Yehofa akusasaka kuti m’weji tumjembecheyeje jwalakwe kuti atendeje yindu yakusaka pandaŵi jakwe. Ligongo chichi jwalakwe akusasaka kuti tumjembecheyeje? Ana chichi champaka chitukamuchisye kuti tusangalaleje patukumjembecheya?

LIGONGO CHICHI YEHOFA AKUSASAKA KUTI TUMJEMBECHEYEJE?

Baibulo jikusasala kuti, “Yehofa akwembecheya nditu kuti amsalalile mtima, ali chile kuti amtendele chanasa ligongo AMBUJE ali Mlungu jwachilungamo. Wosope ŵakusamkulupilila jwalakwe akwete upile.” (Yes. 30:18) Maloŵe ga Yesayaga gajawulaga kwa Ayuda ŵaŵatendaga yakulemwa. (Yes. 30:1) Nambo papalisoni Ayuda ŵane ŵaŵaliji ŵakulupichika, mwamti kwa jemanjaji maloŵe gelega gapaga chembecheyo. Maloŵega gakusapelekasoni chembecheyo kwa ŵakutumichila ŵa Yehofa ŵakulupichika masiku agano.

Tukusasosekwa kwembecheya mwakuwusimana mtima ligongo lyakuti Yehofa akusajembecheyasoni mwakuwusimana mtima. Jwalakwe jwalinganyisye ndaŵi jichachimasya yakusakala yosope pachilambopa. Mwamti akwembecheya lisiku soni ndaŵi jeleji kuti jiyiche. (Mat. 24:36) Pandaŵi jelejo, yindu yakusakala yakusaŵecheta Satana pakwamba ya Yehofa soni ŵakutumichila ŵakwe, yichiwonechela kuti yili yaunami. Mwamti Yehofa chachimjonanga Satana soni ŵandu wosope ŵali kumbali jakwe. Nambo jwalakwe ‘chachitutendela chanasa m’weji.’

Tukumanyilila kuti apano Yehofa nganaŵa amasisye yakusawusya yetu yosope. Nambope, jwalakwe atusimichisye kuti mpaka tuŵe ŵakusangalala patukumjembecheya. Mpela mwajwaŵechetele Yesaya, mpaka tusangalaleje patukwembecheya ni mtima wosope kukwanilichikwa kwa yindu yambone. (Yes. 30:18) Ana mpaka tutende uli kuti tusangalaleje patukwembecheya? Matala mcheche gakuyichisyaga mpaka gatukamuchisye mnope.

YAMPAKA TUTENDE KUTI TUSANGALALEJE PATUKWEMBECHEYA

Tuganichisyeje yindu yambone yayikututendechela. Kwa umi wakwe wosope, Mwenye Daudi jwayiwonaga yakusakala yayatendekwaga. (Sal. 37:35) Nambope, jwalakwe jwalembile kuti, “Tamani jii ni kwalindilila AMBUJE mwangadandawula. Mkasimlilagasya ni mundu jwele yakwe yikumjendela chenene, atamose kuti jwelejo akupakombola kutenda yangalumbana.” (Sal. 37:7) Daudi jwakamulichisye masengo malangisoga mwakumjembecheya Yehofa kuti ni juchachimkulupusya. Jwalakwe jwaganichisyagasoni yindu yambone yosope yaŵamtendelaga Yehofa. (Sal. 40:5) Mwakulandana ni Daudi, m’wejisoni tuchikombola kumjembecheya Yehofa naga tukuganichisya  yindu yambone yayikututendechela mmalo mwaganichisya mnope yakusakala yayikutendekwa.

Tuŵecheteje yindu yakumchimbichisya Yehofa ndaŵi syosope. Juŵalembile Salimo 71 jwele komboleka jwaliji Daudi jwamsalile Yehofa kuti, “Chinjajembecheya ndaŵi syosope soni chinjachimbichisya ndaŵi syosope.” (Sal. 71, 14, NWT.) Ana jwalakwe jwatesile yamtuli pakusaka kumchimbichisya Yehofa? Jwasalilaga ŵane yakwamba Yehofa soni kwimba nyimbo syakumchimbichisya. (Sal. 71:​16, 23) Mpela muyaŵelele ni Daudi, m’wejisoni mpaka tusangalaleje patukumjembecheya Yehofa. Tukusamchimbichisya Yehofa kupitila m’masengo gakulalichila, mu yakuŵecheta yetu soni patukwimba nyimbo sya Uchimwene. Pandaŵi jine pachachijimbaga nyimbo ja uchimwene, chalinjile kuganichisya yagakuti maloŵe ga mu nyimbojo pakwakamuchisya kuŵa ŵakusangalala.

Tukundeje kuti abale ni alongo atulimbikasyeje. Daudi pajwasimanaga ni yakusawusya jwamsalile Yehofa kuti, “Tinjijembecheya lina lyawo pameso pa ŵandu ŵawo ŵakulupichika.” (Sal. 52:9) Mpela muyaŵelele ni Daudi, m’wejisoni patuli pampepe ni abale soni alongo ŵetu jemanjaji mpaka atulimbikasye. Yeleyitu yangagamba kutendekwa patuli pamisonganope kapena patukulalichila, nambo yikusatendekwesoni pandaŵi jatukukunguluka ni jemanjaji.—Alo. 1:​11, 12.

Alimbisyeje chembecheyo chawo. Pa Salimo 62:5 pakusati, “Umi wangu ukutama jii kumjembecheya Mlungu, pakuŵa chikulupi changu chikutyochela kwa jwalakwe.” Yili yakusosekwa mnope kola chikulupi chakulimba mnopemnope naga mbesi jachilambochi ngajikwika pandaŵi jitwaganichisyaga. Tukusosekwa kuŵa ŵakusimichisya kuti yindu yosope yajwasasile Yehofa kuti chachitenda yichikwanilichikwa atamose yili mkuti tuŵele tuli mkuyijembecheya kwandaŵi jelewu. Mpaka tulimbisye chembecheyo chetu mwakulijiganya Maloŵe ga Mlungu. Yindu mpela yakulochesya, kamulana kwakupali pangani syejinji syaŵalembile ŵakulemba Baibulo, nambosoni yindu yajwasasile Yehofa yakwamba msyenejo mpaka yitukamuchisye mnope. (Sal. 1:​2, 3) Kupwatika pelepa, tukusosekwa kupopelaga mwakulongoleledwa ni msimu weswela kuti tupitilisye kuŵa ŵakulupichika kwa Yehofa patukwembecheya kuti jwalakwe chatupe umi wangamala.—Yud. 20, 21.

Mpela muŵatendele Mwenye Daudi, m’wejisoni tukakayichilaga yakuti Yehofa akusiŵalolela ŵandu ŵakusamjembecheya soni kuti jwalakwe akusiŵalosya chinonyelo chekulungwa jemanjajo. (Sal. 33:​18, 22) Myoyo, ndaŵi syosope amjembecheyeje Yehofa mwakuwusimana mtima. Mpaka atende yeleyi mwakuganichisya yindu yambone yayikwatendechela paumi wawo, mwakumchimbichisya jwalakwe, mwakukunda kuti abale ni alongo ŵalimbikasye nambosoni mwakulimbisya chembecheyo chawo chakusosekwa mnope.