Neca zacá, racalaʼdxiʼ Jehová gusihuínninu paciencia ne cuézanu guedandá dxi ni maʼ gudíxhebe para gúnibe xiixa. ¿Xiñee racalaʼdxiʼ Jehová gúninu nga ne xi zanda gacané laanu chuʼnu nayecheʼ laga cabézanu yaʼ?

XIÑEE RACALAʼDXIʼ JEHOVÁ CUÉZANU

Guidúʼyanu xi ruzeeteʼ Biblia: «Cabeza Jehová né paciencia para gacané laatu ne ziásabe para guiabe laatu. Purtiʼ Jehová nga ti Dios ni nanna guni juzgar nayecheʼ guiráʼ ca ni ribeza laabe de guidubi ladxidóʼ» (Is. 30:18). Gudxi Isaías ca diidxaʼ riʼ ca judíu ni qué ruzuubaʼ diidxaʼ que (Is. 30:1). Peru laaca guyuu caadxi judíu ni bizuubaʼ diidxaʼ tiempu que. Nabé gucané ca diidxaʼ ca laacabe ne laaca racané ca ni laanu ca dxi riʼ.

Yanna, ¿xiñee naquiiñeʼ cuézanu né paciencia yaʼ? Purtiʼ laaca cabeza Jehová né paciencia. Maʼ nanna Jehová padxí né pora gunduuxeʼ guidxilayú malu riʼ ne maʼ cabézabe guedandá dxi ca (Mat. 24:36). Ora guedandá dxi ca zahuinni dxichi cadi dxandíʼ guirá ni maʼ guni Binidxabaʼ de Jehová ne de ca xpinni. Zunitilube Binidxabaʼ ne guiráʼ ca ni zinanda laa. Peru ca xpínnibe la? maʼ gúnibe ziabe laacaʼ.

Zándaca qué zabee Jehová guirá guendanagana stinu laga cabézanu guni xiixa. Peru cayábibe laanu zanda guibáninu nayecheʼ. Casi guníʼ Isaías, zanda chuʼnu nayecheʼ laga cabézanu guni Jehová cosa galán pur laanu (Is. 30:18). a ¿Ximodo zanda chuʼnu nayecheʼ yaʼ? Guidúʼyanu tapa cosa ni zanda gacané laanu.

XIMODO ZANDA CHUʼNU NAYECHEʼ LAGA CABÉZANU

Guni ique puru si cosa galán. Biiyaʼ rey David stale cosa malu biaʼ dxi bibani (Sal. 37:35). Neca zacá, bicaabe ca diidxaʼ riʼ: «Cadi guiniʼluʼ gastiʼ ora maʼ nuuluʼ nezalú Jehová ne guleza laabe né paciencia. Cadi guidxiichiluʼ pur tuuxa ni riníʼ ique jneza zaree ca cosa malu ni cá ique guni» (Sal. 37:7). Ne laapebe yenándabe conseju riʼ.  ¿Ximodo yaʼ? Guníʼ íquebe maʼ guníʼ Jehová zulá laabe. Ne laaca bisisácabe ca cosa galán ni biʼniʼ Dios pur laabe (Sal. 40:5). Pa guiníʼ íquenu ca cosa galán ni nápanu ne cadi guicá íquenu ca guendanagana ni nápanu la? jma qué zaca nagana para laanu cuézanu guni Jehová xiixa.

Gusisácanu Jehová ora tiica si. Zándaca David nga bicaa Salmo 71 ne gúdxibe Jehová ca diidxaʼ riʼ: «Peru naa, qué zusaanaʼ de cuezaʼ; zusisacaʼ lii jma cada dxi» (Sal. 71:14). ¿Xi bíʼnibe para gusisácabe Jehová yaʼ? Riníʼnebe xcaadxi binni de Jehová ne ruundabe para gusisácabe laa (Sal. 71:​16, 23). Laanu laaca zanda chinándanu ejemplu stiʼ David ne gusisácanu Dios ora runi predicarnu, ora rinínenu ca xhamígunu ne familia stinu de Jehová ne ora ridúʼndanu ca canción stinu. Nga runi, ora maʼ cayuundaluʼ ti canción biiyaʼ pabiáʼ galán letra stini ne ximodo zanda gacané ni lii. Zacané guiráʼ ndiʼ laanu chuʼnu nayecheʼ laga cabézanu guni Jehová xiixa.

Chuʼnu gaxha de ca hermanu. Ora gudiʼdiʼ David lu guendanagana gúdxibe Jehová: «Nezalú ca ni qué rixeleʼ de lii zusihuinneʼ napaʼ confianza laluʼ» (Sal. 52:9). Cásica guyuu David gana pur biyubi chuʼ gaxha de ca xpinni Jehová, laanu laaca zanda chuʼnu gana ra guyúbinu chuʼnu gaxha de ca hermanu stinu ora riuunu reunión, predicación ne intica si lugar (Rom. 1:​11, 12).

Guquídxinu esperanza stinu. Sicaríʼ ná Salmo 62:5: «Né stale paciencia cabezaʼ gulá Dios naa purtiʼ laabe nga rudiibe naa esperanza». Nabé risaca gápanu ti esperanza naguidxi, jmaruʼ si ora guidúʼyanu candaa para guinitilú guidxilayú malu riʼ. Biaʼ tiica si cuézanu naquiiñeʼ chuʼnu seguru zuni cumplir Jehová ca promesa ni maʼ biʼniʼ. Yanna, ¿xi zacané laanu gaca esperanza stinu jma naguidxi yaʼ? Guni estudiarnu Stiidxaʼ Dios ne guiduʼyaʼ chaahuinu ca profecía zeeda luni, guidúʼyanu tobi si guiráʼ ni riete luni ne guiduʼyaʼ chaahuinu xi guiráʼ zanda guizíʼdinu de Jehová (Sal. 1:​2, 3). Laaca naquiiñeʼ guni orarnu Jehová ne guinábanu laa espíritu stiʼ para cadi gusaana de gaca xhamígunu laa laga cabézanu guni cumplirbe promesa ni maʼ bíʼnibe, gudiibe laanu guendanabani ni qué zaluxe (Jud. 20, 21).

Cásica rey David, zanda chuʼnu seguru ruuyaʼ Jehová ca ni cabeza gúnibe xiixa ne rusihuínnibe dxandíʼ peʼ nadxiibe laacaʼ (Sal. 33:​18, 22). Nga runi, para chuʼnu nayecheʼ laga cabézanu guni Jehová xiixa, guiníʼ íquenu puru si cosa galán, gusisácanu Jehová, chuʼnu gaxha de ca hermanu ne guquídxinu esperanza stinu.