъёс Иеговалэн оскымон ужась-тыршисьёсызлы оскиськон сёто.

Иегова чидаса возьма бере, милемлы но чидано. Со дыр пуктӥз ини, куке та лек дуннеез быдтоз. Инмар со пуктэм дырзэ возьма (Матф. 24:36). Соку валамон луоз, Шайтан Иеговаез но солэсь ужась-тыршисьёссэ юнме янгыше уськытъяз, пӧяськиз шуыса. Собере Инмар лек адямиосты быдтоз, Шайтанэз но периосты пыдэстэм дуннее пытсалоз, нош милемыз гажалоз-жалялоз.

Но али ми шуг-секытъёсын пумиськылӥськомы. Иегова шуг-секытъёсмес котьку ик уг быдты, но со милемыз оскытэ, шуг-секытъёсмес быдтэмзэ возьмакумы, ми шумпотыны быгатӥськомы шуыса. Исаия вераз: «Шудоесь ваньмыз сое возьмасьёс» (Ис. 30:18) a. Мар кароно, шудоесь луон понна? Милемлы юрттозы ньыль визь-кенешъёс.

МАР ЮРТТОЗ ШУМПОТОНЭЗ ЫШТЫТЭК ВОЗЬМАНЫ?

Умоез сярысь малпаське. Давид эксэй трос лек но шонерлыктэм ужъёсын пумиськиз (Пс. 36:35). Озьы ке но со гожтӥз: «Кузё-Инмарлы тэрытскы, Солы оскиськы. Ас сюрес вылтӥз азинлыко мынӥсьлы, кескич адямилы эн вожъяськы» (Пс. 36:7). Давид ачиз но та визь-кенешезъя улӥз — со Иегова вылэ оскиськиз, малпаськиз, кызьы Иегова солы юрттоз. Озьы ик Давид Иеговаез  тау кариз ваньмыз понна, мар со солы лэсьтӥз ини (Пс. 39:6). Милемлы но Иеговаез возьманы капчигес луоз, урод малпанъёслы ӧм ке сётске но умоез сярысь малпаськыны тыршимы ке.

Ялан тырше Иеговаез данъяны. 70-тӥ псаломын, кудзэ Давид гожтӥз, вылды, вераське: «Мон котьку но Тон вылэ оскиськыса уло, Тыныд ялан ушъян кылъёс вераса уло» (Пс. 70:14). Кызьы Давид Иеговалы ушъян кылъёс вералляз? Со Инмар сярысь мукетъёсызлы вераз но кырӟанъёсты кырӟаз (Пс. 70:15, 23). Давид сямен, ми но быгатӥськомы Иеговаез шумпотыса возьманы. Ми Инмарез данъяськомы, ӟеч иворез тодытыса, со сярысь эшъёсынымы но семьяенымы вераськыса но кырӟанъёсты кырӟаса. Кыӵе ке кырӟанмес кырӟакуды, малпаське, мар сярысь отын вераське но кызьы со юрттэ тӥледлы шумпотыса улыны.

Юнматске, агайёсыныды но сузэръёсыныды дырдэс ортчытыса. Шуг-секытъёсын пумиськыкуз, Давид Иеговалы вераз: «Тынэсьтыд нимдэ агай-вынъёсылы тодыто, калык люкаськон пӧлын Тонэ ушъяло» (Пс. 21:23). Ми но быгатӥськомы юнматскыны, агайёсынымы но сузэръёсынымы дырмес ортчытыса, кылсярысь, пумиськонъёсын, тодытыкумы, озьы ик соосын ӵош шутэтскыкумы (Рим. 1:11, 12).

Оскиськондэс юнматэ. Псалтирьын 61:6 гожтэмын: «Эй, лулы, Инмар дорысь гинэ буйгатскон утча! Солы гинэ уго мынам оскиськонэ». Та дуннелэсь пумзэ ми малпаммылэсь кемагес возьмаськомы ке ини, милемлы туж кулэ юн оскиськон. Кӧня гинэ возьмано медам луы, милемлы юн оскыны кулэ, Иеговалэн вань кылсётонъёсыз быдэсмозы шуыса. Туж кулэ оскиськонмес юнматыны, Инмарлэсь Кылзэ эскерыса. Кылсярысь, малпаськоно, кызьы быдэсмо азьпалзэ ивортонъёс, мар возьматэ, Библия ачиз аслыз пумит уг мыны шуыса, но мар Библия вера Иегова сярысь (Пс. 1:2, 3). Со сяна, азьланяз но святой духез курыса вӧсяськоно. Та юрттоз милемлы юн осконэн улыны со дырозь, куке Иегова аслэсьтыз кылсётонзэ быдэстоз но милемлы пырак улон кузьмалоз (Иуда 20, 21).

Давид эксэйлэсь адӟем каре но юн оске, Иегова ассэ возьмасьёсты уг вунэты шуыса. Со сыӵе адямиосты туж яратэ (Пс. 32:18, 22). Умоез сярысь малпаське. Инмарез данъялэ. Юнматске, агайёсыныды но сузэръёсыныды дырдэс ортчытыса. Оскиськондэс юнматэ. Ваньмыз та тӥледлы юрттоз Иеговаез чидаса возьманы.