CENG’ KAS’ADEK, nindo 18, mi dwi mi 1, 2023, atwong’a moko ma segi uwok i jw.org, m’unyutho nia jung’iyo umego Gage Fleegle giku Jeffrey Winder pi nibedo umego mi Guriri m’utelowic mi Jumulembe pa Yehova. Umego ario maeno ceke gidaru timo ni Yehova ku bedopwe pi oro ma dupa.

Umego Fleegle udongo yo nyangu mi Pennsylvania, i États-Unis, man junyodo pare gitunge i lemandha. Kinde m’edoko aradu, juruot pagi gidok i nyathin adhura moko kaka ma yeny ubino lee i iye. Nyanok i ng’eye, elimo batizo i nindo 20, mi dwi mir 11, 1988.

Saa zoo, junyodo p’umego Fleegle gibed gimiyo amora i kume nia emak tic mi saa ceke. Wang’ ma pol gibed gijolo juliew mi twodiri man umego ma gitimo i Bethel, pieno umego Fleegle ubed uneno mutoro mir umego ku nyimego maeno. Nyanok i ng’ey batizo pare, ecaku tic pa jayab yo ma nja i nindo 1, mi dwi mir 9, 1989. Oro ario i ng’eye, etundo i kum lembakeca m’egam eketho ku oro 12, niwacu nicitimo i Bethel. Ecaku timo i Bethel mi Brooklyn i dwi mir 10, 1991.

I Bethel, umego Fleegle utimo pi oro abora kaka ma jumwono iye dend buku, i ng’eye judwoke i Departema mi tic mi lembanyong’a. I kind nindo maeno, ekonyo i cokiri mi dhok mi Russie pi oro moko. I oro 2006, gigamiri ku nyamego Nadia man gicaku timo karacelo i Bethel. Gikonyo bende i cokiri ma juweco dhok mi Portugais i iye, man pi oro ma kadhu apar gikonyo i cokiri ma juweco dhok mi Espagnol i iye. I ng’ey m’umego Fleegle utimo oro ma dupa i Departema mi tic mi lembanyong’a, judwoke i biro mi Komite mi ponji man i biro mi Komite mi tic mi lembanyong’a. I dwi mir 3, 2022, jung’iye edok jakony i Komite mi tic mi lembanyong’a mi Guriri m’utelowic.

 Umego Winder udongo i Murrieta, i California, i ng’om mir États-Unis. Junyodo pare gitunge i lemandha, man elimo batizo i nindo 29, mi dwi mir 3, 1986. I dwi m’ulubo, ecaku tic pa jayab yo ma jakony. Ticne unyang’e lee mandha uketho emito emedere kude. I ng’ey m’etime pi dwi ma dupa, ecaku tic pa jayab yo ma nja i nindo 1, mi dwi mir 10, 1986.

Kinde m’umego Winder udoko aradu, ecidh eliewo umego pare ma juwang’e ma gibino timo i Bethel i saa maeca. Liew maeno umiyo ava mi citimo i Bethel i kume kinde m’ebidongo. E i dwi mir 5, 1990, julwong’e ecidh etim i Bethel mi Wallkill.

I Bethel, umego Winder utimo i departema ma tung’ tung’, calu ve i Departema ma ketho leng’o, Departema mi furo dek ma col, man i biro mi Bethel. Gigamiri ku nyamego Angela i oro 1997, man gicaku timo karacelo i Bethel niai eca. I oro 2014 judwokogi i Warwick; kuca umego Winder uwok ukonyo i tic mi giedo mi kabedo ma dit. I oro 2016, gidok i Ot mi ponjiri mi Watchtower i Patterson, man kuca ewok ekonyo i tic mi Odio/Video. Oro ang’wen i ng’eye, gidok kendo i Warwick, man juwok juketho etim i biro mi Komite mi jurutic. I dwi mir 3, 2022, jung’iye ebed jakony i Komite mi jurutic mi Guriri m’utelowic.

Wabekwayu Yehova umii mugisa lee mandha iwi “giramiya ma dhanu” maeno kinde ma gibemediri nitimo ma tek i tic mi Ker.—Efe. 4:8.