Síbẹ̀, Jèhófà fẹ́ ká fi sùúrù dúró de ìgbà tóun máa yanjú ìṣòro wa. Kí nìdí tí Jèhófà fi fẹ́ ká ní sùúrù? Kí lá jẹ́ ká máa láyọ̀ bá a ṣe ń dúró de Jèhófà?

KÍ NÌDÍ TÍ JÈHÓFÀ FI FẸ́ KÁ NÍ SÙÚRÙ?

Bíbélì sọ pé: “Jèhófà ń fi sùúrù dúró láti ṣojúure sí yín, ó sì máa dìde láti ṣàánú yín. Torí pé Ọlọ́run ìdájọ́ òdodo ni Jèhófà. Aláyọ̀ ni gbogbo àwọn tó ń retí rẹ̀.” (Àìsá. 30:18) Àwọn Júù olórí kunkun ni Àìsáyà dìídì sọ ọ̀rọ̀ yìí fún. (Àìsá. 30:1) Àmọ́, àwọn Júù kan wà láàárín wọn tí wọ́n jẹ́ olóòótọ́, ọ̀rọ̀ yìí sì jẹ́ kí wọ́n nírètí. Bákan náà lónìí, ọ̀rọ̀ yìí ń jẹ́ káwa olóòótọ́ ìránṣẹ́ Jèhófà nírètí.

Torí náà, a gbọ́dọ̀ fi sùúrù dúró de Jèhófà torí òun náà ń fi sùúrù dúró. Ó ti pinnu àkókò tó máa pa ayé burúkú yìí run, ó sì ń dúró de ọjọ́ àti wákàtí tó máa ṣe bẹ́ẹ̀. (Mát. 24:36) Tó bá dìgbà yẹn, gbogbo àwọn èèyàn ló máa mọ̀ pé irọ́ ni Sátánì ń pa mọ́ Jèhófà àti gbogbo àwa tá à ń jọ́sìn Jèhófà. Á wá pa Sátánì àti gbogbo àwọn tó ń tì í lẹ́yìn run, àmọ́ ní tiwa Jèhófà máa “ṣàánú [wa].”

Kó tó dìgbà yẹn, ó lè má jẹ́ gbogbo ìṣòro wa ni Jèhófà máa mú kúrò, àmọ́ ó fi dá wa lójú pé a ṣì lè máa láyọ̀ bá a ṣe ń dúró de òun. Bí Àìsáyà ṣe sọ, a ṣì lè láyọ̀ bá a ṣe ń retí àwọn ohun rere tí Jèhófà máa ṣe fún wa. (Àìsá. 30:18) a Kí ló máa jẹ́ ká nírú ayọ̀ yẹn? Nǹkan mẹ́rin kan wà tó lè ràn wá lọ́wọ́.

OHUN TÓ MÁA JẸ́ KÁ LÁYỌ̀ BÁ A ṢE Ń DÚRÓ DE JÈHÓFÀ

Máa ronú nípa àwọn nǹkan dáadáa tí Jèhófà ń ṣe fún ẹ. Jálẹ̀ ìgbésí ayé Ọba Dáfídì, ó rí ìwà ìkà tó burú jáì táwọn èèyàn ń hù. (Sm. 37:35) Síbẹ̀, ó sọ pé: “Dákẹ́ jẹ́ẹ́ níwájú Jèhófà kí o sì dúró dè é. Má banú jẹ́ nítorí ẹni tó gbèrò ibi, tó sì mú un ṣẹ.” (Sm. 37:7) Dáfídì náà fi ìmọ̀ràn yìí sọ́kàn torí ìlérí tí Jèhófà ṣe fún un pé òun máa gbà á sílẹ̀ ló gbájú mọ́.  Ó sì tún mọyì àwọn ohun rere tí Jèhófà ṣe fún un. (Sm. 40:5) Táwa náà bá ń wo àwọn ohun rere tí Jèhófà ṣe fún wa, tá ò sì jẹ́ kí ìwà burúkú táwọn èèyàn ń hù kó ìrẹ̀wẹ̀sì bá wa, á jẹ́ kó rọrùn fún wa láti dúró de Jèhófà.

Máa yin Jèhófà. Ẹni tó kọ Sáàmù 71, tó ṣeé ṣe kó jẹ́ Dáfídì sọ pé: “Èmi yóò máa dúró dè ọ́; màá fi kún ìyìn rẹ.” (Sm. 71:14) Báwo ni Dáfídì ṣe yin Jèhófà? Ó dájú pé ó ń sọ nípa Jèhófà fáwọn èèyàn, ó sì ń kọrin ìyìn sí i. (Sm. 71:16, 23) Bíi ti Dáfídì, àwa náà lè máa láyọ̀ bá a ṣe ń dúró de Jèhófà. A máa ń yin Jèhófà tá a bá ń wàásù fáwọn èèyàn, tá à ń sọ nípa ẹ̀ fáwọn ọ̀rẹ́ àtàwọn tá a jọ wà nínú ìdílé, tá a sì ń kọ àwọn orin wa. Torí náà, gbogbo ìgbà tó o bá ti ń kọ orin Ìjọba Ọlọ́run ni kó o máa fara balẹ̀ kíyè sí àwọn ọ̀rọ̀ orin náà àti bí wọ́n ṣe lè jẹ́ kó o láyọ̀.

Má jìnnà sáwọn ará. Nígbà tí Dáfídì níṣòro, ó sọ fún Jèhófà pé: “Níwájú àwọn ẹni ìdúróṣinṣin rẹ, màá gbẹ́kẹ̀ lé orúkọ rẹ.” (Sm. 52:9) Àwa náà máa rí ìṣírí gbà lọ́dọ̀ àwọn tá a jọ ń sin Jèhófà láwọn ìpàdé wa, nígbà tá a bá jọ ń wàásù àti nígbà tá a bá ń gbádùn ara wa níbi ìkórajọ.—Róòmù 1:11, 12.

Jẹ́ kí ìrètí tó o ní túbọ̀ dá ẹ lójú. Sáàmù 62:5 sọ pé: “Mo dúró jẹ́ẹ́ de Ọlọ́run nítorí pé ọ̀dọ̀ rẹ̀ ni ìrètí mi ti wá.” Ó ṣe pàtàkì pé kí ìrètí tá a ní túbọ̀ dá wa lójú, pàápàá tí òpin ò bá dé nígbà tá a retí pé kó dé. Ó gbọ́dọ̀ dá wa lójú pé Jèhófà máa mú àwọn ìlérí ẹ̀ ṣẹ, tó bá tiẹ̀ ti pẹ́ tá a ti ń retí ẹ̀. Tá a bá ń kẹ́kọ̀ọ́ Ọ̀rọ̀ Ọlọ́run àtàwọn àsọtẹ́lẹ̀ inú ẹ̀, tá a sì rí bí àwọn ọ̀rọ̀ inú ẹ̀ ṣe jọra bó tiẹ̀ jẹ́ pé àwọn tó kọ ọ́ yàtọ̀ síra, tá a sì tún kẹ́kọ̀ọ́ àwọn nǹkan tí Jèhófà sọ nípa ara ẹ̀, á jẹ́ kí ìrètí tá a ní túbọ̀ dá wa lójú. (Sm. 1:2, 3) Yàtọ̀ síyẹn, bá a ṣe ń dúró de Jèhófà pé kó mú ìlérí ìyè àìnípẹ̀kun tó ṣe fún wa ṣẹ, ó yẹ ká ‘jẹ́ kí ẹ̀mí mímọ́ máa darí wa bá a ṣe ń gbàdúrà,’ ká lè ní àjọṣe tó dáa pẹ̀lú ẹ̀.—Júùdù 20, 21.

Bíi ti Ọba Dáfídì, mọ̀ dájú pé Jèhófà ń rí gbogbo àwọn tó ń fi sùúrù dúró dè é, ó sì máa ń fi ìfẹ́ tí kì í yẹ̀ hàn sí wọn. (Sm. 33:18, 22) Torí náà, a rọ̀ ẹ́ pé bó o ṣe ń fi sùúrù dúró de Jèhófà, máa ronú nípa àwọn nǹkan dáadáa tí Jèhófà ń ṣe fún ẹ, máa yin Jèhófà, má jìnnà sáwọn ará, kó o sì jẹ́ kí ìrètí tó o ní túbọ̀ dá ẹ lójú.