Hata vari siiso, Yehova oniphavela wiira nimulipeleleke moopixa murima okathi onoona awe oreerela. Xeeni Yehova oniphavela awe wiira nimulipeleleke? Exeeni enrowa onikhaliherya okhala oohakalala nimulipelelaka?

XEENI YEHOVA ONIPHAVELA AWE WIIRA NIMULIPELELEKE?

Biibiliya onihimya so: “Apwiya annowehereryani wira yoleveleleni: awo animwemela wira yomoreleni ikharari. Tthiri Apwiya ti Muluku òmoriwa ikharari: òreriwa t’ale anetta emuroromelaka Muluku”. (Yes. 30:18) Moolumo ala a profeta Yesaya yaaroiheliwe ayuda oohiiwelela. (Yes. 30:1) Masi muhina mwa ayuda awo, yaahikhala atthu oororomeleya, nto moolumo ala yaanaavaha nlipelelo. Nave arumeyi oororomeleya a Yehova olelo-va, pooti okhalana nlipelelo nimosa-ru vaavo anisoma aya moolumo ala a Yesaya.

Hiyo nihaana omulipelela Yehova moopixa murima, okhala wiira owo onnilipelela moopixa murima. Nto owo oothanla okathi onrowa awe opwetexa olumwenku ola wootakhala. Yena onnilipelela ophiya nihiku nno ni ewoora ene. (Math. 24:36) Okathi owo waphiya, nnoosuwela wiira itthu sootheene Satana aamootherya awe Yehova vamosa ni arumeyi awe saari seethiru. Nuumala-vo, Yehova onrowa ompwetexa Satana vamosa ni ale animukhaliherya, masi owo ‘onoonimorela ikharari’.

Nlipelelaka ophiya nihiku nno, Yehova khonrowa omaliha mixankiho sahu sootheene, masi owo onninlipiherya wiira nnoowerya okhala oohakalala nimulipelelaka. Ntoko Yesaya aahimmye awe, vanniweryaneya okhala oohakalala, okathi omosa-ru nlipelelaka etthu yooreera enrowa wiiraneya muhoolo. (Yes. 30:18) a Masi vaniweryaneya sai? Nrowe nthokorerye itthu 4 sinrowa onikhaliherya.

MOOTA WOOKHALA OOHAKALALA NIMULIPELELAKA YEHOVA

Muupuweleleke itthu sooloka sinookhumelelani. Mwene Davidi saahimphwanya mixankiho sinceene mweekumini mwawe. (Esal. 37:35) Masi hata vari siiso, owo aalempe so: “Mukhalé òmàla, mwaroromelaka Apwiya: muhinyonyiwé mwaha w’ale arina sothene, mwaha w’ale anireya mirakho wira yatakhalihe òhawa  ni òthoiwa”. (Esal. 37:7) Davidi aahitthara malakiheryo ala, ni aniwehexexa nlipelelo aarina awe na woopoliwa ni Yehova. Owo aanixukhurela itthu sootheene sooloka aavahiwa awe ni Yehova. (Esal. 40:5) Nave hiyo, vakhala wiira nnoowehexexaka itthu sooloka nimphwanya ahu, ohiya itthu soohiloka sinnikhumelela, vanookhweyaka omulipelela Yehova.

Khula okathi munvuwiheke Yehova. Mulipa oolepa Esalimo 71, woonasa wene Davidi, aahimuhimeerya Yehova oriki: “Miyo kinaamororomelani voohihiyererya, ni kinaamoottottopelani okathi wootheene”. (Esal. 71:14, Piipiliya Emakhuwa.) Moota xeeni Davidi aarowa awe omuttottopelaka Yehova? Anwerya opaka eyo aaleelaka atthu akina voohimya sa Yehova ni iipaka masipo yanvuwiha. (Esal. 71:16, 23) Ntoko Davidi, hiyo nnoowerya okhala oohakalala nimulipelelaka Yehova. Ninninvuwiha Yehova okathi ninlaleerya ahu, ninvaanela ahu ni atthu akina voohimya sa Yehova ni okathi nniipa ahu masipo a Omwene. Okathi mukina munrowa anyu wiipaka nsipo na Omwene, nvaheke ephoole moolumo anihimya aya nsipo nno ni muupuweleleke moota murima anyu onihakalala awe.

Mweemereryeke olipihiwa ni anna ni arokora. Okathi Davidi samphwanye aya mixankiho, owo aahimwiipela Yehova ohimyaka so: “Kinaamulipelela nsina nanyu, okhala wiira ti nooreera ohoolo wa atthu ooreera murima”. (Esal. 52:9, Piipiliya Emakhuwa.) Nihaana wiivaha okathi wiira nikhaleke ni anna ni arokora, ohiya paahi okathi wa mithukumano aahiiso wa muteko woolaleerya, masi nihaana oviriha okathi munceene nitthekulaka naawo. — aRom. 1:11, 12.

Mulipiheke nlipelelo nanyu. Esalimo 62:5 enihimya wiira murima aka ‘onnimumula w’Apwiya paahi: Tthiri ti yaawo kinaaroromela aka’. Ti vooloka olipiha nlipelelo nahu, otepexa wene vakhala wiira nipacenrye khalai olipelela opwetexiwa olumwenku ola wootakhala. Nikupaliki wiira sooleiherya sootheene sa Yehova onoomaleliha, moohicikha okathi mikavi onivira nilipelelaka. Nnoowerya olipiha nlipelelo nahu, nisomaka Nuulumo na Muluku, niwehaka moota iprofesia sa mbiibiliyani siniiraneya aya, moota ipantte soovirikana sa mbiibiliyani sinivarihana aya ni sikina, ni itthu sikina Yehova ohimmye awe sinivarihana ni mikhalelo sawe. (Esal. 1:2, 3) Nave nihaana ohihiya ‘ovekela ni owerya wa munepa woowaarya’ wiira nilipihe ompatthani ahu ni Yehova, vaavo ninlipelela ahu wiira omalelihe yooleiherya awe ya onivaha okumi woohimala. — Yuda 20, 21.

Ntoko Mwene Davidi, nikupaliki wiira Yehova onnaakhapelela ni onniwooniherya ophenta Wawe woororomeleya ootheene ale ahinihiya omulipelela. (Esal. 33:18, 22) Nto muhihiye omulipelela Yehova moopixa murima, nwehexexaka itthu sooloka sinookhumelelani mookumini mwanyu, munvuwihaka, mweemereryaka olipihiwa ni anna ni arokora ni mulipihaka nlipelelo murina anyu.