Iyạl Abumhoom Abumor Dị Moḍighi Aani Pakirị Aloor Phọ Repogh Bọ
UGBEELHOM ni iinhaghạn dị egbatanhaạn Wednesday, January 18, 2023, siphẹ jw.org, dị eḅẹm mọ momạ Bumor phọ Gage Fleegle r’aJeffrey Winder oḍighom aani Aloor Phọ Repogh Bọ Bugbaanhaạn AZihova. Iyạl phọ abumor phọ abuẹn phọ momhiigh ni okumu aZihova eten dị ekpẹ oḍuomolhoghi k’asiạ dị.
Gage Fleegle r’anhịr phọ odị, Nadia
Uukonhom Umor phọ Fleegle epẹ western Pennsylvania, U.S.A., kụ odẹ r’onhiin odị uukonhom nyodị siẹn igey phọ. Mem dị odị aḍighi oḍoọgh dị purukụ amhuunha ukpe, eghunotu abidị uḍuạ ni oghị emhạ dị ke/ghughuronhu dị ewaạm mọ ebụgh. I/bia bịn odị aḍiiny muụm unwanyụ aNovember 20, 1988.
Odẹ r’onhiin Umor phọ aFleegle uromha ghan nyodị oomo amem oḍigh aani arukumuan oomo amem mọ. Bidị ugbor ghan omhạgh bupoghom eghir r’abulọ rokumuan epẹ Betẹl oru k’abidị, Kụ Umor phọ Fleegle amhiịn ghan ni oḅaạl olhoghi phọ bidị omhoọgh bọ. Mem mọ odị aḍiiny bọ muụm, i/bia bịn odị amhiigh okọy eten—unwanyụ aSeptember 1, 1989. Iyạl asiạ reten, odị ateẹny ni ḍiigbu dị odị aphighi mem mọ odị amhạn bọ 12 asiạ—ḍiigbu oghị aBetẹl. Odị amhiigh rukumuan aBetel phọ odị epẹ Betẹl aBrooklyn unwanyụ October 1991.
Epẹ aBetẹl phọ, Umor phọ Fleegle akumuan ghan agạ phọ odoghoḍi ghan bọ rokpoghogh rinyạ phọ ayira esi ophaanyạ asiạ, ipẹ reten kụ olhọgh nyodị Service Department. Mem mọ amuphẹ phọ, odị aghị ghan ookpomhoghan dị oḅạ ghan onhụ aRussia esi iyạl ikpo asiạ. Odị aphin Nadia anhịr phọ odị lhạ phọ 2006, kụ amhiigh aani rukumuan aBetẹl phọ. Iyạl phọ abidị ukumuan ni epẹ Portugal. Kụ oḅilhẹ okumuan epẹ Spain dị repel li ḍioph asiạ. Odị r’orọl Service Department okumuan esi ibadị asiạ, kụ osighẹ nyodị oghị ofịs aTeaching Committee phọ, kụ onyebel roten, odị aḅilhẹ amhiigh okumuan ofịs aService Committee phọ. Kụ unwanyụ aMarch 2022 omạ nyodị idiphọ oniin olọgh ḍighaạgh aService Committee Aloor Phọ Repogh Bọ.
Jeffrey Winder r’anhịr phọ odị, Angela
Uukonhom Umor phọ Winder epẹ Murrieta, California, U.S.A. Odẹ r’onhiin odị uukonhom nyodị siẹn igey phọ, kụ odị aḍiiny muụm unwanyụ aMarch 29, 1986. Odị asopha ni unwanyụ phọ adaphạn bọ siphẹ okọy eten opọ ekulha amem mọ. Kụ odị aghelhọm agey dị tutụ i/pụ mun owilhẹ. Mem dị odị rokọy eten opọ ekulha amem mọ esi ibadị arunwanyụ, bịn unwanyụ October 1, 1986 odị amhiigh okọy eten opọ oomo amem mọ.
Mem dị purukụ odị amhuunha ukpe idiphọ oḍoọgh, Umor phọ Winder aghị ni aphogh iyạl abumor odị dị oghupheri nyodị, dị odi Betẹl rokumuan mem mọ amuphẹ phọ. Eghị phọ ephẹn phọ isumeẹny ni ḍiḅeraạn phọ odị amhoọgh bọ oghị aBetẹl okumuan aani mem dị odị amhanhạm. Kụ unwanyụ aMay 1990, umhạgh ni nyodị oghị aBetẹl epẹ Wallkill.
Epẹ aBetẹl phọ, Umor phọ Winder akumuan ni riikpịgh kirokirọ, odị akumuan Cleaning Department, Farm Department, ḅilhẹ r’aBethel Office. Odị aphin anhịr phọ odị, Angela, lhạ phọ 1997, kụ k’aḍio phọ iyạl phọ abidị odi ni Betẹl rokumuan. Lhạ phọ 2014, bidị uḅuạ ni oghị Warwick, kụ epẹ phọ Umor phọ Winder alhoghonhaạn ḍighaạgh oḍighi olhọgh aruutu epẹ emhụ agadạ phọ. Kụ lhạ phọ 2016, bidị oḅuạ oghị Watchtower Educational Center, epẹ Patterson. Umor phọ Winder akumuan ghan agạ Audio/Video epẹ phọ. Inya asiạ reten, bịn bidị oḅulha epẹ Warwick, kụ oḅenhị Umor phọ Winder okumuan ofịs aPersonnel Committee. Unwanyụ aMarch 2022 umạ nyodị idiphọ oniiin olọgh ḍighaạgh aPersonnel Committee Aloor Phọ Repogh Bọ.
Yira rooḅereghị ni mọ aZihova asẹph ni abalabalamhị bumor phọ abuẹn phọ oḍighi bọ “inmo” dị ungọ iyira iduọn bidị oghiọm bọ ghisigh rokumuan obakị oḍighi Omhạr phọ.—Efẹ. 4:8.
