Miravoravoa Am-piambesan̈a Jehovah
MISAORA efa tsy din̈inao havian’ny andra han̈adosoan’i Jehovah raha ratsy jiaby ndreky han̈ovoany raha jiaby ho vaovao, sa karakôry? (Apok. 21:1-5) Fa mety tsy ho vôntro mora fiambesan̈a andra zen̈y, sirto atsika koa fa sahiran̈a mare. Izikoa raha antinain̈y tsy mety tanteraka, mamparary fô.—Ohab. 13:12.
Fa Jehovah ndraiky man̈anten̈a fa atsika hahadin̈y hiambin̈y izy han̈ano raha, amy fotoan̈a mety aminany. Nan̈ino izy man̈anten̈a zen̈y? Ino han̈ampy atsika ho ravoravo fo miambin̈y?
NAN̈INO MA JEHOVAH MAN̈IRAKA ATSIKA MIAMBIN̈Y?
Baiboly mivolan̈a: “Mbala mahadin̈y miambin̈y fo Jehovah, fôtony tiany haboaka fa izy mitepô anarô, ke hitsangana izy fôtony izy tihamindra fô aminarô. Jehovah baka Zan̈aharin’ny rariny, ke sambatra lan̈iany olo man̈anten̈a izy.” (Isaia 30:18) Irô Jiosy aby nahery andra tamy zen̈y ten̈a nandihanan’ny volan̈a io. (Isaia 30:1) Fa sasany tamindrô Jiosy aby io tsy nivadiky, ke volan̈a aby io nampisy fan̈antinan̈a tamindrô. Mampisy fan̈antinan̈a irô mpanompon’i Jehovah tsy mivadiky aminany iziôty koa volan̈a aby io.
Ke atsika tsy maintsy mahadin̈y miambin̈y, fôtony Jehovah koa mba mahadin̈y miambin̈y. Efa misy andra ndreky lera hamaran̈any donia ratsy ty, ke efa miambin̈y favian’izio mare izy. (Mat. 24:36) Hazava tsarabe amy zen̈y fa vandy aby raha jiaby nivolan̈an’i Satana i Jehovah ndreky olo manompo Jehovah in̈y. Haripakan’i Jehovah koa Satana ndreky lan̈iany dia araiky aminany. Fa Jehovah ndraiky ‘hamindra fô amintsika.’
Fa an̈atin’ny atsika miambin̈y io, Jehovah mety tsy han̈adoso raha sarotro jiaby mahazo atsika. Izy ndraiky man̈amia toky fa atsika mbala afaka ho ravoravo fo nata atsika mila miambin̈y. Karaha nambaran’i Isaia in̈y, mbala mety ho ravoravo fo atsika miambin̈y mare raha tsara ho avy io. (Isaia 30:18) a Akôry hamparavoravo atsika? Misy raha efatra ty mety hatao.
AKÔRY HAMPARAVORAVO ATSIKA AN̈ATIN’NY ATSIKA MIAMBIN̈Y?
Diniha raha tsara mandalo aminao. Maro raha ratsy tôjy Mpanjaka Davida tamy fiain̈ananany. (Sal. 37:35) Fa karaha ty nisoratiny: “Mangìna koa fa man̈oloan̈a Jehovah, ke mahadin̈iasa miambin̈y izy. Aza meloko amin’olo mahavita man̈atanteraka tetiky ratsy ataony.” (Sal. 37:7) Karaha zen̈y tsarabe nataon’i Davida. Izy nifantoko tamy fampan̈antinan̈an’i Jehovah hamonjy izy ndreky nangala onon̈o hatsaran̈a aby efa namezan’i Jehovah izy. (Sal. 40:5) Ke atsika koa tsy mandany lera mandiniky raha sarotro andalovantsika fa mangala onon̈o raha tsara mandalo amy fiain̈anantsika, ho moramora amintsika hiambin̈y Jehovah.
Mifen̈a midera Jehovah. Mpanoratra Salamo 71, mety ho Davida izio, nivolan̈a tamy Jehovah: “Fa zaho ndraiky hiambin̈y anao fo; hahaihifen̈y hidera anao fo zaho.” (Sal. 71:14) Akôry ma nataony nidera Jehovah? Izy nan̈ambara tamin’olo raha momba Jehovah ndreky nihira. (Sal. 71:16, 23) Karaha nataon’i Davida, mbala mety ho ravoravo fo atsika, izikoa fa miambin̈y Jehovah. Midera izy atsika amy fanompoan̈a, amy koran̈a ataontsika andavanandra, aviô lera man̈ano hirantsika aby io. Ke anao koa fa mihira, nan̈ino izikoa dinihinao tsara raha koran̈in’ny hira io baka anao ho ravoravo?
Mangalà angôvo amindrô rahalahy ndreky ranabavy aby io. Tamy Davida niatriky raha sarotro, izy nivolan̈a tamy Jehovah: ‘Haboakako man̈oloan̈a olo aby tsy mivadiky aminao aby io fa zaho man̈anten̈a an̈aranao.’ (Sal. 52:9) Hahazo angôvo koa atsika izikoa miaraka amindrô rahalahy ndreky ranabavy aby io, tsy amy fivorian̈a ndreky amy fitorian̈a fo fa lera fangalan̈a diandian̈a koa.—Rom. 1:11, 12.
Ankafatara fan̈antinan̈anao. Salamo 62:5 mivolan̈a: “Fa zaho ndraiky, zaho mangin̈y fo miambin̈y Jehovah, fôtony zaho man̈anten̈a izy.” Ten̈a mila fatatra fan̈antinan̈antsika, intsaka eky izikoa hitantsika karaha tsy mety mahay avy faran’ny donia ty. Mila resy lahatra atsika fa raha jiaby volan̈in’i Jehovah tsy maintsy ho tanteraka fo, nata atsika mila miambin̈y elabe karakôry. Ho fatatra fan̈antinan̈antsika izikoa atsika mianatra Volan̈a Zan̈ahary, an̈atin’izen̈y faminanian̈a aby io, aviô filaminan’ny raha koran̈in’ny Baiboly nata samy hafa olo nanoratra irô io, aviô mianatra tsiaraikiaraiky irô raha momba Jehovah. (Sal. 1:2, 3) Aviô koa, atsika mila tsy vôly mangataka ‘fan̈ahy masin̈y amy vavaka’ baka ho tsara fo fifandraisantsika amy Jehovah, an̈atin’ny atsika miambin̈y fahatantirahan’ny fampan̈antinan̈anany han̈amia atsika fiain̈ana tsisy farany io.—Joda 20, 21.
Karaha Mpanjaka Davida, matokisa fa Jehovah mahita olo jiaby miambin̈y Izy aviô tia irô sady tsy mivadiky amindrô. (Sal. 33:18, 22) Mahadin̈asa fo miambin̈y Jehovah, ke mifantoha amin’ny raha tsara mandalo amy fiain̈ananao, deray Jehovah, mangalà angôvo amindrô rahalahy ndreky ranabavy aby io, aviô ankafatara fo fan̈antinan̈anao.
a Volan̈a tamy voanalohany nadika ‘man̈anten̈a fo’ io mety midika koa “miambin̈y mare raha araiky handalo”, ke raha zen̈y man̈aboaka fa ara-dalàn̈a izikoa atsika efa ten̈a man̈iry hamonjian’i Jehovah atsika.
