Yehova u ṱoḓa uri ri lindele ri sa fheli mbilu u swika a tshi dzhia vhukando nga tshifhinga tshe a tshi vhea. Ndi ngani a tshi lavhelela zwenezwo? Ndi mini zwine zwa nga ri thusa uri ri takale musi ro lindela?

NDI NGANI YEHOVA A TSHI LAVHELELA URI RI LINDELE?

Bivhili i ri: “Yehova o lindela a sa fheli mbilu uri a ni sumbedze uri u a ni takalela, u ḓo takuwa uri a ni sumbedze khathutshelo. Ngauri Yehova ndi Mudzimu wa khaṱhulo yo teaho. Hu takala vhoṱhe vhane vha dzula vho mu lavhelela.” (Yes. 30:18) Musi Yesaya a tshi ṅwala enea maipfi, o vha a tshi khou a ṅwalela Vhayuda vha re na swili. (Yes. 30:1) Fhedzi ho vha hu na vhaṅwe Vhayuda vha fhulufhedzeaho nahone enea maipfi o vha ṋea fhulufhelo. A dovha a ṋea na vhashumeli vha Yehova vha fhulufhedzeaho fhulufhelo na ṋamusi.

Ri tea u lindela ri sa fheli mbilu ngauri na Yehova u khou lindela a sa fheli mbilu. O lindela ḓuvha na tshifhinga zwe a zwi vhea u itela u fhelisa ḽino shango. (Mat. 24:36) Nga tshenetsho tshifhinga, zwi ḓo bvela khagala uri zwoṱhe zwe Saṱhane a pomoka Yehova na vhathu vhawe a si zwone. Yehova u ḓo fhelisa Sathane na vhoṱhe vha mu tikedzaho, fhedzi riṋe u ḓo ri ‘sumbedza khathutshelo.’

Zwa zwino, zwi nga itea uri Yehova a si fhelise thaidzo dzashu, fhedzi u a ri khwaṱhisedza uri ri nga takala musi ro lindela. Samusi Yesaya o zwi amba, ri nga takala musi ro lindela kana u fhulufhela uri zwiṅwe zwithu zwavhuḓi zwi itee. (Yes. 30:18) a Ri nga takala hani musi ro lindela? Kha ri vhone zwithu zwiṋa zwine zwa nga ri thusa.

NḒILA INE RA NGA TAKALA NGAYO MUSI RO LINDELA

Humbulani nga zwithu zwavhuḓi zwine zwa khou itea vhutshiloni haṋu. Khosi Davida o vhona vhuvhi vhunzhi vhu tshi khou itea lwa vhutshilo hawe hoṱhe. (Ps. 37:35) Fhedzi, o ṅwala uri: “Fhumula phanḓa ha Yehova u mu lindele u sa fheli mbilu. U songo sinyuswa nga munna ane a bvelela kha vhukwila hawe.” (Ps. 37:7) Davida o tevhedza zwenezwo, nga u livhisa ṱhogomelo kha fhulufhelo ḽawe  ḽa uri Yehova u ḓo mu tshidza. O dovha a livhuwa zwithu zwoṱhe zwavhuḓi zwe Yehova a mu itela zwone. (Ps. 40:5) Na riṋe ri nga wana zwi tshi ri lelutshela u lindela Yehova arali ra livhisa ṱhogomelo kha zwithu zwavhuḓi zwine zwa khou itea vhutshiloni hashu, hu si kha dzithaidzo.

Fhedzani tshifhinga ni tshi khou renda Yehova. Muṅwali wa Phisalema 71 ane khamusi a nga vha e Davida, o vhudza Yehova u ri: “Ndi ḓo dzula ndo lindela; ndi ḓo engedza thendo dzanga.” (Ps. 71:14) O vha a tshi renda hani Yehova? O vha a tshi vhudza vhaṅwe nga ha Yehova na u mu imbela thendo. (Ps. 71:16, 23) U fana na Davida na riṋe ri nga takala musi ro lindela Yehova. Ri mu renda musi ri vhuḓinḓani, musi ri tshi khou amba nga hae na mashaka na dzikhonani na musi ri tshi khou imba nyimbo dza u mu renda. Tshifhingani tshi ḓaho musi ni tshi khou imba nyimbo dza Muvhuso, humbulisisani nga ha maipfi a lwonolo luimbo na uri a nga ni ṋea hani dakalo.

Tendelani vhahaṋu vha tshi ni ṱuṱuwedza. Musi Davida o sedzana na thaidzo o vhudza Yehova u ri: “Ndi ḓo fhulufhela dzina ḽau phanḓa ha vhathu vhau vha fhulufhedzeaho.” (Ps. 52:9) Na riṋe ri nga ṱuṱuwedzwa nga vhahashu musi ri miṱanganoni, vhuḓinḓani na musi ri tshi khou fhedza tshifhinga navho.​—Vharoma 1:11, 12.

Khwaṱhisani fhulufhelo ḽaṋu. Phisalema 62:5 i ri: “Ndi ḓo lindela Mudzimu ndo fhumula ngauri ndi fhulufhela ene.” Ndi zwa ndeme nga maanḓa uri ri vhe na fhulufhelo ḽo khwaṱhaho zwihuluhulu arali vhufhelo ha sa ṱavhanye ho swika sa zwe ra vha ro lavhelela. Ri tea u vha na vhungoho ha uri zwoṱhe zwe Yehova a zwi fhulufhedzisa zwi ḓo itea hu sa londwi uri ri nga tea u zwi lindela tshifhinga tshingafhani. Ri nga khwaṱhisa fhulufhelo ḽashu nga u guda Ipfi ḽa Mudzimu. Sa tsumbo, humbulisisani nga ha vhuporofita ha Bivhilini ho no iteaho, nḓila ine vhaṅwali vha Bivhili vha tendelana ngayo u katela na zwoṱhe zwe Yehova a zwi bvisela khagala nga ha ene muṋe. (Ps. 1:2, 3) Nahone ri tea u bvela phanḓa ri tshi ‘rabela ri tshi livhiswa nga muya mukhethwa’ uri ri dzule ri na vhushaka havhuḓi na Yehova musi ro lindela vhutshilo vhu sa fheli he a ri fhulufhedzisa.​—Yuda 20, 21.

U fana na Khosi Davida, na riṋe ri nga vha na vhungoho ha uri Yehova u lavhelesa vhoṱhe vhe vha mu lindela nahone u vha sumbedza lufuno lwawe lu sa shanduki. (Ps. 33:18, 22) Dzulani no lindela Yehova ni sa fheli mbilu nga u humbula nga ha zwithu zwavhuḓi zwine zwa khou itea vhutshiloni haṋu, u mu renda, u tendela vhahaṋu vha tshi ni ṱuṱuwedza na nga u khwaṱhisa fhulufhelo ḽaṋu.