Yugu aram rogon ma baadag Jehovah ni ngad gum’an’naged gadad ngad sonnaged ni nge rin’ ban’en ko ngiyal’ ni ke dugliy. Mang fan ni baadag ni ngad rin’ed e re n’ey? Ma mang e rayog ni nge ayuwegdad ni ngad pared ni gad ba felfelan’ u nap’an ni gad be son?

MANG FAN NI BAADAG JEHOVAH NI NGAD SONGAD?

Be gaar e Bible: “Somol e be sonnagmed ni ngam sulod ngak me ayuwegmed. Ba adag ni nge runguymed, ya gubin ngiyal’ ni ma rin’ e tin nib mat’aw. Ba felfelan’ e piin ni ke pagan’rad ngak Somol.” (Isa. 30:18) Pi thin ney e yog Isaiah ni fan ngak e pi Jew ni yad ba gelan’. (Isa. 30:1) Machane immoy boch e Jew ni yad ba yul’yul’ ni i pi’ e pi thin ney e l’agan’ ngorad. Pi thin ney e ku be pi’ e l’agan’ ko pi tapigpig rok Jehovah e ngiyal’ ney ni yad ba yul’yul’.

Ere thingar da gum’an’naged gadad ngad songad ni bochan e ku aram e n’en be rin’ Jehovah. Bay e ngiyal’ ni ke dugliy ni nge thang e re m’ag nib kireb ney, ma be sonnag e re rran nge re awa nem ni nge taw. (Matt. 24:36) Ra taw ko ngiyal’ nem ma kari gagiyel nde riyul’ e pi n’en be yog Moonyan’ nib togopuluw ngak Jehovah nge piin yad be pigpig ngak. Ra thang Satan nge piin yad ba mang ngak, machane gadad e ra ‘runguydad.’

Chiney ni ka gad be sonnag e ngiyal’ nem e rayog ndabi chuweg Jehovah e pi magawon rodad, machane ke micheg nrayog ni ngad pared ni gad ba felfelan’ u nap’an ni gad be son. I yog Isaiah nrayog ni ngad pared ni gad ba felfelan’ u nap’an ni gad be athapeg ban’en nib manigil ni nge buch. (Isa. 30:18) a Uw rogon nrayog ni ngad pared ni gad ba felfelan’? Baaray aningeg ban’en nrayog ni nge ayuwegdad.

ROGON NI NGAD PARED NI GAD BA FELFELAN’ U NAP’AN NI GAD BE SON

Mu lemnag e tin nib fel’ ni be buch rom. Boor ban’en nib kireb ni i guy David ni Pilung ni i buch u n’umngin nap’an e yafos rok. (Ps. 37:35) Yugu aram rogon me yoloy ni gaar: “Mu par u p’eowchen Somol ni ke pagan’um ngak, ma ggum’an’nigem nguum  sonnag ni nge ngongol; dabi awan’um ngak e piin ni ke yoor ban’en rorad, ni bochan e ra sasaliyebgad.” (Ps. 37:7) I fol David ko re thin ney u nap’an ni i par ni be lemnag e n’en ke micheg Jehovah ni aram e ra ayuweg. Ki lemnag urngin e tow’ath ni ke pi’ Jehovah ngak. (Ps. 40:5) Ku arrogodad nra mom ni ngad sonnaged Jehovah ni faanra ud lemnaged e tin nib fel’ ni be buch rodad ma gathi tin nib kireb ni be buch u toobdad.

Um pining e sorok ngak Jehovah. En ni yoloy e Psalm 71 ni aram David e gaar ngak Jehovah: “Bay gu tay e pagan’ rog ngom ni gubin ngiyal’; bayi yoor yay ni nguug pining e sorok ngom.” (Ps. 71:​14, BT) Uw rogon ni nge pining e sorok ngak Jehovah? Aram e nge weliy murung’agen ko girdi’ ma be pining e sorok ngak u daken e tang. (Ps. 71:​16, 23) Ku arrogodad nrayog ni ngad pared ni gad ba felfelan’ u nap’an ni gad be sonnag Jehovah ni bod David. Gad ma pining e sorok ngak u daken e machib ni gad ma tay, ngu nap’an ni gad be non yugu boch e girdi’, ngu nap’an ni gad be yon’ e pi tang rodad. Ere yay ni migid ni ga ra yon’ reb e tang rodad, mag fal’eg i lemnag e thin riy nge rogon ni be k’aring e felfelan’ ngom.

Mu pag e pi walag ni ngar pied e athamgil nga lanin’um. Nap’an ni mada’nag David e magawon, me gaar ngak Jehovah: “Bay gu weliy u p’eowchen e girdi’ rom nri gab manigil.” (Ps. 52:​9, BT) Ku arrogodad nrayog ni nge pi’ e pi walag e athamgil nga lanin’dad u nap’an e muulung, nge machib, ngu nap’an ni gad be rin’ boch ban’en u taabang.​—Rom. 1:​11, 12.

Mu gelnag e l’agan’ rom. Be gaar e Psalm 62:​1, 5 (BT): “Gu be gum’an’nigeg gu be sonnag Got . . . ni ir e ke l’agan’ug ngak.” Rib ga’ fan ni ngad gelnaged e l’agan’ rodad nib ga’ ni faanra dawori yib e tomur ko ngiyal’ ni gad be lemnag nra yib riy. Thingari mich u wan’dad nra riyul’ e pi n’en ke micheg Jehovah ni yugu demtrug n’umngin nap’an ni gad ra sonnag. Faanra ud filed e Thin rok Got ni aram e ngaud filed e pi yiiy ni bay riy, nge rogon nib puluw reb e thin riy nga reb, nge pi n’en be fil Jehovah riy ngodad u murung’agen, ma aram e rayog ni nge gel e l’agan’ rodad. (Ps. 1:​2, 3) Kub t’uf ni ngad ululgad ngaud “meybilgad ngak Got” u daken gelngin nib thothup ya nge yag ni par e tha’ u thildad Jehovah nib fel’ u nap’an ni gad be son ni nge lebug e n’en ke micheg u murung’agen e yafos ni manemus.​—Jude 20, 21.

Nge pagan’um ngay ni ma matanagiy Jehovah e piin yad be sonnag ma ma t’ufegrad u fithik’ e yul’yul’ ni bod David ni Pilung. (Ps. 33:​18, 22) Ere mu gum’an’nagem ngam sonnag Jehovah ni aram e ngaum lemnag e tin nib fel’ ni be buch rom, ma ga be pining e sorok ngak, ma ga be pag e pi walag ni ngar pied e athamgil nga lanin’um, ma ga be gelnag e l’agan’ rom.