Kex maʼ chéen chʼaʼabileʼ Jéeobaeʼ u kʼáat ka k-eʼes paciencia le táan k-páaʼtik u yutskíintik tuláakal baʼaloʼ. ¿Baʼaxten u kʼáat ka k-beet beyoʼ? ¿Baʼax jeʼel u yáantkoʼon k-páaʼt yéetel kiʼimak óolal u béeykuntik u promesaeʼ?

¿BAʼAXTEN KU PÁAʼTIK JÉEOBA KA K-EʼES PACIENCIA?

Le Bibliaoʼ ku yaʼalik: «Jéeobaeʼ jach táan u páaʼtik u súutukil utiaʼal u yeʼesikteʼex u yutsil, letiʼeʼ yaan u líikʼil yéetel yaan u chʼaʼikteʼex óotsilil, tumen Jéeobaeʼ juntúul Dios ku beetik justicia. Kiʼimak u yóol tuláakal le máaxoʼob jach táan u páaʼtkoʼob baʼax ken u beet Diosoʼ» (Isa. 30:18). Le tʼaanoʼobaʼ tiʼ le judíoʼob tercoʼob tu yaʼalaj Isaíasoʼ (Isa. 30:1). Chéen baʼaleʼ teʼ kʼiinoʼob xanoʼ yanchaj judíoʼob chúukpaj u yóoloʼob tiʼ Dios, letiʼobeʼ líiʼsaʼab u yóoloʼob yéetel le tʼaanoʼobaʼ yéetel jeʼel xan u páajtal u líiʼsik k-óol bejlaʼeʼ.

¿Baʼaxten kʼaʼabéet k-eʼesik paciencia? Tumen Jéeobaeʼ táan xan u yeʼesik paciencia. Letiʼeʼ táan u páaʼtik u kʼuchul le kʼiin u yaʼalmaj utiaʼal u xuʼulsik tiʼ le kʼasaʼan yóokʼol kaabaʼ (Mat. 24:36). Teʼ kʼiin kun eʼesbil maʼ jaaj tuláakal le baʼax tu yaʼalaj le Kʼaasilbaʼal tu contra Diosoʼ. Jéeobaeʼ yaan u xuʼulsik tiʼ Satanás bey xan tiʼ tuláakal le máaxoʼob apoyarkoʼ, pero le máaxoʼob chúukaʼan u yóoloʼob tiʼ letiʼoʼ ‹yaan u chʼaʼiktiʼob óotsilil›.

Jéeobaeʼ maʼ tu yaʼalik wa yaan u luʼsik tuláakal k-problemas le táan k-páaʼtik u béeykuntik u promesaoʼ, pero ku yaʼalikeʼ jeʼel u páajtal u kiʼimaktal k-óoleʼ. Isaíaseʼ tu yaʼaleʼ «kiʼimak u yóol tuláakal le máaxoʼob jach táan u páaʼtkoʼob baʼax ken u beet Diosoʼ» (Isa. 30:18). a ¿Bix túun jeʼel u kiʼimaktal k-óoleʼ? Koʼoneʼex ilik kanpʼéel baʼaloʼob jeʼel u yáantkoʼoneʼ.

BIX JEʼEL U KIʼIMAKTAL A WÓOLEʼ

Chʼik a tuukul tiʼ le baʼaloʼob maʼalobtakoʼ. Rey Davideʼ jach yaʼab baʼaloʼob kʼaastak tu yilaj ichil u kuxtal (Sal. 37:35). Kex beyoʼ tu tsʼíibtaj: «Chúukpajak a wóol a páaʼt Jéeoba, chúukpajak a wóol a páaʼt baʼax ken u beete. Maʼ a kʼuuxil kéen a wil táan u béeytal le baʼaxoʼob ku chʼaʼtuklik le kʼasaʼan máakoʼ»  (Sal. 37:7). Davideʼ tu tsʼáaj ichil u kuxtal le baʼax tu yaʼaloʼ tumen tu chʼikaj u tuukul yaan u salvartaʼal tumen Jéeoba yéetel mantatsʼ tu valorartaj le baʼax tu beetaj Jéeoba tu yoʼolaloʼ (Sal. 40:5). Toʼon xaneʼ maʼalob ka tuukulnakoʼon tiʼ le baʼaloʼob maʼalobtakoʼ maʼ tiʼ le baʼaloʼob kʼaastak ku yúuchul ichil k-kuxtaloʼ. Wa k-beetik beyoʼ maas chéen chʼaʼabil ken k-páaʼt u béeytal le baʼax ken u beet Diosoʼ.

Alabart Jéeoba tiʼ tuláakal súutukil. Le máax tsʼíibt le Salmo 71, maʼ xaaneʼ David, tu yaʼalaj tiʼ Jéeoba: «Teneʼ yaan u seguer in páaʼtikech. Yaan in maas alabarkech» (Sal. 71:14). ¿Bix tu alabartil Jéeoba? Tu kʼayaj alabanzaʼob tiʼ yéetel tu tsikbaltaj tiʼ u maasil yoʼolal Jéeoba (Sal. 71:​16, 23). Toʼoneʼ jeʼel u páajtal k-alabartik Jéeoba jeʼex tu beetil Davidoʼ, kéen kʼaʼaytajnakoʼon, kéen k-tsikbalt tiʼ k-amigoʼob yéetel tiʼ k-láakʼtsiloʼob yoʼolal Jéeoba bey xan kéen kʼaaynakoʼon. Le beetkeʼ cada kéen kʼaaynakech teʼ reuniónoʼ jach ilawil baʼax ku kaʼansiktech le kʼaayoʼ. Lelaʼ jach yaan u yáantkech a páaʼt yéetel kiʼimak óolal u béeykuntik u promesa Dios.

Máans tiempo yéetel le sukuʼunoʼoboʼ. Le ka yanchaj yaʼab problemas tiʼ Davideʼ, tu yaʼalaj tiʼ Jéeoba: «Kéen yanaken yéetel máaxoʼob meyajtikecheʼ yaan in weʼesik in kʼubmaj in wóol tiʼ teech» (Sal. 52:9). Úuchik u beetik beyoʼ Davideʼ líikʼ u yóol. Toʼon xaneʼ jach jeʼel u líikʼil k-óol wa k-máansik tiempo yéetel le sukuʼunoʼob teʼ kʼaʼaytajoʼ, teʼ reuniónoʼoboʼ wa tiʼ uláakʼ súutukiloʼob (Rom. 1:​11, 12).

Ilawil u maas nojochtal a esperanza. Salmo 62:​5, ku yaʼalik: «Yaan u chúukpajal in wóol in páaʼt baʼax ken u beet Dios, tumen letiʼ tsʼáaikten esperanza». Kʼaʼabéet k-ilik u maas nojochtal k-esperanza maases wa k-tuklik tsʼoʼok u chan xáantal maʼ xuʼulsaʼak tiʼ le yóokʼol kaabaʼ. Beyoʼ kex jeʼel bukaʼaj tiempo ka k-páaʼteʼ yaan k-creertik yaan u béeykuntik Jéeoba u promesa. ¿Baʼax jeʼel k-beetik utiaʼal ka maas nojochchajak k-esperanzaeʼ? Kʼaʼabéet k-xokik le Bibliaoʼ, k-ilik bix u kʼaxkuba le baʼax ku yaʼalikoʼ, k-xakʼaltik le profecíaʼoboʼ yéetel kʼaʼabéet k-ilik xan baʼax ku kaʼansiktoʼon yoʼolal Jéeoba (Sal. 1:​2, 3). Kʼaʼabéet u seguer k-orar tiʼ Jéeoba, yéetel k-kʼáatiktiʼ u espíritu santo utiaʼal maʼ u xuʼulul k-bisikba tu yéetel le táan k-páaʼtik le kuxtal minaʼan u xuuloʼ (Jud. 20, 21).

Jeʼex rey Davideʼ toʼon xaneʼ seguroʼon de ke Jéeobaeʼ mantatsʼ táan u paktik le máaxoʼob táan u páaʼtkoʼob u yeʼesaʼal nojoch yaabilaj tiʼoboʼ (Sal. 33:​18, 22). Utiaʼal ka kiʼimakchaj k-óol le táan k-páaʼtik u béeytal u promesa Jéeobaoʼ, kʼaʼabéet k-tuukul tiʼ le baʼaloʼob maʼalobtak ku yúuchul ichil k-kuxtaloʼ, k-alabartik Jéeoba, k-máansik tiempo yéetel le sukuʼunoʼoboʼ yéetel kʼaʼabéet k-ilik k-maas nojochkíintik k-esperanza.