Bisan pa hito, naglalaom hi Jehova nga mapailubon kita nga maghuhulat nga gumios hiya ha iya itinanda nga panahon. Kay ano nga naglalaom hiya hito ha aton? Ano an makakabulig ha aton nga magin malipayon samtang naghuhulat?

KAY ANO NGA NAGLALAOM HI JEHOVA NGA MAGHUHULAT KITA?

An Biblia nasiring: “Hi Jehova mapailubon nga naghuhulat basi magpakita ha iyo hin pagkabuotan, ngan mabuhát hiya basi magpakita ha iyo hin kalooy. Kay hi Jehova usa nga Dios han hustisya. Malipayon an ngatanan nga nagpapadayon ha pagpamulat ha iya.” (Isa. 30:18) Ini nga mga pulong ni Isaias iginyakan para ha mga Judio nga magtig-a an ulo. (Isa. 30:1) Pero may pipira nga matinumanon nga mga Judio, ngan ini nga mga pulong nakahatag hin paglaom ha ira. Ini liwat nga mga pulong naghahatag hin paglaom ha matinumanon nga mga surugoon ni Jehova yana.

Salit kinahanglan mapailubon kita nga maghulat kay hi Jehova mapailubon liwat nga naghuhulat. May itinanda hiya nga panahon kon san-o niya tatapuson ini nga sistema, ngan ginhuhulat niya nga umabot ito nga adlaw ngan oras. (Mat. 24:36) Ngan hito nga panahon, magigin klaro gud nga sayop an mga akusasyon han Yawa kontra kan Jehova ngan ha mga nag-aalagad ha Iya. Katapos, wawad-on ni Jehova hi Satanas ngan an bisan hin-o nga nadapig ha iya, pero ‘magpapakita Hiya hin kalooy’ ha aton.

Ha pagkayana, bangin diri wad-on ni Jehova an aton mga kakurian, pero nagpapasarig hiya nga mahimo kita magin malipayon samtang naghuhulat. Sugad han siring ni Isaias, mahimo kita magin malipayon samtang naglalaom nga may maopay nga mahitatabo. (Isa. 30:18) a Paonan-o kita magkakaada hito nga kalipay? Makakabulig ha aton an upat nga butang.

KON PAONAN-O MAGIGIN MALIPAYON SAMTANG NAGHUHULAT

Magpokus ha positibo. Damu nga karaotan an nakita ni Hadi David ha bug-os niya nga kinabuhi. (Sal. 37:35) Pero hiya nagsurat: “Magpabilin nga hilom ha atubangan ni Jehova ngan may kaikag nga maghulat ha iya. Ayaw kaaringit tungod ha tawo nga naglalampos  pagtuman han iya mga plano.” (Sal. 37:7) Gin-aplikar ni David ito nga sagdon pinaagi ha pagpokus han iya paglaom nga katalwasan. Mapasalamaton liwat hiya han tanan nga mag-opay nga butang nga ginbuhat ha iya ni Jehova. (Sal. 40:5) Kon huhunahunaon ta liwat kon ano an maopay ha aton kinabuhi ngan diri magpupokus ha mga problema, magigin mas masayon ha aton an paghulat kan Jehova.

Magpabilin nga busy ha pagdayaw kan Jehova. An parasurat han Salmo 71, nga posible hi David, nagsiring kan Jehova: “Padayon ako nga maghuhulat; dudugangan ko an pagdayaw ha imo.” (Sal. 71:14) Paonan-o niya gindayaw hi Jehova? Ginsumatan niya an iba parte kan Jehova ngan nagkanta hin mga pagdayaw ha iya. (Sal. 71:​16, 23) Pariho kan David, mahimo kita magin malipayon samtang naghuhulat kan Jehova. Gindadayaw naton hiya kon nagsasangyaw kita, kon nag-iistorya kita ha aton kasangkayan ngan kapamilya parte ha iya, ngan kon nagkakanta kita han aton mga kanta. Ha sunod nga higayon nga kantahon mo an usa han aton mga Kingdom song, hunahunaa hin maopay an makaparig-on nga mensahe hito.

Makig-upod ha kabugtoan basi madasig. Han inatubang hi David hin mga kakurian, nagsiring hiya kan Jehova: “Ha atubangan han mga maunungon ha imo, maglalaom ako ha imo ngaran.” (Sal. 52:9) Mahimo liwat kita madasig han aton mga igkasi-tumuroo, diri la ha mga katirok ngan ha ministeryo kondi pati liwat ha panahon han pagturotarampo.—Roma 1:​11, 12.

Parig-ona an imo paglaom. An Salmo 62:​5, nagsiring: “Ha Dios naghuhulat ako hin hilom kay an akon paglaom tikang ha iya.” Importante gud an pagkaada marig-on nga paglaom labi na kon an kataposan diri naabot sugad han aton ginlalaoman. Dapat magin kombinsido kita nga an mga saad ni Jehova matutuman anoman kaiha an aton paghulat. Mapaparig-on naton an aton paglaom pinaagi ha pag-aram han Pulong han Dios—an mga tagna, an pagkauruyon han mga sulod hito, ngan an mga detalye nga iginpapakita ni Jehova parte ha iya. (Sal. 1:​2, 3) Kinahanglan liwat padayon kita nga ‘mag-ampo uyon ha baraan nga espiritu’ basi matipigan an aton maopay nga relasyon kan Jehova samtang ginhuhulat naton nga matuman an iya saad nga kinabuhi nga waray kataposan.—Jud. 20, 21.

Pariho kan Hadi David, sarig nga nakikita ni Jehova adton naghuhulat ha Iya ngan iginpapahayag an Iya maunungon nga gugma ha ira. (Sal. 33:​18, 22) Padayon nga maghulat hin mapailubon kan Jehova pinaagi ha pagpokus ha positibo nga mga butang ha imo kinabuhi, pinaagi ha pagdayaw ha iya, pinaagi ha pakig-upod ha mga igkasi-Saksi basi madasig, ngan pinaagi ha pagtipig nga marig-on han imo presyoso nga paglaom.