Nnaamweera vareene hiiho, Yehova ontthuna weera hiyo nipixeke murima niwehereraka weera owo apake etthu etempu yooreerela. Mwaha wa heeni Yehova onwehereraawe eyo wa hiyo? Ni eheeni enrowa onikhavihera okhala oohakalala vaavo ninwehereraahu?

MWAHA WA HEENI YEHOVA ONTTHUNAAWE WEERA HIYO NIWEHEREREKE?

Biblya onhima ha: “Yahvéh onnavilela, wera ophwanyiheni mahala awe. Khweli owo ontthuna wemela wera omoreleni ikharari, vawi Yahvéh ti Muluku: òreriwa ti yale anamuroromela yowo.” (Yes. 30:18) Masu ala a mprofeti Yesaya, yaalepeliwe aYuda oohiiwelela. (Yes. 30:1) Mene variyari va aYuda ale yaakhalavo atthu oororomeleya, nto masu ala yannaavaha yooweherera. Nave-tho arumeyi oororomeleya a Yehova olelo va, pooti okhalano yooweherera emoharu vaavo ensomaaya masu a Yesaya.

Hiyo onnatthuneya oweherera moopixa murima mwaha wooweera Yehova tho onnaweherera moopixa murima. Owo oohima vaavo onrowaawe omaliha elapo ela yoonanara, nave-tho owo onnaweherera ophiya nihiku ni ewoora. (Math. 24:36) Nihiku nno, onimooneya weera soohima sa Satana woohima sa Yehova ni arumeyi awe, ti soowootha. Avinyaka Yehova onoorowa omunyaanya Satana ni ale emmutthara, menento Yehova ‘onoonimorela ikharari hiyo.’

Niwehereraka ophiya nihiku nno, apaale Yehova khonrowa omaliha maxupo ahu, mene owo onnaanroromeliha weera hiyo pooti okhala oohakalala niwehereraka. Hiihaale ntoko Yesaya uulummaawe, ti woowereya okhala oohakalala, etempu emoha-moharu, oweherera etthu yooreera weereya. (Yes. 30:18) a Mene eyo enwereya moota heeni? Nrowe noone itthu ixexe sinrowa onikhavihera.

MOOTA HEENI NINROWAAHU OKHALA OOHAKALALA VAAVO NINWEHERERAAHU

Nwehexexeke itthu sootthuneya. Mwene Davidi aahoona itthu sootepa onanara mweekumini mwawe. (Nsal. 37:35) Nnaamweera vareene hiiho, owo alempe ha: “Mmàle oholo wa Yahvéh ni nweherereni yowo, murim’anyu ohèteteye niwoko na yale enàrerela ephiro aya.” (Nsal. 37:7) Davidi annatthara miruku  iya, nave annawehexexa yooweherera awe ya ovuluxiwa ni Yehova. Nave-tho owo annaxukurela mwaha wa itthu sootheene sooreera Yehova ampakelaawe. (Nsal. 40:6 [40:5, NM]) Wakhala weera hiyo nnoopaka etthu emoha-moharu ni wuupuwelela itthu sootthuneya mweekumini mwahu ohiya owehexexa itthu soohitthuneya, onoorowa okhala wookhweya onweherera Yehova.

Nvireleleke onvuwiha Yehova. Namalepa a Nsalmu 71 Davidi, aamulenle ha Yehova: “Nto miyo kini koweherereni kwekwe ni kini kitepe olekela wottottopelani nyuwo.” (Nsal. 71:14) Moota heeni Davidi aarowaawe onvuwiha Yehova? Owo ampaka eyo uulumaka voohima sa yoowo ni atthu akina ni eepaka itxipo sonvuwiha. (Nsal. 71:16, 23) Hiihaale ntoko Davidi, hiyo-tho pooti ovirelela ohakalala vaavo nnanwehereraahu Yehova. Hiyo ninnanvuwiha owo vaavo ninlaleeraahu, ni soowuuluma sahu sa nihiku ti nihiku ni vaavo nneepaahu itxipo sahu sa Omwene. Nto ekwaha enttharelana munrowaanyu weepa itxipo sahu sa Omwene, mwiiwexexeke nnene moota enrowaaya woovarani murima.

Mulipihiweke ni asinna ni asirokora. Vaavo Davidi aavirihaawe maxupo, owo aamulenle ha Yehova: “Kini kothamaleni, Muluku wa mahiku othene, niwoko na sothene mwènranyu. Ni kini kiroromele nsina nanyu vamaithoni va anakharari.” (Nsal. 52:11 [52:9, NM]) Onnatthuneya okhala vamoha ni asinna ni asirokora ohiya paahi mmithukumanoni naari mmutekoni moolaleera, mene-tho onnatthuneya oviriha etempu nreene ni asinna awo. — Arom. 1:11, 12.

Mulipihe yooweherera anyu. Nsalmu 62:6 [62:5, NM] onhima ha: “Nyuwo munep’aka, mwìtthuwe mwa Muluku pahi, niwoko ororomela waka onakhuma mwa yowo.” Ti wootthuneya vantxipale olipiha yooweherera ahu, otepaxa wene wakhala weera nipatxenre khalayi oweherera omala wa itthu soonanara. Onnatthuneya weera nroromeleke weera soolaihera sootheene sa Yehova sinoorowa okwanela nihipwatthaka nipatxenre liini oweherera. Hiyo nnoorowa olipiha yooweherera ahu nsomaka masu a Muluku ori Biblya, nsomaka iprofesiya naari iparte soovirikana sa Biblya mene sinvarihana ekina ni ekhwaawe nave-tho seiyo sinoonihera omutthu wa Yehova. (Nsal. 1:2, 3) Hiyo onnatthuneya ovirelela ‘ovekela munepa wootteela’ weera nivirelele olipiha onthamwene ahu ni Yehova vaavo ninwehereraahu okwanela yoolaihera ya ekumi yoohimala. — Yuda 20, 21.

Hiihaale ntoko Mwene Davidi, muroromeleke weera Yehova onnaakosoopa, onnaakhavihera nave onnawoonihera nsivelo neekhaikhai atthu ale enanweherera. (Nsal. 33:18, 22) Nto nvirelele onweherera Yehova moopixa murima, nwehexexaka itthu sootthuneya mweekumini mwanyu, munvuwihaka yoowo, mulipihiwaka ni asinna nave mulipihaka yooweherera anyu yootepa oreera.