Oni Gbia Ngbarago wa Oni Asungudo Yekova na Zerangbaduse
YA MO mo nangera kumbatayo tipa gu regbo Yekova nika dia gbegberẽ apai dunduko kusayo na ki sa ahe dunduko ni vovoho? (Yugo. 21:1-5) Zanga kapa, mo nangera angera tipa gu regbo re! Ono tie, si naadunga taata ti aregbo dunduko kaa sungudo Yekova na zerangbaduse te, gbe, ho ani agbiatirani ni na akpakarapai. Ho maabangirise aima ni, si nafu kaza ngbaduse.—Snz. 13:12.
Wa vura duhe wo, Yekova naida ani sungudi ko na zerangbaduse tipa ko mangipai ti gako siasia regbo. Tipagine ko aida ani mangi gipai re ti ni? Ginipai rengbe ka undo rani ani du na ngbarago wa ani kaa sungudo ko?
TIPAGINE YEKOVA AIDA ANI SUNGUDI KO TI NI?
Baibiri nape gupai nga: Si du “Yekova nasunguda roni ti ni ka du na undahe fu roni; si du du ko ti ni ni kiisikiisi pako ka ina pai fu roni. Bambiko Yekova nga Mbori ruru sarangbanga; maku du fu agu yo dunduko nasunguda ko.” (Yes. 30:18) Agi afugo Yesaya re adu fu keretukeretu aYudo. (Yes. 30:1) Ono gu kura aYudo adu kinaho naadu ni ruruyo, na agi afugo re aima fu maabangirise fuyo. Agi afugo re nafu maabangirise areme a fu ga Yekova ruru amoyambu.
Sidu, si naida ani sungudi Yekova na zerangbaduse bambiko ko nasungudo gako regbo na zerangbaduse a. Gako siasia regbo kinaho ko nika nyasariipa gi sino raka re ti ni, na ko nasungodo gu uru re na gu saa re si da. (Mt. 24:36) Ti gu regbo re, si nika du ziazia nga ga Bakitingbanga akitangbangase kuti Yekova na kuti agu aboro na iriso Ko nga ziree. Ko nika dia Satana kusayo na ai gu boro nangbe na ko, ono Ko adu ni ‘undahe fu rani.’
Wa du regbo re, Yekova ima rengba ka zanga dia gaani asada kusayo, ono ko nakido rani nga ani ima rengba kadu na ngbarago wa ani asungudo ko. A wa Yesaya apehe, ani ima rengba kadu na ngbarago wa ani amaabangirani tipa wenepai si mangi. (Yes. 30:18) Waigu rengbe ani ka gbia gu ngbarago re? Apai biama rengbe ka undo rani.
WAI KADU NA NGBARAGO WA MO ASUNGUDO YEKOVA
Mo berẽkurii gu weneapai namanga rogo gamo raka yo. Bakindo Davide aima bi dungu gbegberẽ apai rogo gako raka yo. (Tam. 37:35) Ono wa si avura du wo, ko ake gupai nga: “Mo ongo kii bara bangiri Yekova, ki sungudi ko zezeredi; ka mo nizingisi nga tiro tipa gu ni u au rogo gani apai ya, tipa gu boro namanga sangba gbegberẽ aberã a ya!” (Tam. 37:7) Davide nitiko aima mangapai kuti gu rugute re ni maa ko berãko kuti gako maabangirise. Ko adu a na tambuahe tipa gu weneapai dunduko Yekova amangihe fuko. (Tam. 40:5) Ka ani moiberãrani a tipa gu wene apai namanga rogo gaani raka yo, ki zanga kaa maaberã rani kina kuti agu akpakarapai nga gu ani agbiatirani na ni rogo raka yo, si nika saha furani taata tipa ani sungudi Yekova.
Mo mangisunge na agu amomu du bero dunduko ka fura wenengai tipa Yekova. Gu bake Atambuahe 71, nangia Davide ape gupai fu Yekova nga: “Mi amáa bangire ku mbata yo kindi, ki tambua ro susi gu naadu mbata.” (Tam. 71:14) Waigu ka ko atambua Yekova? Ko anaape pa Yekova fu kura aboro na kini bibia taarimo fuko. (Tam. 71:16, 23) Wakina Davide, ani ima rengba ka gbia ngbarago wa ani asungudo Yekova. Ani natambua ko vurube gaani tungusapai, rogo afugo rani yo na aˈuru dunduko, na rogo gaani abia yo du tipa irisombori. Gu regbo mo nikaa bi gaani abia berewe nga ga Kindo, mo moiberãro kuti afugoho na wai si afu ngbarago foro.
Mo gbia wasa be awirinamo. Ho Davide agbiatiko ni na akpakarapai, ko ape gupai fu Yekova nga: “Mi asúnguda pa rimoro, bambiko si ni wene he, ku bangiri gamo ziazia aboro.” (Tam. 52:9) Ani ima rengba ka gbia wasa be ruru awirinarani airisimbori, angianga kina ti regbo gaani adunguratise sa na gene tungusapai yo ya, ono zavura ti gu regbo ani agbia ngbarago.—Rom. 1:11, 12.
Mo nyakasi gamo maabangirise. Atambuahe 62:5 naya: “Mbisimore nasunguda kina Mbori kii, bambiko gi maabangirise naye be kina ko.” Si ni nyanyakipa pai tipa kadu na nyanyaki maabangirise, gbe, ka si du nga digido gi zegino re ayengo ti gu regbo ani aaberãpaha te. Si naida ani idi kuti gupai nga ga Yekova akidohe nika da ada ti rengo ka si vura du vurũ nga ani sungudihe ripa gbanga regbo. Ani rengbe ka nyakasa gaani maabangirise ni wisigo ani Fugo Mbori. Ni kpiapai, mo berẽnga kurii agu apai Baibiri afura tipaha nga gu naima digisotihe, na wai agu apai abake Baibiri akehe atagbaganga tihe ya. (Tam. 1:2, 3) Na si naida ani naandu kumbatayo kindi kaa ‘kpara rogo Ziazia Toro’ yo na kidu na wene pagume na Yekova a wa ani kaa sungudo gu gako kidohe du tipa nyenye unga si digisitihe.—Yuda 20, 21.
Wakina Bakindo Davide, mo du na gu kido nga Yekova nangerakurii aguyo nasungodo Ko, na ko nayugo Gako bangabanga nyemuse fuyo. (Tam. 33:18, 22) Mo naandu kindi kumbatayo kaa sungudo Yekova na zerangbaduse ni maa mo berãro tipa gu wene apai namanga rogo gamo raka yo, ni tambua ko, ni gbia mo ngarasaro be awirinamo nga aDezire Yekova, na kini banda gamo wene maabangirise ni nyanyakihe.
